Eng Cargolux-Maschinn soll trotz gespaartem Loftraum iwwer den Iran geflu sinn. Schold un dëser Feelinformatioun sinn d'Limitte vum digitalen Tracking. Mee wéi funktionéiert deen Tracking iwwerhaapt a wéi koum et zu der Feelinformatioun? De Jacques Ganser huet bei Fluchlotsen nogefrot.

Vum Dezember un proposéiert d’McGill University vu Montreal e Master an der Finanzgestioun hei zu Lëtzebuerg. Dat gouf gëschter ugekënnegt. Dozou en Interview mam Patrick Augustin, engem Lëtzebuerger, deen zënter enger Dose Joren op der McGill zu Montreal enseignéiert, an deen eng wichteg Roll bei dësem Projet gespillt huet a weider spille wäert.

5 Lëtzebuerger Residenten hate sech d’lescht Woch op de Wee an Ägypte gemaach fir un der internationale Marche a Richtung Rafah deelzehuelen. Déi ägypteschen Autoritéiten hunn d’Aktivisten awer dru gehënnert hire friddlech Protestmarsch iwwer d’Sinai-Insel unzetrieden. Déi 5 Aktiviste sinn antëschent erëm zeréck am Grand-Duché.

Zanter 10 Joer gëtt et d'Haus vun der Groussregioun. Mir froen d'Direktesch Florence Jacquey, wat do geschitt ass a wéi et der Groussregioun geet an Zäite vu Grenzkontrollen.

Ee Grond - wann net den Haaptgrond fir de Krich, deen Israel mam Iran féiert - ass d’Atombomm, un där den Iran intensiv geschafft huet. Wéi et schéngt war d'Land virun den Attacken och ganz wäit an der Entwécklung vun där Waff. Fir atomar Sprengkäpp kënnen ze bauen, brauch een Uran, deen awer muss ugeräichert ginn. Wat dat bedeit a wéi dat geet, erkläert de Guillaume Trap vun der Fondation Jeunes Scientifiques.

Dëst Joer gouf d’Schwammen am Stauséi aussergewéinlech fréi wéinst Bloalgen verbueden. Normalerweis héiert een éischter Enn dës Summers – also August/September - vun de Bloalgen. Blo-Alge kënne bei Mënsche Symptomer ausléisen ewéi Kappwéi, Ausschlag an datt et engem schlecht gëtt. D’lescht Joer gouf et déi éischt Period vu Bloalgen Mëtt Juli an dat och nëmmen fir eng Woch. Dëst Joer wier et vill méi schlëmm, erkläert de Jean-Baptiste Burnet vum Luxembourg Institute of Science and Technology (LIST). Alleguer d’Plagë ronderëm de Stauséi sinn zënter leschter Woch fir d’Schwammen zou. Dat léich um waarme Fréijoer.

Et gëtt Sträit am Escher Gemengerot - Grond ass deen neie Vëloswee duerch d’Kanalstrooss. Obwuel de Projet zwar unanime am Gemengerot ugeholl gouf, kritiséiert d’Oppositioun elo d’Ëmsetzung vum Projet fir d’Vëlospist. Virun allem d'Ewechfale vun iwwer 20 Parkplazen an der Kanalstrooss an deenen hir Kompensatioun suergt fir Konflikter tëschent den Escher Gréngen an der LSAP.

D'Botaniker vum natur musée hunn déi extreem siele Planz, d'Glaskraut, direkt bei hinne virun der Dier fonnt. De Guy Colling vum natur musée erkläert.

De franséische Senat huet rezent déi sougenannt Taxe Zucman refuséiert. Wat elo d'Optioune si beschwätze mir mat eisem Korrespondent Max Tholl.