تعرف إن الحرباية دي مش مجرد سحلية ملونة بتتمشى في الشجر وخلاص؟لأ يا صاحبي، دي كائن كسر كل قوانين الفيزياء والبيولوجيا اللي إحنا نعرفها، وعمل لنفسه "كتالوج" خاص بيه لوحده.الناس فاكرة إن الحرباية بتغير لونها عشان "تستخبى" وبس،وده أكبر ظلم تاريخي اتعمل في حقها.الحقيقة العلمية يا شكس إن تغيير اللون ده هو "لغة" كاملة، هو "الفيسبوك" و"الواتساب" بتاع عالم الزواحف.الحرباية لما بتقلب لونها أحمر غامق أو أسود، هي مش بتستخبى في فحم، هي بتزعق وبتقولك "أنا عفاريت الدنيا بتنطط في وشي، ابعد عني الساعة دي عشان مروقكش".ولما بتقلب ألوان زاهية وفاتحة، ده معناه إن الهرمونات مظبوطة، والمزاج رايق، ومستعدة للحب أو للأكل.يعني هي "لمبة نيون" ماشية بمشاعرها، مش مجرد جاسوس بيلبس بدلة تخفي طول الوقت.

تعرف إن ربع الثدييات اللي عايشة على كوكب الأرض حالياً هي "خفافيش"؟

آه والله يا صاحبي.

لو عديت كل الحيوانات اللي بترضع ولادها في العالم.. 

واحد من كل خمسة هيكون خفاش.

إحنا بنتكلم عن "إمبراطورية" جوية 

مسيطرة على سماء الليل.

ومع ذلك.. الخفاش ده أكتر كائن مظلوم ومكروه إعلامياً في التاريخ.

الناس ربطته بمصاصين الدماء، وبالشياطين، وبالفيروسات، 

وبالشعر اللي بيلزق (إشاعة كدابة بالمناسبة).

بس الحقيقة العلمية بتقول إن الخفاش ده هو البطل المجهول 

اللي من غيره الكوكب ينهار.

لانه "مبيد حشري" طائر.. 

الخفاش الواحد ممكن ياكل 1000 ناموسة في الساعة الواحدة!

يعني لولاه كان الناموس شفط دمنا بجد.

وهو "مُلقح" للأزهار زي النحل بالظبط.. 

فيه فواكه زي المانجا والموز بتعتمد عليه عشان تطرح.

يعني من غيرة.. مفيش عصير مانجا.

الكائن ده يا شكس هو معجزة ربانية.

ده مش طائر.. 

ده "فار" قرر يطور إيديه 

ويحول صوابعه لـ "جناحات".

أيوه يا شكس.. 

جناح الخفاش ده عبارة عن كف إيد زي كفك بالظبط، 

بس صوابعه طويلة جداً وبينهم جلد.

يعني هو بيطير بـ "تسقيف" إيديه مش بريش.

والأغرب من كده.. 

إنه بيشوف بـ "ودانه".

عنده نظام "سونار" (Echolocation) 

أدق من أحدث غواصة نووية أمريكية.

بيرسم خريطة ثلاثية الأبعاد للعالم في الضلمة باستخدام الصوت بس.

تعرف إن الجمل هو الكائن الوحيد في العالم 

اللي كرات الدم بتاعته شكلها "بيضاوي" مش مدور؟

آه والله يا صاحبي.

التصميم البيضاوي ده مش للزينة.

ده عشان كرات الدم دي تعرف تجري في عروقه 

لما لزوجة الدم تزيد بسبب العطش.

وعشان لما يشرب 100 لتر مية في عشر دقايق.. 

الخلايا دي تتنفخ وتتمدد من غير ما تنفجر.

يعني إحنا قدام "تكنولوجيا نانو" شغالة جوه عروقه من ملايين السنين.

الكائن ده يا شكس مظلوم معانا أوي.

إحنا واخدينه رمز للصبر والغلابة والبهدلة.

بس الحقيقة.. الجمل ده "مرسيدس" الصحراء.

ده الكائن اللي "هزم" الطبيعة في عقر دارها.

