Dapi passa 30 onns lavuran els ensemen: l'inschigner da punts Jürg Conzett e sia dunna, la construidra da models Lydia Conzett-Gehring. Omadus stgaffeschan ovras renconuschidas per lur inschign artistic, per lur premura per materialias e la raffinezza constructiva. Er en la Rumantschia ha il biro d'inschigners Conzett Bronzini Partenadis realisà e cunzunt renovà numerusas punts, davent da la Punt Russein dadens Sumvitg, sur la Punt da Versell a Tavanasa fin en la Viamala. Ussa mussan ils consorts intgins da lur projects en ina gronda exposiziun a Mendrisio. Ultra da quai vegn Jürg Conzett undrà quests dis cun in premi da renconuschientscha dal chantun Grischun, e quai gia per la segunda giada.

En la rubrica litterara preschentain nus «Die Reise zu den Zedern», nua che Iso Camartin va sin ils fastizs da questa planta biblica. Weitere Themen: Ils models da Lydia Conzett - L'inschigner Jürg Conzett - Tip persunal: L'Engiadina en la fevra da l'aua - Litteratura: «Die Reise zu den Zedern» da Iso Camartin und Verena Füllemann

Per ses project actual sa transfurma il chantautur romand François Vé en in «Francestg», en in «Francesco» ed en in «Franz»! El ha numnadamain decidì da scriver chanzuns en linguas svizras ch'el na discurra gnanc! Ma co scriv'ins ina chanzun en ina lingua ch'ins na discurra betg? Tge schanzas pon sa zuppar en quest «betg savair»? Pertge vegn in chantautur da la Svizra romanda insumma tuttenina sin l'idea da scriver en rumantsch?

En il Magazin da cultura tradescha François Vé ils detagls da ses project HELVETICA e da la turnea da 2 onns ch'el vegn a far cun velo. Weitere Themen: François Vé davart ses project HELVETICA - François Vé davart las sfidas linguisticas en HELVETICA - Tip persunal: duas exposiziuns deditgadas a la glina - La Reprisa: exposiziun e projects d’art en la Casa d’Angel - Litteratura: «Stein und Wein», in viadi en il mund dal vin svizzer

Ina dunna strusch enconuschenta, malgrà ch'ella è stada ina scienziada universala e feminista dal 17avel tschientaner – a Hortensia Gugelberg von Moos, naschida von Salis, vegn surdà per quest motiv ina femmage. Inizià ed organisà quest project ha Corin Curschellas. Quest'emna ha la producziun multimediala e musicala gì premiera en il Teater Cuira.

En la rubrica «I love you» preschenta Bettina Vital scenas d'amur en la litteratura rumantscha. Weitere Themen: Tip persunal – Jürg Halter e Hallo Chur - Hortensia unlimited – impressiuns da la premiera - Corin Curschellas ed Asa Stina Hendry davart Hortensia unlimited - Litteratura: «Litteratur'ed amur» cun Bettina Vital

Igl è in dals pli stgirs chapitels en l'istorgia grischuna: la persecuziun da dunnas sentenziadas a la mort sco strias. Sa basond sin in roman da l'istoricher Hubert Giger ha il reschissur René Schnoz sviluppà in toc da teater en il liber: «La Stria da Dentervals». Il gieu vegn preschentà quests dis en l'ambiente idillic da Sontga Gada sper Mustér. Il teater raquinta l'istorgia percunter tragica da la stria Onna pintga e quai sin fundament da funtaunas istoricas. Il Magazin da cultura ha discurrì cun Hubert Giger e René Schnoz davart sfidas e plaschairs da realisar in tal project - e nus dain in sguard mirveglius sin il toc. Weitere Themen: Hubert Giger e René Schnoz davart strias ed il teater - Impressiuns dal teater - Tip persunal: exposiziun da lavinas a Glion - La Reprisa: il dialect dal Brì

Tge pomai fa in Scot en Val Schons? Chantar e sautar e sunar la cornamusa – what else? Per ses concert annual ha il «Cor maschado Donat a danturn» envidà David Vivanco, in musicist da la Scozia, a collavurar.

Co èsi vegnì a questa collavuraziun exotica? Pertge n'è David Vivanco betg mo vegnì per ils concerts mabain ha era dà workshops da saut durant l'entira emna? E tge pomai è in cèlidh? Tut quai datti d'udir en il Magazin da cultura.

