Magazin da cultura

Per quest ultim Magazin da cultura dain nus in sguard en il futur... FUTUR – en Lumnezia in tema omnispreschent ils ultims mais

Dapi la stad passada han gì lieu en Lumnezia exposiziuns, occurrenzas, performances, simposis e festivals da musica – la dumonda communabla da las occurenzas: «Co vulain nus en il futur viver en questa regiun?» Cun Anne-Louise Joël, manadra da la Casa d'Angel a Lumbrein, guardain nus enavos sin quest project interdisciplinar.

Midadas tar il Magazin da cultura

Il midament è l'unica constanta! Uschia datti er tar RTR adina puspè adattaziuns e midadas da program. La schefredacziun ha decidì ch'i na dettia en il futur betg pli il Magazin da cultura. Ma munta quai che la cultura survegn pli pauca paisa tar RTR?

En in discurs tradescha noss schefredactur Flavio Bundi, tge ch'ha manà a questa midada da program.

Tips persunals

Damai ch'ils blers da nus èn dapli a chasa e forsa leds per ina distracziun, datti questa giada gist quatter tips persunals: per tadlar, per guardar, per leger u era per s'imaginar lunsch davent da l'agen canapé; en il Louvre a Paris.

Litteratura

Il nov crimi per uffants «Die Olympiahoffnung» da Daniel Badraun ans maina en il mund dal sport cun ses squitsch da success, cun ambiziuns e cun la problematica dal doping. L'autur engiadinais raquinta da Kati e Sven che vegnan implitgads en in cas criminal. Grazia a solidaritad, amicizia e lur nas fins rivan els da schliar l'engiavinera. Weitere Themen: FUTUR - in project d'art ch'ha gì lieu en Lumnezia - Discurs cun Flavio Bundi - Ils tips persunals dals 28 da mars - "Die Olympiahoffnung", in crimi per uffants da Daniel Badraun

Dapi intgins dis sa chatta la Svizra en il modus extraordinari. Fermamain pertutgà è il mund da la cultura. Nus avain discurrì cun artists ed instituziuns culturalas davart las consequenzas da la crisa per lur vita e lur manaschis.

Er sche la vita culturala è bloccada per almain las proximas emnas – i na dat nagin lockdown cumplet. Per intgins cuntinuescha la vita bain pli u main en il courant normal, per auters stat dentant l'entira existenza en dumonda. Nus avain rimnà emprimas vuschs tranter desperaziun, speranza e fatalissem – anc avant ch'il mund cumenza a s'ordinar da nov. Weitere Themen: La crisa: artists independents - La crisa: instituziuns culturalas - «Ventil» da Frank Baumann - Litteratura: "Innozenz" da Gion Mathias Cavelty

Uschenumnads coworking spaces èn adina pli dumandads. E quai betg mo da managers ed interpresas da start-up mabain era dad artistas. Ina da quellas è l'artista Cecilia Demarmels. La dunna oriunda da Salouf abitescha a Lucerna ed a Tavau. Cur ch'ella è a Tavau, n'ha ella betg in atelier fix sco a Lucerna, uschia ch'ella tira a niz in coworking space che daventa ses atelier temporar.

Avant tschintg onns è la dunna da 60 onns sa decisa da lavurar per l'emprima giada en sia vita plainamain sco artista libra. Il Magazin da cultura è sa scuntrà cun Cecilia Demarmels per discurrer davart sia lavur, sia decisiun da sa concentrar plainamain sin l'art e co ch'igl è da lavurar en in atelier temporar. Weitere Themen: L'artista Cecilia Demarmels, part 1 - L'artista Cecilia Demarmels, part 2 - Litteratura: ina nova publicaziun cun ditgas dal Grischun

Il pli nov e gia 6avel program da solo da Claudio Zuccolini porta il titel «DARUM». Propi vairas respostas sin ina pluna dumondas na porscha el betg. Persuenter ina pluna istorgias rimnadas ord la vita. Zuccolini festivescha quest onn 3 giubileums – el è maridà 20 onns, ha 30 onns surpaisa e festivescha quest atun ses 50avel. Forsa è gist quest anniversari il motiv ch'el è s'annunzià per far il New York Maraton l'atun proxim. En il Magazin da cultura raquinta Zuccolini davart umor e tge che na va insumma betg per el. Weitere Themen: Litteratura: «Die Silberne» da Regula Caviezel

Èn paraulas insumma anc relevantas en il temp da Netflix e Youtube? Il Magazin da cultura discurra cun ina raquintadra professiunala e visita ina saira da paraulas a Breil. Durant onns ha Anna Cathomas lavurà en il biro da ses um. Ma ina chaussa era adina clera: cun 50 na vuleva ella betg pli seser davos in computer! Ditg e fatg: ussa è ella dapi bun sis onns raquintadra da paraulas professiunala.