عايش في مكان الحرارة فيه بتسيح الحديد.. ومفيش نقطة مية.

ومع ذلك ماشي رافع راسه.. 

ومبتسم ابتسامة ساخرة كده كأنه بيقول للصحراء:

"أخرك هاتيه.. أنا مش بتهز".

ده الحيوان اللي العرب زمان سموه "سفينة الصحراء".

مش بس عشان بيشيل بضاعة ويمشي.

لأ.. عشان هو نظام "مغلق" ومكتفي ذاتياً.

عنده خزان طاقة فوق ضهره (السنام).

وعنده فلاتر في مناخيره.. 

ونظارة شمسية في عينيه.. 

ومبرد مية في جسمه.

ده غير إنه الكائن الوحيد اللي بيقدر "ينتقم".

الغل والحقد عند الجمل مش مجرد إشاعة.

ده بجد بيفتكر وش اللي أذاه ولو بعد 20 سنة.. 

وبياخد حقه تالت ومتلت.

تعرف إن العقرب هو الكائن الوحيد اللي بيتمشى على الأرض دلوقتي، وكان موجود قبل ظهور الأشجار نفسها على الكوكب؟آه والله يا صاحبي.إحنا بنتكلم عن كائن "أثري" عايش معانا.تصميمه البيولوجي سبحان الله، مثالي لدرجة إن مفيش حاجة اتغيرت فيه من 400 مليون سنة.نفس الدرع.. نفس الكلابات.. ونفس "إبرة الموت" اللي في آخر ديله.كائن شاف العصور الجليدية وهي بتيجي وتروح.وشاف الديناصورات وهي بتنقرِض، وهو فضل مستخبي تحت صخرة بيبتسم ابتسامة شريرة.الكائن ده سمعته سابقاه في كل الحضارات.الفراعنة قدسوه وخافوا منه، وعملوا إلهة اسمها "سرقت" (Serket) على شكله.عشان تحميهم من لدغته، أو تبعته يخلص على أعدائهم.وفي الأساطير الإغريقية، العقرب هو اللي قدر يقتل "أوريون" الصياد العملاق.واترفع للسما وبقى برج من أبراج النجوم.دايماً رمز للغدر، وللموت المفاجئ، وللقوة اللي متتقاسش بالحجم.بس العلم الحديث لما بص على "آلة القتل" الصغيرة دي.اكتشف معجزات هندسية وكيميائية.اكتشف إن سمه مش مجرد سم، ده "كوكتيل" معقد جداً من البروتينات العصبية.ممكن يوقف قلب فيل، وممكن في نفس الوقت يستخدم في علاج أمراض مستعصية عند البشر.واكتشفوا إن جسمه فيه خاصية غريبة جداً.إنه بينور في الضلمة تحت الأشعة فوق البنفسجية بلون أخضر فسفوري مرعب.كأنه لابس "جاكيت عاكس" عشان يعلن عن وجوده في مملكة الليل.

تعرف إن الأرماديلو هو الحيوان الوحيد من الثدييات ،اللي بيلبس درع عظمي حقيقي ممكن يصد الرصاص؟آه والله يا صاحبي.ده مش مجرد جلد ناشف ولا حراشيف زي التمساح.ده عضم حي بيتكون في طبقات الجلد.عشان يعمل "صديري واقي" رباني ضد أي خطر.لدرجة إن فيه حوادث مسجلة في تكساس وأماكن تانية.لناس حاولوا يضربوه بالنار.فالرصاصة ردت فيهم هما وعورتهم.يعني كائن ماشي بمبدأ "اللي يجي عليا.. كمل انت المثل بقى يابو الشكايس".الكائن العجيب ده حير شعوب العالم القديم ودوخهم.عند حضارة "الأزتيك" العظيمة في المكسيك زمان.كانوا بيسموه "أزوتوشتلي" (Azotochtli).والكلمة دي ترجمتها الحرفية "الأرنب السلحفاة".عشان كانوا شايفينه كائن هجين ومقدس.بيجمع بين سرعة الأرنب في الجري والحفر.وبين حكمة ودفاع السلحفاة المدرعة.وكانوا بيعملوا من دروعه آلات موسيقية وترية.عشان يعتقدوا إن صوته وهو بيغني بعد ما يموت.أحلى بكتير من صوته وهو عايش.أما عند شعب "المايا".فكانوا بيبصوله نظرة تانية خالص.كانوا رابطينه بآلهة العالم السفلي والموت.بسبب قدرته الخرافية على الحفر والاختفاء تحت الأرض في ثواني.كأنه بيفتح بوابة لعالم تاني محدش يعرف عنه حاجة.ولما وصل المستكشفين الإسبان لأمريكا.وشافوا الكائن ده لأول مرة اتخضوا.وسموه "Armadillo".يعني "المدرع الصغير".وفضل الاسم ده لازق فيه لحد النهاردة.

