Die Sjinees wat by die stropers betrokke is, blyk ook 'n loerbroer te wees wat vir Josephine dophou. Josephine vertel van 'n vernederende ervaring op Cornelius se suiwelplaas. Gerrit erken dat hy dolverlief is op Adel.

Adel kom na Duikerbaai om snags saam met Gerrit waarneming te doen. Sy wil bepaal waar die perlemoen aan land kom. Gerrit vind uit dat die stropers se lone op Sondae afgelewer word en dat 'n Sjinees dit aan Skipper Lee oorhandig. Hulle agtervolg hom en vind uit dat hy van 'n uitkykpunt bokant Duikerbaai af foto's neem.

Adel flankeer met Gerrit en probeer om hom te oortuig dat die perlemoen êrens strand toe kom. Cornelius nooi Josephine om sy suiwelplaas te besoek, en Chris demonstreer sy nuwe hommeltuig waarmee hy op die moederskip van die stropers wil spioeneer.

Gerrit wil die stropers se moederskip aanval, maar Chris maak 'n veiliger voorstel. Josephine spog by die dames oor 'n nuwe, ryk en spoggerige kêrel. Skipper Lee dreig vir Gerrit om weg te bly van die twintigmylbank op see, waar die vistermanne hulle eie regstelsel toepas.

Josephine skinder by die spreekkamer oor Cornelius se verwagtinge en gedrag op Mauritius. Chris en Gerrit kry 'n sterk sonarsein en volg 'n vermeende duikbootjie na die diepsee. Elsa en Chris is bekommerd dat Gerrit iets onverantwoordelik op see sal aanvang.

Die waternimf wat Gerrit tussen die rotse aantref, blyk die joernalis te wees wat vir die stroperprojek beoog word. Hy stel haar tydens 'n visbraai aan die ander spanlede voor, en sy word met gemengde gevoelens as vennoot aanvaar.

Laurette vind uit dat Cornelius vir Madelein bedrieg het. Dokter Chris wys vir Elsa wat die vreemde voorwerpe is wat hulle op see gesien het, en Gerrit kom af op 'n beeldskone meermin wat snorkel op Duikerbaai se rotsriwwe.

Elsa en Chris probeer die snaakse voorwerpe op see identifiseer. Josephine kla oor Cornelius se drag en gedrag op Mauritius, en Gerrit kom met interessante nuus van die Kaap af oor 'n joernalis wat hulle kan help om die stropers te vang.

Cornelius geniet glad nie die besoek aan Mauritius nie. Elsa sien hoe 'n vistreiler op see 'n voorwerp aan 'n lang lyn sleep, en doen 'n gewaagde toertjie. Sy en Chris sien weer snaakse voorwerpe op see en vind uit dat sakke vol perlemoen agter die voorwerp aangesleep word.

Josephine vertel by die spreekkamer van haar eerste troudag. Elsa praat Chris om om te help om die stropers vas te trek, en hulle lig hom in oor wat hul weet. Hy stem langtand in en hulle besluit om die media in te span.