Ideia orokor baten bueltan egiten dituzte beren diskoak Rodeo talde zestoarreko kideek. Oraingoan kontzeptu nagusia 'ezherria' izan da. Stoner indartsuarekin jantzi dituzte mezu gordin eta zuzenak bost pistatako EP batean. Taldea eta beren azken lana ezagutu asmoz gonbidatu ditugu MusikHaria saiora.

Intentsitate aldaketa askoko emanaldia izan zen Huntza taldeak ostiralean eskaini zuena. Tarte batzuetan erritmo biziak eta besteetan lasaiak. Kontzertu intimoagoa eskaini zuten, bai, baina beren plazako indarraren esentziari uko egin gabe. Proposamen desberdina, baina emaitza ederra izan zuena. Eta ikusi eta entzundakoa partekatzera etorri da MusikHaria saiora Izkander Fernandez.

Enpresaren inguruko ikasketak egiten hasi eta Txinan bizitzen geratu zen duela urte batzuk Eñaut Martí (Orio, 1991). Musika zuen Euskal Herrian pasio eta han ogibide bihurtu zaio 'MusicLab' proiektuari esker. Ekintzaileentzako sari bat eskuratu berritan eta bakarkako lehen EPa eginda bisitatu du MusikHaria saioa.

Askotan esaten da garai batean idatzitako letrak gaurkotasuna mantentzen dutela sarri. Hori gertatzen da Negu Gorriak taldearen estreinako diskoarekin, baina, kasu honetan musikalki ere ondo zahartu den lana izan da. Urko Rodriguezek, ongi ezagutzen du taldearen jarduna. Hartara, MusikHaria saiora gonbidatu dugu diskoak 30 urte bete dituela aitzakia bezala hartuta.

Rockaren atmosfera zabalean dabiltza Mihise talde usurbildarreko kideak. Musika instrumentala egitetik datorren taldea da eta hori nabari da hainbat kantutan. Estreinako lana kaleratu berri dute, 'Kronik@' izeneko lana, indartsua. Momentuz, diskoan entzun beharko dugu ordea, lehen kontzertuetarako sarreraren bat lortzea ia ezinezkoa izango delako. Hori guztia kontatzera etorri dira MusikHaria saiora.

Elektronikaren indarra publiko zabalago bati eskaini zion Zetak taldeak ostiralean, Azpeitian. Ibizako diskoteka handietan izaten diren DJek ematen dituzten emanaldien pare jarri genezake bertakoa, baina zuzeneko musikarekin. Euskal Herriko musikari zerbait apurtzailea eta ausarta ekarri nahian sortu ziren, eta, momentuz lortu dute. Musikaren belaunaldi aldaketa nabarmena den honetan, erreferentzia handietako bat izan daiteke Zetak.

Musika garaikidean murgilduta dabil azkenaldian Aitor Etxebarria musikaria. Pelikula bateko eta besteko soinu bandak egiten dabilen bitartean, denbora atera du 'Beste Bat' saioak egiteko eta baita 'MusikHaria' bisitatzeko ere. Lanpetuta dabilen arren, musikak bizi duela argi utzi digu gernikarrak. 'Nihilism Part 1.' diskoa kaleratu berritan, kontzertuen geldialdian, etengabeko ikasketan murgilduta dago Etxebarria.

Talde bizkaitarra den arren, lapurtar bat dute abeslari 'EraBatera' taldekoek: Jurgi Ekiza. Taldearen kantu eta bideoklip berrien inguruan hitz egiteko eta bakarka egin dituen azken lanak kontatzeko gonbidatu dugu MusikHaria saiora. Positibo izatera bultzatzen duen diskurtsoa ekarri du, gainera, musikari baionarrak.