Ndvunankhulu wase Mpumalanga Mandla Ndlovu utsi litiko letemfundvo kulesifundza alizange lilandzele tindlela letisemtsetfweni ngesikhatsi litsenga ema-laptops langema-22 ngemali letigidzi letimbili temaRandi. Ndvunankhulu bekakhipha umbiko weluphenyo lolwentiwa ngelokutsengwa kwalama-laptops. Kuva luhlangotsi lwabothishela, simeme mabhalane we-SADTU eMpumalanga, Umnuzane Walter Hlayise.

 Lisuliwe licala lekubulala lebelibekwe make wase Mpumalanga Kapa loneminyaka lengu 44 lobekasolwa ngekubulala indvodza leneminyaka lengu 65 , lebekayisola ngekugagadlela indvodzakati yakhe lekhubatekile. Lomake uvele kancane enkantolo yamantji e Lady Frere ngemva kwekutsi aboshwe aphindze akhululwe nge bheyili ya R500 kulenyanga lephelile. Nga-2019 lomunye make, Nokubongwa Qambi naye licala lakhe lahociswa ngemuva kwekutsi abulale yinye yemadvodza lawatfola agagadlela indvodzakati yakhe. Kutosichazela kabanti ngekusebenta kwemtsetfo nekutsi inkantolo ifika njani kuletincumo, sicelele ummeli Bongani Matsane longumsunguli nemphatsi wenkapani yebameli i-Matsane Attorneys.

Umhlaba wonkhe ugubha lilanga lekuchushisa ngesifo sesifuba iWorld Asthma Day. Lelilanga legujwa njalo ngemnyaka ngaLwesibili wekucala enyangeni yeNkwekhweti. Kukhuluma ngalesifo simeme lomelele litiko letemphilo eMpumalanga, Sara Gumede.

Hulumende utsi utibophelele ekutseni yabiwe ngalokulinganako lemali lengu-R100 billion ngaphansi kwesikhwama iTransformation Fund.  Indvuna yelitiko letekuhweba netimboni Parks Tau utsi lesikhwama sihlose kunonophisa kuhlanganyela kwemabhizinisi alabamnyama emnotfweni walelive ngekutsi balekelelwe ngetimali kanye nangemakhono. Kutfola kabanti ngalesikhwama i-Transformation Fund, sikhulumisana nasomnotfo longumphatsi we-INkunzi Wealth Group, Owen Nkomo 

Sihlalo we- DA Hellen Zille utsi umtsetfo locinisekisa kucasha ngekulinganisa emsebentini, Employment Equity Act (EEA) uyabandlulula futsi uphambana nemtsetfo-sisekelo.  Lenhlangano imikisa loludzaba enkantolo lenkhulu ePitoli namuhla iphikisana naletichibiyelo letihlongotwa kulomtsetfo. Kukhuluma kabanti ngalomtsetfo simeme umhlatiyi wetemnotfo Bukani Mngoma.

Licitsiwe licala lamake loneminyaka lengema-44 budzala wase-Frere esifundzeni seMpumalanga Kapa, lobekasolwa ngekubulala indvodza leyagagadlela umntfwana wakhe lokhubatekile. Nomzwanele Mngoma uyasibikela.

Inyonyana yetisebenti iNEAWUSA seyivakalise kukhatsateka ngenkapani yabologadza lesolwa ngekungabhadali imali ye-UIF kanye ne-Provident Fund. Kukhuluma ngalendzaba sikhulumisana nemholi wenyonana iNEAWUSA,  Jomo Maswanganyi

Inhlangano yeEFF kulesifundza seMpumalanga itsi iyawemukela lombiko lokhishwe nguNdvunankhulu Mandla Ndlovu lomayelana neluphenyo belusukunyiswe ngekutsengwa kwema-laptops langema-22 ngemali lalinganiselwa etigidzini letimbili temaRandi. Sihlalo weEFF eMpumalanga Collen Sedibe uyachaza.

Sicocisana nentsatseli yetindzaba kaSABC Calvin Dludla kutokhuluma ngekuhambela kwakhe umndeni wentsatseli Aserie ndlovu lowanyamalala mhla ka-18 iNdlovana akanye nemlingani wakhe Zodwa Mdluli. 

Umkhakha wetekuvakasha kulesifundza seMpumalanga uhlomule kakhulu ngekubanjwa kwemcimbi lomkhulu wema-Metro FM Music Awards 2025.  Sihlalo we Southern Africa Tourism Services Association (SATSA), Oupa Pilane, utsi imicimbi yaloluhlobo iphindze ifukule umnotfo waseMbombela nemaphetselo. Utsi kuyabatfokotisa kuva kutsi lesifundza sikhulumisana nalomsakato ngenhloso yekuchubeka nekuletsa lomcimbi kulesifundza njengoba bewuwekugcina kulomnyaka ngekwesivumelwano lesikhona.