Moiesstudio

Enn leschter Woch sinn direkt e puer Mineuren zu Schraasseg agesat ginn. Wéi reagéiert den Ombudsman fir Kanner a Jugendlecher Charel Schmit?

Mënsche mat engem Handicap sti bei eis nach ëmmer heefeg viru Barrièren - awer et gëtt Plazen, wou all Dag gewise gëtt, wat Inklusioun bedeit. Eng vun dëse Plazen ass de Restaurant Madame Witzeg, dee geschwë scho säin drëtte Gebuertsdag feiert. Hei schaffe Mënsche mat an ouni Trisomie 21 oder anere spezifesche Besoinen zesummen - als Käch, am Service, an an der Organisatioun.

D’Paule Rodesch war zu Bieles am Restaurant, fir mat Mataarbechter:innen an den Initiateure vum Projet iwwer déi aktuell Situatioun vu Mënsche mat Trisomie 21 zu Lëtzebuerg ze schwätzen, iwwer Fortschrëtter, Erausfuerderungen - an iwwert d’Zukunftspläng fir d’Madame Witzeg.

De Stengeforter Chrëschtmaart gëtt et zanter méi wéi 20 Joer, och ouni grouss a blénkeg Attraktiounen. Wéi kritt een dat hin? Mir schwätzen mam Guy Laroche a mam Guy Erpelding vun der Stengeforter Entente doriwwer.

Dat däitscht Parlament stëmmt haut iwwer de sougenannte Rentepak of. De Vott gëtt en Test fir d'Regierungskoalitioun. Explikatioune vum 100,7-Korrespondent Matthias Kirsch

No méintelaangen Diskussiounen steet der Participatioun vun Israel um Eurovision Song Contest d’nächst Joer elo näischt méi am Wee. Op der Generalversammlung vun der European Broadcasting Unioun huet sech gëschter Owend eng Majoritéit fir déi nei ESC-Reegelen ausgeschwat - wat bedeit, datt elo all Länner um Museksconcours matmaache kënnen, déi dat och wëllen, huet et no der Versammlung vun der EBU geheescht.

Wat steet an den Avisen? D'Haaptmessagë vun Handels-, Handwierker a Salariatskammer no hirer Analys vum Budgetsprojet fir d'nächst Joer

Dem Kleesche säi Sekretariat huet an de leschte Wochen d'Hänn voll ze di gehat. Iwwer 9.000 Bréiwer kruten de Kleeschen an den Houseker vu Lëtzebuerg aus geschéckt.

De Venant Krier, President vun der Associatioun Lëtzebuerger Privatbësch, reagéiert op eng Petitioun déi verlaangt, datt futtis Beem laanscht Bëschweeër mussen ewechgeholl ginn.

Der Chambre de Commerce no bräicht de Lëtzebuerger Aarbechtsmarché bannen deenen nächste 15 Joer 335.000 nei Rekrutementer a bezitt sech dobäi op Zuele vun der Inspection générale de la sécurité sociale (IGSS). Deemno misst ee Lëtzebuerg zu engem sougenannten Talenthub maache fir jonk Leit unzezéien an eng Bevëlkerung, déi am Duerchschnëtt méi al gëtt, um Aarbechtsmarché ze ersetzen.

No engem Artikel op reporter.lu ass de Sportminister Georges Mischo ënner Drock, well hien de Projet net ausgeschriwwen hat. D'LSAP-Deputéiert Liz Braz verlaangt Konsequenzen.