Dapi sia uffanza passenta Antonia Bertschinger sias vacanzas a Bravuogn. Pia betg surprendent ch'ella ha elegì il Grischun sco lieu d'acziun per sia trilogia «Bergünerstein». Ses raquint na purtretescha dentant betg in'idilla muntagnarda, mabain guerra, assassinats e dispitas!

Per ses emprim roman ha Antonia Bertschinger prendì per mauns ina vaira sfida: scriver ina trilogia bargunzegnera che cuzza bun in tschientaner e ch'illustrescha tranter auter las trais emprovas da bajegiar la via tras il «Crap da Bravuogn» e la vita da mintgadi en il Grischun dal 17avel tschientaner.

Regularmain preschenta Bettina Vital scenas d'amur en il Magazin da cultura. Questa giada è quai il one night stand litterar or da «La runa» da Cla Biert. Weitere Themen: Antonia Bertschinger e sia trilogia «Bergünerstein» - Tip persunal: l’artista svizra Livia Rita - La Reprisa: 100 onns Museum d’art dal Grischun - Litteratura: Bettina Vital davart litteratur'ed amur

Kerstin, Clara, Nadina, Angela, Daniel, Chiara, Manuela, David ed anc blers auters. Ma tgi èn els e tge fan els durant l'entir di en Chasa Rumantscha - tar la Lia Rumantscha?

100 onns engaschament per la lingua e la cultura rumantscha, questa lavur dovra persunas che lavuran di per di per questa finamira. Nus avain visità ellas e laschà raquintar da lur lavur dal mintgadi.

En la litteratura dal Magazin da cultura porscha Esther Krättli impressiuns da la fiera dal cudesch d'uffants a Bolgona. Weitere Themen: Sin visita tar la Lia Rumantscha - las fatschas davos quest num - Tip persunal - Concert dal Chor viril Lumnezia - Litteratura: Fiera dal cudesch per uffants a Bologna

Per ils ins è el in provocatur garmadi, per ils auters in innovatur scharmant. Christian Jott Jenny, 40 onns, è chantadur-tenor, cabarettist, fin dacurt manader dal Festival da Jazz da San Murezzan, e dapi trais mais president communal da San Murezzan. Detg curt: Jenny è in sautunz sin pliras tribunas. Nus discurrin cun il debuttant politic, tge che la politica sa emprender da l'art, daco che chantar dat confiert en il mintgadi birocratic e tge ch'i dovra tenor el per dar nov schlantsch al hotspot turistic.

En la rubrica litterara preschentain nus «Crescher e madürar» da Flurinda Raschèr, l'istorgia dina dunna che sa vesa sez sco feminista. Weitere Themen: Jenny: l'artist che fa politica - Jenny e San Murezzan sco lieu da viver - Els kinos: «Eisenberger» da Hercli Bundi - Litteratura: «Freischwimmen/Crescher e madürar» da Flurinda Raschèr-Janett

Adina puspè purtretescha il Magazin da cultura pèrs che cumpartan tant lur vita privata sco lur vita d'artists. Questa giada vegnan Claudia Carigiet e Jürg Kienberger a pled. Emprendì d'enconuscher han els il cumenzament dals onns otganta: Jürg Kienberger serviva en in café, nua ch'el sunava era clavazin e Claudia Carigiet era a la tschertga d'in pianist per in project da teater. Il rest è istorgia! En il Magazin raquintan ils dus passiunads da teater da las sfidas e schanzas dal colliar art ed amur.

La rubrica litterara preschenta « La Calamita », in thriller misterius cun ina protagonista pulit speziala. Weitere Themen: Claudia Carigiet e Jürg Kienberger davart il colliar art ed amur - Davart il toc «eingerockt und ausgesungen» - Ovras da Laura Bott da vesair a Lugano - La Reprisa: la galaria OKRO crescha - Litteratura: "La calamita" nov en rumantsch

Mai avess Annina Schwarz pensà ch'in da ses maletgs vegniss exponì en in museum. Uss è quai tuttina realitad: Il Forum Schlossplatz ad Aarau mussa actualmain in'exposiziun collectiva davart armas en l'art. Tranter autras ovras è exponida er ina buis recamada en launa che Annina Schwarz aveva creà avant 13 onns. La buis, sco simbol masculin en ina tecnica connotada cun lavur da dunnas, è per l'artista da 39 onns in statement feministic.

Nus avain discurrì cun ella davart sia buis recamada, uffants che creeschan monsters e pertge che la feminista sa senta bain en cumpignia da chatschadurs sursilvans.

En la rubrica cun cudeschs per uffants preschentain nus in nov OSL cun l'istorgia da Kaua, in mat che na vul betg giugar cun ils auters uffants. Weitere Themen: L'istorgia da la buis dad Annina Schwarz - Purtret dad Annina Schwarz - Stalla Madulain: «Chapel of Remorse» da Jani Leinonen - Il bargunsegner en la nova gasetta per Bravuogn-Filisur - Litteratura: il nov OSL "Ina cullina per Kaua"

Avant onns, cura ch'il reschissur Markus Fischer ha legì il roman «Die Dunkelheit in den Bergen» da Silvio Huonder è el immediatamain stà persvadì: quai pudess dar in film da kino epic!

