Namuhla indvuna yetetimali Enoch Godongwana kulindzeleke etfule luphakelotimali lwalomnyaka wa-2026, ngensimbi yesibili emini. Sicocisana nemcwaningi wetemnotfo khona lapha ka SABC, Velemseni Mthiyane ngalesingakulindzela kulenkulumo.

Umphatsiswa welitiko letekulima, kutfutfukisa tindzawo tasemakhaya, temhlaba kanye netindzaba temvelo kulesifundza se-Mpumalanga, Khethiwe Moeketsi utsi lelitiko lenta konkhe lokusemandleni kucinisekisa kungabhebhetseki kwesifo sematele. Loku kuta ngemuva kwekutsi bafuyi lebakhicita inyama lebovu bacwayise ngekutsi bantfu batilungiselele kubukana nesimo sekuswelakala kwemikhicito yekudla lokwentiwe ngelubisi ngenca yalokubhedvuka kwesifo sematele. Umphatsiswa Moeketsi uyasichazela.

Tisebenti tembuso letingaphasi kwenyonyane yetisebenti i Cosatu betimashele emahhovisi esikhwama semshwalensi wetemphilo i-GEMS tikhala ngekwenyuswa kwetindleko tale-Medical Aid. Kukhuluma kabanti ngalendzaba asemukele sihlalo weCOSTU eMpunalanga, Thabo Mokoena.

Takhamuti tase-Mashiyane, dvute nase-Low's Creek kulesifundza seMpumalanga, letitfukutsele tigane lunwabu, tivale umgwaco iR38, namuhla. Mthobisi Mkhaliphi uyabika..

Bamangalelwa laba-10 kulelicala lenkhohlakalo yemali lelinganiselwa ku-R113 million wemarandi etikweni letemfundvo kulesifundza se Mpumalanga bakhululwe ngebheyili enkantolo yamantji eNaspoti. Labamangalelwa bafaka ekhatsi lowabamba njengenhloko yelitiko letemfundvo Jabulani Nkosi. Kutfola kabanti ngetakamuva simeme intsatseli yetfu Michael Mdluli .

Libambela leNdvuna yetemaphoyisa Firoz Cachalia umemetele ngemacebo ekusungula luhlelo lolwatiwa nge-National Community Patroller ngenhloso yekwelekelela kutfutfukisa tekuphepha emiphakatsini. Cachalia wente lesimemetele ngelesikhatsi etfula tibalo tebugebengu tekota yesitsatfu ePitoli, ngaLesihlanu londlulile. Kukhuluma kabanti ngaloluhlelo loluhlongotwako, asemukele Dr Mxolisi Mathebula losati setindzaba tebugebengu.

I Iran ivakalise kutsi iyafuna kugoba luphondvo mayelana nendzaba yetikhali te-Nuzi (Nuclear weapons), kute igweme kuhlaselwa masotja ase-Melika. Kuleliviki leliphelile mengameli waseMelika Donald Trump, utsite nangabe i-Iran itawuchubeka nekucinisa inhloko kuloludzaba, italutfota lolumanti. Simeme umhlatiyi wetimbangave, Umnumzane Sandile Swana kutobuka naye lendzaba.

Bosomnotfo batsi kumcoka kutsi bantfuphaca bafundziswe ngeluphakelo timali ngekutsi luyini futsi lubaluleke ngani. Sikhulumisene nasomnotfo lotimele umnumzane Mandla Malope.

Lisekela laNkomishana wemaphoyisa lomisiwe Lt-Gen Shadrack Sibiya uphikile kutsi watfola imali kanye netipho kuVusimuzi "Cat" Matlala losolwa ngelicala lekubulala. Simeme sati setindzaba tebugebengu Dr Mxolisi Mathebula.

Bavele enkantolo yamantji yase Mbombela basolwa lababukene nemacala ekukhwabanisa etikweni letemfundvo kulesifundza se Mpumalanga. Labasolwa babukene nemacala lafaka ekhatsi kukhwabanisa, inkhohlakalo kanye nekuhweba ngemali lengcolile, lapho kusolakala kutsi bancutsa imali lengu 113 million wemarandi lebekufanele isetjentiswe ekuvuseleleni takhiwo etikolweni letingu 21. Kutfola kabanti kutsi kuhambe njani enkantolo sikhulumisana nentsatseli yetfu Michael Mdluli.