En la rubrica litterara preschenta Esther Krättli «Viceversa Literatur 13» – in annuari che s'occupescha era da la litteratura rumantscha. Weitere Themen: David Vivanco ed il «Cor maschado Donat a danturn» - David Vivanco e ses workshops da saut - Tip persunal: la «Stimmwerkbande» a Domat - La Reprisa: program da stad dal Festival cultural Origen - Litteratura: «Viceversa» annuari da las litteraturas svizras

Questa stad festivescha la Lia Rumantscha il giubileum da 100 onns. Il teater Tredeschin Retg è il punct culminant. Nus avain visità in dals emprims inscunters e discurrì cun acturs e cun il reschissur Manfred Ferrari. En il Magazin da cultura dain nus in'invista en las lavurs actualas

Era la producenta dal teater, Gianna Olinda Cadonau raquinta da sfidas e plaschairs en connex cun la festa a Zuoz.

En la rubrica cun litteratura per uffants preschentain nus novs OSLs cun poesias. Weitere Themen: Invista en ina da las emprovas dal teater Tredeschin Retg - Discurs cun Gianna Olinda Cadonau davart las festivitads. - Litteratura: novs carnets OSL

Quest'emna hai dà gronda onur per ils Fränzlis da Tschlin. Els èn vegnids undrads cun il Premi svizzer da musica – in premi che undrescha e renconuscha prestaziuns musicalas extraordinarias ed innovativas. Nus essan stads sin visita tar Domenic Janett ch'è dapi il 1982, pia dapi la fundaziun dals Fränzlis, da la partida.

En la Litteratura preschenta Bettina Vital scenas d'amur en la litteratura rumantscha. Questa giada è quai la poesia «Il musicant» da Tresa Rüthers-Seeli. Weitere Themen: Sin visita tar Domenic Janett - Sur da las midadas da la musica dals Fränzlis - Tip persunal - Litteratura: Bettina Vital davart litteratur'ed amur

Vi da tge pens'ins sch'ins auda il num Erica Pedretti? Vi da l'autura u vi da l'artista? Èsi insumma necessari da far questa differenza u èsi tar Pedretti uschia ch'ils mediums sa maschaidan? Il Magazin da cultura rapporta da la retrospectiva ch'è da vesair per il mument en il «Neues Museum Biel».

Sa fixada sin ina tecnica u materialia n'è Erica Pedretti mai: a Bienna pon ins uschia contemplar objects en argient, zin, filfier, gip, lain u arschiglia. Sper quests objects demussan era dissegns, gravuras e squitschs la multifariadad da l'artista che viva dapi intgins onns puspè en Engiadina. Weitere Themen: Retrospectiva d'Erica Pedretti a Bienna - Litteratura: «Ilg Vêr Sulaz da pievel giuvan» da Steffan Gabriel - Tip persunal: Weekly Jazz in Concert - La reprisa: Werner Steidle ed il chor da l'Academia Engiadina

Il Museum d'art a Cuira festivescha il giubileum da 100 onns – e quai cun ina retrospectiva in pau nunusitada: L'exposiziun «Ord la profunditad dal temp» na mussa betg highlights dals ultims 100 onns. Cun ovras pli veglias, dal temp avant 1530, vulan ils curaturs Peter Zumthor e Stephan Kunz mussar che l'art grischun è anc bler pli ritg. Documentà las sculpturas, frescas e mobiglias ha il fotograf Florio Puenter. Cun l'istoricher d'art Leza Dosch faschain nus ina visita a l'exposiziun e la reflectain er a moda critica.

En la rubrica litterara preschentain nus «La luffa» da Leo Tuor, in roman enconuschent en vestgì nov. Weitere Themen: Atras l'exposiziun cun Leza Dosch - Egliada critica sin l'exposiziun - Marina Lutz preschenta ses cudesch da caricaturas - La Reprisa: igl «Arcun da tradiziun» a Laax fa urden - Litteratura: «La luffa» da Leo Tuor

Super Mario, Call of Duty u Fortnite: Dar games tutga tar in dals hobis ils pli derasads en nossa societad. En l'America empleneschan turniers da gamers entirs stadions. En Svizra è la scena bler pli pitschna, dentant en grond moviment. I dat adina dapli «e-sportists» – co gamers professiunals vegnan numnads –, ed er il dumber da creaders da gieus crescha.

Il Magazin da cultura sa dumonda sche games èn ozendi da renconuscher sco in bain cultural – cun in'egliada en la pratica: Nus avain dà gieus cun Curdin Albin (35) da Cuira, in giugader da hobi passiunà.

En la rubrica litterara sfegliain nus en il cudesch «Poesias/poesia» dad Irma Klainguti. Weitere Themen: Sin visita tar Curdin Albin - La scena da games è en moviment - Tip persunal: «GRM Brainfuck» da Sibylle Berg - Reprisa: La Chasa alva a Mulegns vegn spustada - Litteratura: "Poesias/Poesie" dad Irma Klainguti