Elektronika eta musika urbanoa delakoaren bueltan lan asko egindakoa da Maisha MC barakaldarra. Haren musika '121 krew' edota 'Patrol destroyers' taldeetan entzun eta gero, bakarkako lehen lana atera du 2020an. Hala, bere diskoa aurkezteko baliatu dugu MusikHaria saiora egin duen bisitan. Izan ere, astelehenetan 'Beste bat' saioak egiten ari dela izan da horretarako aitzakia. Kalifornia eta Euskal Herria lotu ditugu bizkaitarraren eskutik.

Uztaileko astearteetan 'Amalur' lanaren eraginak zeintzuk izan diren ari zaigu kontatzen June Calsor musikari donostiarra 'Beste bat' saioetan. Hartara, debuteko diskoaren orain arteko ibilbideaz eta haren etorkizunaz hitz egiteko eta saioak egiteko prozesu hori nola ari den bizitzen kontatzeko gonbidatu dugu MusikHaria saiora.

Lander Zalakainek aipatu zigun kontzertu aurreko elkarrizketan talde iluna eman arren ongi pasatzen zutela eta beti umore onez zegoen taldea zirela. Bada, ez zuen arrazoi faltarik bateria-jotzaileak. Giro aparta sortu zuten Azpeitian eta jaia bai baina egurra banatzeko tartea ere izan zuten hainbat mezuren bitartez. Kontzertu borobila Mungiako taldeak eman zuena.

'Auto-tour' bira berezia bukatu berritan elkarrizketatu ditugu Belako taldekoak. Madrilen promozio elkarrizketak grabatzetik iritsi berritan, ostiraleko kontzertuaren bezperatan, Lander Zalakain taldeko bateria-jotzailea izan da NAIZ Irratiko MusikHarian. Zer ikusiko dugu ostiralean? «Lau gazte emozionatuta», erantzun du Zalakainek zuzenekoetara itzultzearekin pozik. 

Ennio Morricone zendu berritan, haren ibilbideari tokia egin nahi izan diogu MusikHaria saioan. Soinu banden munduan izen handienetakoa izan da Morriconerena eta, hartara, hari buruz hitz egiteko, Euskal Herrian daukagun soinu banden egile batengana jo dugu italiarraren ibilbidea errepasatzeko, Paula Olazengana.

Disko asko publikatu gabe, baina dagoeneko 15 urte baino gehiago pasa dira Izatefaltsua taldea sortu zenetik. Amurrioko taldeak 2015ean atera zuen beren lehenengo lan luzea eta, bost urte beranduago, 'Amorru bizia' lanarekin datoz. Bidean, kontzertu asko eta talde potoloekin elkarbanatu dute oholtza. Ibilbideaz eta disko berriaz hitz egiteko gonbidatu ditugu MusikHaria saiora.

Hiritik ihesi, animaliak lagun dituela bizi da Rakel Arenaza Acedo donostiarra. 'Bakarrik hobeto fest' batean taularatu zen lehenengo aldiz bakarrik eta gerora Koban taldean zituen bi kide batu zaizkio Raitx proiektua aurrera eramateko. Lehen diskoa kaleratu dute aurten eta, gainera, Gaztea maketa lehiaketa irabazi. Diskoaren, bere bizi estiloaren eta bestelako hainbat konturen inguruan jardun gara hizketan MusikHaria saioan.

En Tol Sarmiento izan zen ostiralean 'NAIZ kontzertuak' ekimenaren lehen zikloari bukaera ematen Bilboko Santana 27 aretoan. Ekorako taldeak orain arteko emanaldirik luzeena eskaini zuen, tartean 'Aukera berriak' diskoko kantu asko aurkeztuaz. Erreleboa pasa dio Belako taldeari, eredu berriarekin, eta etenik gabe aste honetan bertan hasiko da bigarren zikloa.

Eneko Alkortak gidatu du ikasturte honetan ere 'Reggae Fever' irratsaioa. Atsedena hartzeko garaia tokatzen zaio orain, ordea. Baina, saioak etena izan ordez, bere saiotik pasa diren hainbat selektorek egindako sesioak izango ditugu uda honetan. Ikasturtearen balantzea egiten eta udako saioen nondik norakoak azaltzen izan da Alkorta MusikHaria saioan.

NAIZ Kontzertuen lehen bost emanaldietako azkena izango da ostiral honetan Bilboko Santana 27 aretotik En Tol Sarmiento taldeak eskainiko duena. Bigarren txanda ere prest da dagoeneko, ordea. Hori bai, aldaketekin dator, «eredu mistoa» izango dute. Orain arteko balantzea eta aurrera begirako asmoez aritu da Musikharian Asier Iñigo, NAIZeko marketin arduraduna.