Sche tut fiss ì tenor plan, lura fiss quest film ussa en ils kinos. Ma suenter in start cun bler entusiassem da tuttas varts, ha il project la finala fatg naufragi pervia da la finanziaziun.

Per ina giada na rapporta il Magazin da cultura pia betg dad in project en planisaziun u finì, mabain dad ina visiun ch'è ida da l'aua giu.

U èsi forsa mo partida remessa e Markus Fischer vegn insacura tuttina anc da realisar quest crimi grischun? Weitere Themen: «Die Dunkelheit in den Bergen» - in western grischun? - Pertge n’è il film tuttina betg vegnì realisà? - Bettina Vital cun «Litteratur'ed amur» - «Onn per onn pli paucs» – il nov film da Bertilla Giossi - La reprisa: in’ediziun bilingua cun poesias dad Irma Klainguti

In mez onn ha Fabrizia Famos passentà en la metropola pulsanta da Cairo. Avant paucas emnas è ella turnada. En la bagascha: dunsainas da squitschs e maletgs. Sias ovras, inspiradas da la cultura araba, preschenta l'artista uss en la gallaria da la citad da Cuira. Il Magazin da cultura ha discurrì cun l'artista oriunda da Ramosch davart il smog, satgs da plastic – e sumeglientschas nunspitgadas tranter l'Engiadina e l'Egipta.

En la rubrica litterara preschentain nus «Kec & frajas», in cudesch plain surpraisas e vardads intimas da l'artist Not Vital. Weitere Themen: Visita a Fabrizia Famos en l'exposiziun - Discurs davart l'exposiziun da Fabrizia Famos - La Giaglina Ida ed il Stgilat Pilat - Reprisa: Trenament per «La stria da Dentervals» - Litteratura: "Kec' & frajas" da Not Vital

Martin Pfister da Vuorz ha chattà ils onns 70 ed 80 il plaschair vi da filmar cun ina camera da film 8 mm. Quai ha el fatg bler e cun gronda precauziun, oravant tut en ses vitg nativ Vuorz. Filmà ha el la vita quotidiana da quest temp.

Ussa èn tut ses films en la Biblioteca chantunala. Els èn vegnids digitalisads e conservads, ed els èn era accessibels a la publicitad. Christian Brassel da la Biblioteca chantunala raquinta dal project audiovisual che la biblioteca ha lantschà per intermediar la varietad culturala sin fundament da blers films da privats ed instituziuns rimnads durant plirs onns.

En la litteratura preschentain nus l'ovra dad Andri Perl che survegn il Premi grischun da litteratura 2019. Weitere Themen: Christian Brassel davart films istorics - Martin Pfister ha filmà bler durant ils onns 1970/80 a Vuorz - Tip persunal - Litteratura: Premi grischun da litteratura per Andri Perl

Quest magazin cuntegn dus temas principals: il giubileum da 30 onns da la Filarmonia da Chombra dal Grischun e la stad che l'artista Ester Vonplon ha passentà en l'Arctica.

Dapi trais decennis ha il Grischun ina filarmonia da chombra. En il Magazin da cultura tradescha sia presidenta Jacqueline Giger Cahannes detagls dal program da giubileum. Cun ella guardain nus dentant era en il futur e discurrin da las sfidas, cun las qualas in tal orchester è confruntà ozendi.

En la segunda part dal magazin bandunain nus lura il Grischun: en il 2016 ha l'artista Ester Vonplon passentà ina stad en l'Arctica. Da quest viadi è ella turnada cun ovras ch'ella expona ussa en la galaria Cularta a Laax.

En la rubrica litterara preschenta Esther Krättli «Cu mia olma ha priu cumiau» da Theo Candinas, in'ovra che l'autur descriva sco «sia ultima». Weitere Themen: 30 onns Filarmonia da Chombra dal Grischun - Ester Vonplon expona en la Cularta a Laax - Elina Duni vegn a Glion al “Jazz sil Plaz” - La reprisa da l'emna: in film da gangsters a Cuira - Litteratura: "Cu mia olma ha priu cumiau" da Theo Candinas

Ils Dis da film a Soloturn van a la tschertga da las grondas dumondas dal senn.

Blers dals films che vegnan preschentads quest onn sa fatschentan cun grondas dumondas da la vita. Il Magazin da cultura è era questa giada al festival e rapporta directamain da Soloturn.

En la seria davart ils chalenders rumantschs sfegliain nus en il «Calender per mintga gi». Weitere Themen: La reprisa - Impressiuns dad Esther Berther davart l'avertura dals Dis da film - Esther Berther davart ils films «Tscharniblues 2» ed «Architektur der Unendlichkeit» - Discurs cun Marco Brazerol da Filmcoopi Zürich - Il tip persunal - Noss chalenders – Oz: il «Calender per mintga gi»