تعرف إن الحوت الازرق مش بس أكبر حيوان موجود على كوكب الأرض دلوقتي.اه والله يا صاحبي.. ده أكبر كائن حي عاش في تاريخ الكوكب كله.أكبر من الديناصورات.. وأكبر من الميجالودون.. وأكبر من أي وحش خيالي جه في دماغك.آه والله يا شكس زي ما بقولك كده.ده كائن وصل لمرحلة من الضخامة بتكسر كل قوانين الفيزياء والبيولوجيا.وزنه ممكن يعدي الـ 170 طن.. يعني قد حوالي 30 فيل أفريقي متجمعين.أو قد بتاع 2500 بني آدم مرصوصين فوق بعض.لسانه لوحده.. حتة اللحمة اللي في بقه دي.. وزنها قد وزن فيل كامل.وقلبه يا معلم.. ده حكاية تانية خالص.قلب بحجم عربية "ميكروباص" صغيرة..وشرايينه واسعة لدرجة إن إنسان بالغ يقدر يزحف جواها مستريح.

تعرف إن طائر الحذاء او ابو مركوب،مش مجرد طائر عادي بيطير ويصوصو.لا يا صاحبي ده كابوس متحرك بيمشي على رجلين.كائن تحس إنه هربان من العصر الطباشيري،ونسي ينقرض مع الديناصورات.وشه عبارة عن جزمة قديمة مقاس 60.وعينيه فيها نظرة شريرة وميتة،تخليك تحس إنك عملت جريمة، حتى لو أنت قاعد في بيتكوا عادي.طائر الحذاء يا شكس كان معروف برضوا في التاريخ،فالمصريين القدماء كانوا عارفينة كويس جداً.بس محبتوش يعملوه إله زي الصقر حورس أو أبو قردان.لأ دول كانوا راسمينه في البرديات والنقوش، كأنه وحش مستنقعات شرير.حاجة كدة بتيجي في الكوابيس الفرعونية.وكانوا بيعتبروه رمز للفوضى والشر اللي لازم يتصاد.وده طبيعي جداً بصراحة.أنت لو صحيت الصبح لقيت واحد بالوش ده باصص لك.أكيد مش هتتفائل خير ليومك.المهم إن الكائن ده واقف طول حياته ثابت زي التمثال الشمع.مبيتحركش بالساعات.لدرجة إن السمك بيفتكره شجرة أو حتة خشب.بس في اللحظة اللي بيقرر يتحرك فيها.بيتحول لسفاح مستنقعات من الدرجة الأولى.بينقض على فريسته وبياكلها كاملة.سواء كانت سمكة، تعبان، أو حتى تمساح صغير!وأغرب حاجة فيه صوته.فابو مركوب يا معلم مبيغنيش زي العصافير ،ولا حتى بينعق زي الغربان.لا يا شكس.ده بيعمل صوت "طقطقة" بمنقاره.صوت شبه مدفع رشاش آلي في قلب ساحة الحرب.

