«Nachlese»: Uschia sa numna l'exposiziun actuala en la Chasa melna a Flem. Per quest'exposiziun han trais artists inspectà minuziusamain las restanzas dal territori da skis da l'Arena Alva. L'artista Ursula Stalder, il percussiunist Fredy Studer ed il fotograf Gaudenz Danuser ans mussan il potenzial creativ dal rument che sa zuppa sut la naiv. La curatura Carmen Gasser Derungs explitga, pertge che l'exposiziun na vul però betg moralisar e tge ch'ils lavurants da l'Arena Alva patratgan da l'exposiziun.

En la seria da la rubrica litterara davart ils chalenders rumantschs sfegliain nus en la «Revista digl noss Sulom». Weitere Themen: En la Chasa melna – Part 1 - En la Chasa melna – Part 2 - Cudesch da l'istorgia da l'Ovra electrica Lumbrein - Reprisa: Festival da Gourmet S. Murezzan

Dapi l'entschatta da l'onn è el avert – il Muzeum Susch. Là ha Grazyna Kulczyk bajegià durant 3 onns in museum per art contemporan. Da vesair èn ovras ord la collecziun privata da Grazyna Kulczik sco era ina exposiziun temporara cun il focus sin la dunna en l'art. Il Magazin da cultura fa ina visita al museum e s'inscuntra cun Grazyna Kulzcyk.

En la rubrica da la litteratura s'occuppa Esther Krättli cun ils chalenders rumantschs. Questa giada sfeglia ella en il Calender Romontsch. Weitere Themen: Tip persunal «Dis da film a Soloturn» - Impressiuns d'Esther Berther sur dal Muzeum Susch - In discurs cun la possessura dal Muzeum Susch Grazyna Kulczyk - Litteratura: Sfegliar en il Calender Romontsch 2019

Ch'i saja cun noss corp, en la lavur u schizunt en l'amur: dapertut vulain nus s'avischinar a la perfecziun. Da pitschen ensi vegni chatschà en noss chau: «bun n'è betg bun avunda» ubain «per sa megliurar ston ins patir».

En ses teater «Fitness – the art of being the best» sa fatschenta Jürg Gautschi cun questa mania da vulair esser «il meglier» u «il pli bel». La basa dal teater èn texts che Gautschi ha gì scrit per ils Impuls dad RTR - texts en ils quals il fin observatur sa dumonda, quant che nus essan pronts dad unfrir per empruvar dad esser «The Best».

En la rubrica litterara sfeglia Esther Krättli era quest onn en ils chalenders rumantschs; l'entschatta fa il «Chalender Ladin». Weitere Themen: Fitness e teater – pli sumegliants che quai ch’ins crai? - Impressiuns dal toc «Fitness – the art of being the best» - «Cold War» - tip persunal dals 5 da schaner - La Reprisa: Origen preschenta ses nov project entitulà PATRIA - Litteratura: Sfegliar en il chalender Ladin 2019

Radiotelevisiun Svizra Rumantscha guarda enavos sin il 2018. En il focus na stattan dentant betg schabetgs, mabain persunas.

Era il Magazin da cultura ha fatg ina schelta dad intginas testas 2018 – tut dunnas ch'èn stadas activas en il sectur cultural. Ch'i saja ina mecena polaca che vul far or d'in vitg engiadinais in Mecca d'art ubain dunnas ch'han survegnì quest onn in premi per lur art, ubain testas en connex cun tops e flops ord la cultura: il Magazin da cultura guarda enavos sin ses 2018 e spera ch'era il 2019 vegnia ad esser gist tuttina interessant. Weitere Themen: Retrospectiva 2018 – Susch duai daventar in Mecca d’art - Retrospectiva 2018 – Testas premiadas en il 2018 - Retrospectiva 2018 – retrospectiva litterara - Retrospectiva 2018 – il flop ed il top dal 2018

Onn per onn è l'agenda da Judith Scherrer pli che plaina durant il temp d'advent e da Nadal. Onn per onn chanta ella oratoris e «Claras notgs», quai senza mai vegnir unfisa. Onn per onn sa legra ella da regalar musica al public.

En il Magazin da cultura taidla Judith Scherrer musica da Nadal. Ella sa regorda da veglias chanzuns popularas rumantschas, ella sa dumonda quantas giadas che las paucas dal «Jauchzet, frohlocket!» han gia fatg vibrar ella ed ella tradescha tge ovras ch'occupeschan ella durant quest Nadal 2018.

En la rubrica litterara preschenta Clà Riatsch lura per l'ultima giada ina «preziusa litterara». Weitere Themen: Tip persunal per tranter Nadal e Bumaun: Ina visita en il museum - Litteratura: Clà Riatsch davart il Nadal tar Oscar Peer - «Clara Notg!»