Dapi sia scolaziun sco raquintadra tar la fundaziun Mutabor, raquinta Anna Cathomas paraulas a pitschen e grond, en rumantsch e tudestg. Ils classichers n'èn dentant betg quai ch'interessescha ella, mabain paraulas pauc enconuschentas, da quellas che tschiffan e commuventan, da quellas che laschan viagiar la fantasia.

En la rubrica litterara preschenta Esther Krättli «Globi im Spital», novas aventuras da l'utschè blau cun las chautschas quadrigliadas. Weitere Themen: Anna Cathomas – raquintadra da paraulas - Visita ad ina saira da paraulas a Breil - «Von der Rolle» – in film documentar da Verena Endtner - La Reprisa: dapli daners per la promoziun dal rumantsch - Litteratura: La novas aventuras da Globi en l'ospital

En in chastè a Chiavenna tgira in dals pli lavurus picturs grischuns sia passiun – dador il radar da las scenas usitadas e feuilletons da gasettas. Temp per ina visita. Ils 7 da favrer ha Bruno Ritter retschavì il premi da renconuschientscha da la regiun Maloja. Il pictur, illustratur e cartoonist oriund da Schaffusa è vegnì avant 38 onns en la Val Bregaglia. Sapientivamain guntgescha el la scena d'art per avair uschia dapli temp per lavurar.

Tuttina n'è l'um da 68 onns betg in eremit. El s'interessescha per ils desideris, dubis e deblezzas da l'uman ch'el transfurmescha en ovras d'ieli, da rispli u da tusch. Ina gia regordan las ovras als maisters da la Renaissance, in'autra gia a cartoons or da gasettas da satira.

Nus avain inscuntrà Ritter en ses atelier malordinà a Chiavenna e discurrì cun el davart la fascinaziun per instagram, tge ch'in auto da posta ha da far cun muments religius e tge ch'ins po emprender da dilettants.

En la rubrica litterara sa fatschentain nus cun ina giubilara. Ils 25 da favrer festivescha Erica Pedretti ses 90avel anniversari. Nus dain in sguard sin l'ovra litterara da la scriventa ed artista. Weitere Themen: Bruno Ritter: in purtret - Bruno Ritter e ses maletgs - Tip persunal – Gilbert & George - Reprisa – Tonia Maria Zindel - Litteratura: La scriventa Erica Pedretti

Quest onn realisescha la Gruppa da teater da Valendau trais tocs teater. Ella è ina da las pli activas ed enconuschentas gruppas da teater da laics en Surselva. Quest onn pon els era festivar lur 40avel anniversari. Per il Magazin da cultura avain nus visità in'emprova per il toc che ha prest premiera, «Das Haus in Montevideo», la cumedia da Curt Goetz.

En la rubrica litterara discurrin nus da l'OSL «Tulpen/Tulipanas» da Leta Semadeni che vegn undrà quest onn cun il premi Guggenmos per lirica per uffants. Weitere Themen: Litteratura: Leta Semadeni survegn premi Josef Guggenmos

En circa 5 emnas èsi uschè lunsch: il gieu festiv «Der Fels und das Schwert» marca la fin da las lavurs da restauraziun da la baselgia claustrala S. Martin a Mustér. En paucas emnas vegn la baselgia claustrala Son Martin a Mustér a sa transfurmar en ina tribuna da teater. «Der Fels und das Schwert» è in toc scrit aposta per la finiziun da las lavurs da restauraziun e relata la legenda da Sigisbert e Placi, ils fundaturs da la claustra. Weitere Themen: «Der Fels und das Schwert» – 5 emnas avant la premiera - Not Soliva interpretescha la rolla dal diavel - «Heute Gemeindeversammlung» – il nov program solo da Mike Müller - Il Muzeum Susch vegn premià sco «construcziun da l’onn 2019» - Litteratura: Poesias rumantschas en la revista «Das Gedicht»

Il Magazin da cultura da questa fin d'emna va amez las producziuns dal film svizzer.

Producziuns da tut gener e premieras sin tuttas varts. En tut datti 178 films a Soloturn, e quai durant in'emna. Nus giain a premieras, s'inscuntrain cun aspectaturs e raquintain tge che capita durant ils 55avels Dis da film a Soloturn. Weitere Themen: La nova directura dals Dis da Film Anita Hugi - Il reschissur rumantsch Ivo Zenn - Esther Berther live dals Dis da film a Soloturn - Litteratura: Calender per mintga gi

Igl è ina pitschna sensaziun: Flurina Badel gudogna in dals Premis svizzers da litteratura 2020 per sia collecziun da poesias «tinnitus tropic». La dunna da 36 onns è pir la segunda autura cun in'ovra rumantscha insumma che vegn onurada cun questa distincziun. Il Magazin da cultura ha discurrì cun la poetessa, artista e schurnalista davart success e crisas sco er davart sia vita tranter Guarda, Vienna e sia atgna fantasia. Weitere Themen: Flurina Badel davart premis e poesias - Flurina Badel: in purtret - Reprisa: il nov album da Martina Linn - Tip persunal: «Platzspitzbaby» - Litteratura: Revista digl noss Sulom