Óli Jacobsen vaks upp í umhvørvi, har Føroya Fiskimannafelag søga tess høvdu týdning. Frá barnsbeini hoyrdi Óli um Símun Paula Konoy og teir ungu gøtumenninar, sum fingu fiskimenn um landið at stovna felag at røkja síni áhugamál. FF kom í lag í 1911. Sáttmáli varð gjørdur í 1912 og var tann fyrsti á føroyska arbeiðsmarknaðinum.

Í skúlanum í Gøtu hekk ein mynd av norðagøtu-manninum Hans Jákupi Havstreym, sum júst var valdur til formann í FF, tá hann gekk burtur við "Immanuel" í 1932. Óli Jacobsen gjørdist formaður í 1971, tá hann vann á Erlendi Patursson.