Mintgatant datti casualitads che mainan ins tar ina persuna. Uschia èsi stà cun l'actur da professiun Kaspar Weiss.

Actualmain è el da vesair en il film da kino «Wolkenbruchs Reise», en il teater e fitg savens en reclamas da televisiun. Ch'el saja da linguatg matern rumantsch, scriva el en sia biografia online. Uschia essan nus la finala s'entupads, dentant senza vairamain discurrer rumantsch. E pertge?

En il Magazin da cultura discurra era l'artist Jon Bischoff sur da sias illustraziuns per il chalender d'advent fatgas per RTR, illustraziuns pointadas e magari murdentas.

En la rubrica cun cudeschs preschentain nus «Blick – Rückblick», in sguard sin l'ovra da la vita da l'artista Gielia Degonda. Weitere Themen: L'actur Kaspar Weiss e ses lioms cun il Grischun - l'illustratur Jon Bischoff sur dal chalender d'advent - Tip persunal - Stiller Has - Litteratura: Monografia davart l'ovra da sora Gielia Degonda

Ils 8 da december avra il museum d'art a Cuira l'exposiziun annuala dals artists grischuns. Cun quest'exposiziun – tant tradiziunala sco populara – porscha il museum ina revista da l'onn artistic en il Grischun. Er quest onn sa radunan artists naven da Surrein, Sent u New York en las hallas sontgas a Cuira. Stephan Kunz, co-directur dal museum d'art, lubescha in sguard davos las culissas e tradescha co che la schuria selecziunescha las lavurs davos portas serradas – e natiralmain ans interessescha tge ch'i dat da vesair quest onn.

En la rubrica litterara preschentain nus il nov Tschespet cun istorgettas da l'anteriur advocat e cusseglier guvernativ Donat Cadruvi. Weitere Themen: Stephan Kunz davart l'exposiziun - Discurs davart l'exposiziun - Cularta – in nov center da cultura a Laax - Litteratura: «Verdads cun in surrir» da Donat Cadruvi

Il mintgadi da Fabio Hendry è sviluppar products. Quella lavur fa el a Londra, nua ch'el tschertga adina novas furmas da producziun e novs materials. Questa fin d'emna po el prender encunter il premi da promoziun «prix netzhdk» da la Scola auta turitgaisa dals arts. Cun sia lavur en ses studio «ilio» a Londra ha il giuven Tuatschin persvadì la giuria. Nus ans inscuntrain cun Hendry durant sia visita a Turitg.

En la rubrica cun cudeschs per uffants preschentain nus il segund tom cun otg novas aventuras da «La famiglia Babulin» da Flurina Plouda. Weitere Themen: Fabio Hendry - il designer da products - Purple nights - in discurs cun Flavio Tuor - Tip persunal - Litteratura: "La famiglia Babulin" da Flurina Plouda

Guido Baselgia è in dals impurtants fotografs-artists en il Grischun. El è enconuschent per sias ovras misteriusas che mussan las cuntradas las pli extremas da noss planet, sco per exempel glatschers, guauds tropics u lais setgentads.

Actualmain mussa la Gallaria Loewen a Cuira ina selecziun da l'ovra da Baselgia, per uschè dir ina «tour d'horizon» dals ultims 20 onns. Il Magazin da cultura ha fatg ina visita a l'artist en ses atelier a Malans e discurrì cun el sur da sia lavur, da Socrates e la fin dal mund.

En la rubrica litterara preschentain nus il roman «Ils ventganov da settember» da Benedetto Vigne, in'istorgia apparentamain criminala plain fintas e fastizs faus. Weitere Themen: Discurs davart Guido Baselgia e sia ovra - Sin visita tar Guido Baselgia - Tip persunal: A Single Year - Litteratura: «Ils ventganov da settember» da Benedetto Vigne

Dapi l'emprim mument ch'els han vesì in l'auter èn els stads inseparabels. Il duo «Blumenthal & Stadelmann» raquinta da sia vita sin e sper tribuna.

Emprendì d'enconuscher in l'auter han els a la scola da teater. I saja stà «amur platonica sin l'emprim'egliada». Per il mument lavura il duo vi da ses nov toc entitulà «Liverpool». Quest toc duai esser in omagi ad amicizias profundas ma era ina referenza a tut quels e quellas che gughegian da viver lur passiun, malgrà difficultads e sacrifizis! Il Magazin da cultura ha visità ina da las ultimas emprovas avant la premiera e discurra cun ils acturs davart lur amicizia ch'els numnan «in'amur per la vita». Weitere Themen: «Blumenthal & Stadelmann» – cumbinar art ed amicizia - Il duo «Blumenthal & Stadelmann» davart ses nov toc - Film documentar sur dad Astrid Lindgren - Litteratura: «La scuvierta da l'orma» da Selina Chönz