Монголын радиогийн уран бүтээлчдийн бэлтгэсэн “Найм арваннэг” тоймчийн хөтөлбөр. "Эр хүн уйлдаг, бас өвддөг" сэдвээр бэлтгэлээ. /2025.03.18/

Улаанбурхан өвчин бүртгэгдсэн шалтгаанаар зарим аймгийн удирдлагууд сургууль, цэцэрлэгийг цахимд шилжүүлсэн нь хууль зөрчсөн үйлдэл гэж Боловсролын сайд үзэж байна.

Сүүлийн 24 цагийн байдлаар Дундговь аймагт улаанбурханы 8 тохиолдол батлагдаж, дахин сэжигтэй тохиолдол нэмэгдэж байгаа учраас сургуулийн үйл ажиллагааг цахимд шилжүүлэх шийдвэрийг аймгийн Засаг дарга гаргасан байна.

Тэгвэл өнөөдөр Боловсролын сайд энэ шийдвэрийг хууль зөрчсөн гэж үзэж, орон нутгийн удирдлагуудын цахимд шилжүүлсэн шийдвэрийг цуцаллаа.

Боловсролын сайд П.Наранбаярын яриаг сонсгоё.

Баянхонгор аймгийн Гурванбулаг сумын хэмжээнд өнөөдрийн байдлаар зудын эрсдлээс шалтгаалж мал хорогдоогүй байна.

Харин бусад эрсдэлээс үүдэж 400 гаруй толгой мал хорогдсон судалгаа гарсныг албаныхан хэлж байна.

Тус сум улсын хэмжээнд хамгийн их цастай өвөлжсөн байна.

Баянхонгор аймгийн Гурванбулаг сумын Засаг дарга Б.Мөнхдалай ингэж ярилаа.

Монгол орны ургамлын зүйл тал хээр, говь, хангай зэрэг бүсээсээ хамаараад шимт чанар нь харилцан адилгүй байдаг.

Тэр дундаа өндөр уулын бүсэд ургадаг ургамлын эмт чанар бусад газрын ургамлаас илүү байдаг байна.

Гэвч сүүлийн жилүүдэд уур амьсгалын өөрчлөлт болон хүний хүчин зүйлийн нөлөөгөөр ургамлын тоо хэмжээ, шимт чанар буурч байна гэж МУБИС-ийн Математик, байгалийн ухааны сургуулийн Биологийн тэнхимийн багш, доктор, дэд профессор В.Гүндэгмаа ярилаа.

Нийслэлийн 770 орчим нийтийн байрны 40 гаруй хувьд галын аюулгүй байдалтай холбоотой зөрчил илэрсэн байна.

Энэ нь гал түймэр гарах өндөр эрсдэлтэйг харуулж байна гэж албаныхан анхаарууллаа.

Дэлгэрэнгүй мэдээг Монголын радиогийн "Хурд" агентлагийн бэлтгэснээр сонсгоё.

Зам, тээврийн салбарт хөдөлмөрийн аюулгүй байдлыг хангах, аливаа эрсдэлээс урьдчилан сэргийлэх талаар хууль эрх зүйн зохицуулалтыг эрчимжүүлэх хэрэгтэй байна.

Дэлгэрэнгүй мэдээг Монголын радиогийн "Хурд" агентлагийн бэлтгэснээр дуулгая.

Энэ онд "Цагаан алт" хөтөлбөрийн хүрээнд 870 тэрбум орчим төгрөгийг ноос, ноолуурын салбарт олгоно.

Манай улсын нийт экспортын 93 хувийг уул уурхайн бүтээгдэхүүн эзэлж байна.

Үлдсэн хувийг хөнгөн үйлдвэр буюу ноос, ноолуурын салбар эзэлдэг.

Хөдөө аж ахуйн бус салбар уул уурхайн экспортыг нөхтөл хугацаа шаардана. Иймээс төр засгаас экспортын орлогыг нэмэх, эдийн засгаа төрөлжүүлэхийн тулд хөнгөн үйлдвэрийн салбараа дэмжих, төсөл хөтөлбөрүүдийг хэрэгжүүлээд явж байна. Тэгвэл үүнээс шалтгаалан эдийн засагт эрэлт дагасан инфляцийн өсөлт бий болох эрсдэлтэйг Монголбанкнаас сануулж байна.

Монголбанкны Санхүүгийн зах зээлийн газрын захирал н.Энхжин ингэж ярилаа.

Бодлогын хүү өндөр байсан ч бизнесийг дэмжихэд чиглэсэн банкуудын зээл олголт 37 хувийн өсөлттэй гарлаа.

Зээлийн огцом өсөлтөөс шалтгаалж банкуудын чанаргүй зээлийн харьцаа сүүлийн 15 жилийн доод хэмжээнд хүрсэн байна.

Банкны салбарын нийт актив 23 хувийн өсөлттэй гарсан бол системийн таван банк энэ онд 530 тэрбум төгрөгийн ногдол ашиг тараах хүлээлттэй байна гэж Монголын банкны холбооны гүйцэтгэх захирал Л.Амар өнөөдөр хийсэн мэдээлэлдээ онцоллоо.

Хоёр сонгуулийн нөлөө, төсвийн тодотголтой холбоотой төсвийн тэнцэл 776 тэрбум төгрөгийн алдагдалтай гарсан байна.

Зарлага өмнөх оноос 35 хувиар нэмэгдэж ДНБ-ний 38 хувьтай тэнцлээ.

Ийнхүү улсын төсөв, урсгал дансны хос алдагдалд хүрч цаашдаа эдийн засгийн тогтвортой байдлыг хадгалахад ихээхэн сорилт дагуулах төлөвтэй байгааг Монголын банкны холбооны гүйцэтгэх захирал А.Амар өнөөдөр болсон “Банкны салбарын тойм 2024” судалгааг танилцуулах үеэр тодотгож байлаа.

Говь-Алтай аймгийн Хөдөлмөр халамжийн үйлчилгээний газар болон Боловсролын газар хамтран "Ахмадын зөвлөх үйлчилгээ"-г бий болгожээ.

Хөдөлмөр эрхлэх хүсэлтэй ахмадуудтай гэрээ байгуулж өрхийн үйлдвэрлэл эрхлэх сургалтаас гадна дутагдалтай байгаа дугуйлан секц хичээллүүлэх юм.

Мөн зорилтот бүлгийн хүүхдүүдийг элсэлтийн шалгалтад бэлтгэнэ гэлээ.

Говь-Алтай аймгийн Боловсролын газрын дарга н.Энхцэцэг ингэж ярилаа.

Шувууны аж ахуй эрхлэгчид ойрын 2-3 жилд дотоодын өндөгний хэрэглээг 100 хувь хангах боломжтой.

Одоогоор үндэсний үйлдвэрлэгчид дотоодын зах зээлийн 90 орчим хувийг хангаж байна.

Ойрын үед өндөгний үнэ нэмэгдэхгүй. Зах зээлээ бүрэн хангахад Засгийн газрын импортын өндөгний талаарх бодлого шийдвэр чухал гэдгийг "Түмэн шувуут" компанийн Гүйцэтгэх захирал Ж.Болд онцоллоо.

Манай улсад шувууны 40 гаруй аж ахуйн нэгж үйл ажиллагаа явуулж байна.

Эдгээрээс “Түмэн шувуут” компани дотоодын өндөгний хэрэгцээний 50 орчим хувийг дангаараа хангаж байгаа юм.