Mujhe shikayat hai un logon se jinhen shikayat hoti hai un logon se jinhen shikayat hoti hai!!
Samjhe?
Nahin samjhe?
Fir se  - 
Mujhe Shikayat Hai un logon se jinhen shikayat hoti hai un logon se jinhen shikayat hoti hai

Mujhe Shikayat hai, har us aadmi se jo zindagi me dusron ki safalta ki kahaniyan sun kar bhi, prerna lene se mana kar deten hai. 
Subah utho, Chaaron taraf dekho, har taraf se motivation ke hamle ho rahe hai. 

Mujhe Shikayat hai har us aadmi se jo fashion industry me kaam karte hai. Dekho, mai kaafi azaad khayal hoon, liberal hoon. Halanki mera yeh manna hai ki - kapde aadmi ko nahi banate, balki aadmi kapdon ko banate hai. Lekin phir bhi - fashion aur garment industry ke logon ke liye mere man me bahut izzat hai. Lekin yaar kam se kam yesi to banao ki pehen kar dam na ghute!!

Mujhe Shikayat hai har us aadmi se jo public transport me privacy ki ummeed karta hai!
Dekho Bhai, ab apna desh jo hai ek parivaar. Ab parivaar me privacy kya hoti hai?
Bharat me yeh bhi parampara hai ki parivar me niji kuch nahi hai. Isliye he manav! Jab parivaar me kuch niji nahi hai to jis parivahan ka naam hi sarvajanik parivahan ho, usme private space ki kalpana bhi hasyaspad hai! 

Jaise laddu ko cake nahi kaha jaa sakta, Banaras ko Paris nahi kaha ja sakta. 
Agar aapki bhavnaye aahat ho rhai hai to mai upma badal deta hoon. 
To jaise cake ko laddu nahi kaha jaa sakta, jaise Paris ko Banaras nahi kaha jaa sakta, waise hi Bharat ke rashtriya News channel par chalne wale karyakramon ko News nahi kaha jaa sakta. 
Agar aap use News samajhte hai to mujhe aapse badi shikayat hai!

Mujhe Shikayat hai har us aadmi se jo apna pura aaye kar yani income tax deta nahi hai. Kyu? Akhir kyu? 
Sirf isliye ki aapko dar hai ki kahin un 6 crore logon me aapka naam na aajaye jo 140 crore ke desh me income tax return bharte hai. 
Accha! Aap keh reh hai ki aap return file karte hai, tax bhi bharte hai, lekin jitna tax bacha paaye bacha lete hai! Bahut chatur hai aap? 
Lanat hai aap par!!

Mujhe shikayat hai har us aadmi se jo paryatan apne liye karte hai, gyan, darshan aur anand ke liye aur use bas apne tak hi rakhte hai!!
Arre! Zuckerberg ne Instagram, Facebook baigehra kyu banaya hai? Isiliye na ki aap unke liye ghumne jaye aur aap hai ki sirf apne sukh ke liye ghum rahe hai!! Kitne Khudgarz hai, kitne selfish hai aap!!!

Mujhe Shikayat hai har us aadmi se jo AI se darte hai! Machine aur aadmi ki ladai 100 saal se upar se chal rahi hai! Lekin dhayn rakhnewali baat yahi hai Guru! Ke machine ko banata aadmi hai, aur jab machine ka deemagh kharab hone lage to use control me bhi aadmi hi le aata hai!!

Take Ser Bhaji, Take Ser Khaja, Jahan Kahavat Hai,
Us Andher nagri, us chaupat raja se Mujhe Shikayat Hai!
To kul milakar yeh hai ki is series mein main hounga, aap honge, haas hoga, parihaas hoga, baat gambhir hogi, andaaz mein lekin vyang hoga. Rasta Parsai ka hoga, Chakklas kaka ki hogi aur hogi bahut sari shikayatein jo mujhe hai, shikayatein jo aapko hai, aur shikayatein jo hamare aapke jaise bahut se logon ko hai. To hum aur aap sath mein bhopu lagakar jor se bolenge  - Mujhe Shikayat Hai