Namuhla kubikwe kutsi bekungangeneki futsi kungaphumeki e-Barberton ngenca yembhikisho wetakhamuti letitsi tifuna kuphuma ngaphansi kwamasipala waseMbombela. Masipala longasekho weMjindi wahlanganiswa namasipala waseMbombela nga-2016, kantsi kuleliviki leliphelile ibhodi leklaya imincele yabomasipala incume kungabehlukanisi labomasipala. Kuyibuka lendzaba yalombhikisho wetakhamuti, sichumana nalokhulumela likomiti lemphakatsi wase-Barberton, Umnumzane Themba Mahlangu.

Babalelwa ku 45 000 babanjwa labakhululwe nge parolee kulolonke lelive le Ningizimu Afrika. Kantsi njengendlela yekuhlola kutsi lababanjwa bayahambisana nemigomo lebekiwe yekukhululwa nge parole, Nkomishana wetemajele Makgothi Thobakgale uvakashele labanye babo bangakalindzeli e Polokwane esifundzeni sase Limpopo. Simeme lokhuoumela litiko letekuvuselelwa kwesimili, Singabakho Nxumalo, kutewuva ngaloluhlelo.

Uyacala namuhla umhlangano welishumi nakubli we Tax Indaba. Lomhlangano wemalanga lamabili uhlose kukhuluma kabanti ngetindzaba letitsintsa intsela nalabo labanelwati kulomkhakha wekukhokha intsela. Simeme Keitumetse Sesana lolibamba lelisekela lemphatsi we- South African Institute of Taxation  kutochaza kabanti ngalomhlangano

Umphatsiswa welitiko letekuphepha kwemphakatsi kuvikeleka nekuchumana eMpumalanga, Jackie Macia, utsi balibhekisa eSchoemansdal kumasipala weNkomazi namuhla kuyohlanganisa emehlo nemndeni waleliphoyisa lelidutjulwe labulalawa kuleyandzawo. Macia uphindze wacela bashayeli kutsi bacaphelisise nabahamba emgwacweni kulandzela kushona kwebantfu labatsatfu engotini letintsa timoti letinyenti lapho kuhlukana khona imigwaco iN4 neN12 eMalahleni. 

Lelinye lemabhange lamakhulu kuleli likhiphe umbiko lomayelana nekwenyuka kwesibalo sebantfu lebatsenga kudla lokuphekiwe etitolo pheceleti ema-take aways. Lombiko utsi bantfu labahola imali lengu-60 000 bacitsa cishe inkulungwane yemaRandi ngenyanga kutsenga lokudla besekutsi labo lebahola imali lengu-20 000 bavame kusebentisa R467 ngenyanga. Umsunguli wesikhungo lesicwayisa ngekulndvolotwa kwemali iThe BigR Solutions, Umnumzane Saubrey Tshabalala utsi ngetulu kwekutsi ema-take aways amosha imali, aphindze abe yingoti emphilweni yemuntfu.

Inhlangano iSourthen African Freelancers' Association (Safrea) itsi usasemkhulu umsebenti wekucinisekisa kusekelwa nekumelela labasebenta ngekutimela kulesigodzi lesisentansi neAfrica. Sihlalo we-Safrea, Nathi Gule utsi kunyenti bantfu labangakuzuza ikakhulukati ema-freelancers ngekujoyina lenhlangano.

Namuhla lelive litawube libambe imicimbi yekubungata lilanmga labomake. Umcimbi wavelonkhe wekubungata lelingana utobanjelwa enkundleni yetemidllao eNkowankowa, eTzaneen esifundzeni sase Limpopo lapho kulindzeleke mengameli Cyril Ramaphosa, kutsi  etfule inkumo yelusuku. Kantsi nalesifundza se Mpumalanga sitawube sibambe waso umcimbi wesifundza e Sydney Choma Banquet Hall, eMiddelburg. Kepha kuva kabanti ngalomcibi wesifundza, asamukele umphatsiswa wetemasiko, temidlalo netekukhibika eMpumalanga, Leah Mabuza.

Inhlangano lebuke kusebenta kwemaJaji, iJudges Matter itsi lokucokelwa esikhundleni selisekela lenhloko yemajaji akuleli, kwa-Jaji Dunstan Mlambo, kutawuhlomulisa kakhulu tebulungiswa kulelive.  Sicocisana naye Deputy Chief Justice Mlambo.

Umcondzisi jikelele wetindzaba temvelo kulesifundza seMpumalanga uchaza kabanti ngemcimbhi wekuklomelisa labo labafaka sandla ekongeni imvelo

Umbhali wemabhuku ebantfwana Refiloe Mohlaoli ukhutsata batali kutsi bacinise sandla ekucinisekiseni kutsi bantfwana bayafundza.