تعرف إن الشيتا هو الحيوان الوحيد في عائلة القطط الكبيرة،اللي مبيقدرش يزأر؟آه والله يا صاحبي.الوحش اللي بيجري أسرع من عربية فيراري،مش بيزأر زي الأسد أو النمر.لأ،ده بيصوصو وبيطلع أصوات شبه الطيور،وبينونو زي القطط البيتية.كائن كله تناقضات.الكائن ده مش مجرد أسرع حيوان بري على الكوكب،لأ،ده معجزة هندسية ربانية ماشية على أربع رجلين.عموده الفقري مرن زي السوستة،ورجليه الخلفية طويلة وقوية بتشتغل زي مكبس هيدروليك،وديله الطويل بيشتغل كدفة عشان يوجهه في المنعطفات على السرعات العالية.حتى مخالبه مش بتدخل جوه رجليه زي باقي القطط،لأ، دي بتفضل بارزة زي مسامير كاوتش عربيات السباق،عشان تديله ثبات على الأرض وهو بيجري.يعني باختصار،ده فورمولا 1 الطبيعة.هذا العدّاء الأنيق،اللي جسمه ممشوق زي عارضات الأزياء،وعلى وشه خطين دموع سود نازلين من عينيه،كأنه بيبكي على سرعته اللي بتخنقه.في مصر القديمة،كانوا بيقدسوه جدًا،الفراعنة كانوا بيربوه كحيوان أليف ملكي،ورمز للسرعة والأناقة والقوة.حتى كلمة "شيتا" نفسها،جاية من اللغة السنسكريتية القديمة "شيتراكا"،ومعناها "صاحب البقع" أو "المرقط".

النهارده هنغوص في العالم البطيء والهادئ بتاع الكسلان.وهنشوف إزاي الكائن ده بيعيش حياته البطيئة جدًا دي.من يوم ما اتولد وهو متعلق في شجرة كأنه زينة رمضان. لحد ما يبقى فيلسوف الغابة اللي بيقضي أيامه في تأمل عميق... و نوم أعمق.بس متفتكرش إن حياته مملة يا أبو الصحاب.لأ، دي مليانة دراما من نوع خاص، وتشويق بالتقسيط المريح.من محاولات هروب بطيئة من العقبان الجارحة. لحد قصص حب بتاخد أسابيع عشان تبدأ.فجهز نفسك يا بابا، وهات بقى معاك مخدة وبطانية.لأنك داخل على حكاية هتخليك تعيد التفكير في معنى السرعة والحياة.قصة الكسلان، أبطأ بطل في تاريخ مملكة الحيوان.

تعرف إن العقاب الذهبي بيقدر يصطاد وياكل ذئب؟آه والله يا صاحبي،الطيارة الحربية دي مش بتاعت هزار.ده مش مجرد طائر جارح،ده قمة الهرم الغذائي في مملكته،سيد السما،وإمبراطور الجبال الشاهقة.الكائن ده يا صاحبي عبارة عن سلاح طائر متكامل.جناحاته لما بتتفرد،ممكن توصل لأكتر من مترين وربع،أعرض من باب أوضة نومك.بيقدر يطير على ارتفاعات شاهقة،ويستخدم التيارات الهوائية عشان يفضل في الجو ساعات من غير ما يرف بجناح واحد،كأنه طيارة شراعية من غير طيار.لكن لما بيحدد هدف،بيتحول من طيارة شراعية لصاروخ باليستي.بينقض على فريسته بسرعة ممكن توصل لـ 320 كيلومتر في الساعة!أسرع من عربية فورمولا 1 يا معلم.وعينيه دي مش مجرد عيون،دي تلسكوبات عسكرية حية.حدة بصره أقوى من الإنسان بـ 8 مرات،بيقدر يشوف أرنب بيتحرك من على بعد 3 كيلومتر.يعني لو هو واقف فوق برج القاهرة،يقدر يشوف نملة بتعدي الشارع في ميدان التحرير.ومخالبه... يا خبر أبيض على مخالبه.قوة القبضة بتاعتها بتعادل 10 أضعاف قوة قبضة إنسان رياضي،بيقدر بيها يكسر جمجمة تعلب أو يمسك في ضهر غزال صغير وهو طاير بيه.ملزمة حديد يا أبو الصحاب.