Ofresemos un omenaje a la eskritora Ana María Matute a sien anyos de su nasimiento (26 de Julio de 1925). Ana María Matute, Akadémika i Eskritora, Premio Miguel de Cervantes 2010, fue la tresera musher en ingresar en la Rae (Real Academia Española)en 300 anyos. Meldamos un kuento de la autora ke traduisimos al sefardí "El mar" (La mar) kon un profundo mesaje. Kurunamos el programa kon la nana tradisional "Durme, durme ermozo ijiko" en la interpretasión de Janet & Jak Esim.

Ana María Matute, la ninya asomvrada del legado literario eterno.

La importansia de la edukasión i su reflekto en la tradisión sefardí. Konversamos kon Andy Faur, sosiólogo, Ravino laiko i edukador kon orijines sefardim ke desde Israel, mos aserka una visión para la vida, edukando i konosiendo la esensia de las ensenyanzas en el djudaísmo. Tokamos los puntus sovre la valor de konservar la lingua i tradisiones sefardim. Kurunamos el programa kon el ermozo kante tradisional "Una noche al lunar" en la interpretasión de la kantadera Marlène Samoun.

La tradisión i la lingua sefardí se deven kontinuar dando a konoser en Sefarad i en el mundo por entero: muestro lavoro

Los diferentes manaderos son inspirasión, para poder konservar i kontinuar meldando muestra lingua, pero es de destakar ke la importansia es ensenyar, avlar i konversar en muestra lingua. En este kapitoló Paloma Díaz-Mas, Catedrática de la Rae, Licenciada en Filología Románica y Periodismo, ke es una gran espesialista en la lingua, literaturas i istoria sefardí, mos ofrese konseshos para konservar la lingua en sus distintos metods. Autora de tekstos komo "Breve Historia de los Judíos de España" o su afamado livro "Poesía Oral Sefardí" siempre mos trasmente su saver i sus konosensias sovre la temátika del avenir de la lingua. Kreyemos ke la importansia es kontinuar avlando i meldando en muestra lingua i ensenyar. Kurunamos el programa kon el ermozo kante tradisional d'amor "La serena" en la interpretasión de Esther Ackermann.

Vos azemos musafires en la "Kuzina de Luz de Sefarad", kon una savurida recheta orijinal sefardí. La tradisión ke pasa de madres a ijas, de Nonas a enyetas se reflekta en la kuzina kon las rechetas ke guadraron las famyias, rikas kumidikas ke ermozean la tradisión partajadas i enrikesidas kon los savores de los paízes onde van a morar los djudiós espanyoles. Kompartimos una recheta muy buena ke puede aparejar toda la famyia "Keftes (alvóndigas) de pishkado". Kurunamos la mesa i el programa kon la kolor i savor del kante "Los guisados de las berendjenas" en la interpretasión de Mónica Monasterio.

Inaugurasión i vishita a la Ekspozisión La Conspiración judeo-masónica. La construcción de un mito. Organizada por la Secretaría de Estado de Memoria Democrática y Centro Sefarad-Israel. Vos azemos musafires en esta ekspozisión sovre la falsa konspirasión judeo-masónica, kon análiza del orijín, desvelopamiento i konsekuensias en la sosietá de uno de los mitos konspirativos más destakados de la istoria kontemporánea de España, una supozisión de atadura sekreta para destruir la nasión. La ekspozisión se disparte en: la fragua ideolójika del enemigo, el antisemitismo istóriko, la propaganda en kontra de masones i djudiós, el Tribunal Especial para la Represión de la Masonería y el Comunismo. Palavras i refleksiones de Leandro Álvarez Rey, Komisario de la Ekspozisión i Katedrátiko de Historia Contemporánea de la Universidad de Sevilla. Kurunamos el programa sintiendo el kante kontemporáneo "Las Yaves de Sefarad", de la autoría de Viviana Rajel Barnatán.

En Luz de Sefarad konversamos kon la Periodista Andrea C. Hurtado, kon estudios de Filología Semítica en la Universidad de Granada i Máster de Reporterismo Internacional en Rtve. Las linguas semítikas, una visión amplia sovre el estudio de linguas evrea i árave. Su idea para ambezar estas linguas i la eksperiensia de un viashe a Israel para aprender estas linguas tan interesantes. Kurunamos el programa kon un viesho provervio sefardí trokado en kante "Mazal" (Suerte) en la versión de la kantadera de Brasil, Fortuna.-

La Cumbre Erensya esta anyada se selevró en Sefarad, Madrid i Toledo del 9 al 11 de Junio. Erensya es un enkontro ke akontese en distintas sivdades del mundo kada dos anyadas, i ke adjunta a presonalitades i Profesores dedikados a la kultura i lingua sefardí. Esta anyada se selevró en Madrid i Toledo, en el Instituto Cervantes de Madrid se ofresió el Akto Inaugural kon palavras de Luis García Montero, Director del Instituto Cervantes. Ansimezmo se ofresió un Kolokio Primero "El judeoespañol en el Siglo XXI" onde pudimos sentir palavras en djudeo-espanyol de Shmuel Refael, Secretario de la Academia Israelí del Ladino y Director del Instituto Salti para el Ladino de la Universidad Bar Ilan ke ofresemos a los oyentes. Kante sefardí "Tus ojicos" interpretado por Joaquín Díaz.

En Luz de Sefarad rekodramos el signifikado de Shavuot (semanas)esta importante festividad del kalendario evreo, onde el Dió entregó la Torá en el Monte Sinaí, ke selevramos esta semana. Te kontamos sovre la fiesta, onde la Ley fue eskojida por los djudiós para ambezarse. La Torá o Ley Djudía marka los preseptos ke devemos kumplir. Es kostumvre azer platos de dulsurias i salados kon leche, lákteos i se aparejan postres para partajar en famyia i kon amigos. Kante tradisional "La rosa enflorese" versión interpretada por el Grupo A Ballare.

¿Ke ay de igual i de diferente entre los platikos i kuzinas sefardí i la mozárabe? En Luz de Sefarad konversamos kon el musafir Chef i investigador de la Kuzina Sefardí Javier Martínez Zafra para konoser sovre la kuzina sefardí i la mozárabe, mos prezenta su muevo livro "Cocina mozárabe" aondando en estas tradisiones kon base en Sefarad. En la "Kuzina de Luz de Sefarad" konoseremos las diferensias en las leyes, modos de aparejar i los ingredientes i las tradisiones ke unen a estas kuzinas.

Kurunamos el programa kon un kante de la Turquía Sefardí "Una matika de ruda" en la versión de Janet & Jak Esim.

En Luz de Sefarad keremos destakar la importansia de la mueva kreasión en las kantikas modernas sefardim, ansí ofresemos konoser ermozas kantikas muevas en muestra lingua. El avenir (futuro) del kante sefardí es la boz de la mansevez unida a temátikas modernas i de siempre: l'amor, Sefarad, la musher, la natura. Kompartimos un enshemplo valutozo "¿Ondi stá la yave di tu corazón? kon letra del poeta Juan Gelman i la múzika i boz de Dina Rot. La puerta del kante kontinúa avierta en la kreasión kontemporánea sefardí.