ការប្រកាស​បង្កក​ជំនួយ​របស់​សហរដ្ឋ​អាមេរិក​ក្រោម​រដ្ឋបាល​ថ្មី​របស់​លោក ដូណាល់ ត្រាំ (Donald Trump) កំពុង​បង្ក​ជា​ក្តីបារម្ភ​និង​ផល​ប៉ះពាល់ដល់​បណ្តា​ប្រទេស​ជាច្រើន​នៅ​ជុំវិញ​ពិភពលោក ក្នុង​នោះ​រួមមាន​ទាំង​ប្រទេស​កម្ពុជា​ផងដែរ ជា​ពិសេស​អង្គការ​សង្គម​ស៊ីវិល។ ទោះជា​យ៉ាងណាក្តី លោក នី សុខា ប្រធាន​សមាគម​សិទ្ធិ​មនុស្ស​អាដហុក​ បាន​បង្ហាញ​ក្តី​សង្ឃឹម​ថា សហរដ្ឋអាមេរិក​អាច​នឹង​ផ្តល់​ជំនួយ​ដល់កម្ពុជា​ឡើង​វិញ ក្រោយ​រដ្ឋបាល​របស់​លោក ដូណាល់ ត្រាំ បញ្ចប់​ដំណើរការ​ត្រួតពិនិត្យ​របស់ខ្លួន​ក្នុង​រយៈ​ពេល ​៩០ ​ថ្ងៃ។ តទៅ​នេះ​ជា​បទសម្ភាសន៍​រវាង​លោក ស៊ុន ណារិន អ្នក​យក​ព័ត៌មាន​ឲ្យ​វីអូអេ ​និង​លោក នី សុខា ប្រធាន​សមាគម​អាដហុក៕

ប្រធានាធិបតី​កូរ៉េខាងត្បូង​លោក Yoon Suk Yeol បាន​ប្រកាស​កាលពី​យប់​ថ្ងៃអង្គារ​ប្រើ​ច្បាប់​អាជ្ញាសឹក ប៉ុន្តែ​បាន​ដក​វិញ​ប៉ុន្មាន​ម៉ោង​ក្រោយ​ពី​សភា​ជាតិ​បាន​បោះឆ្នោត​ប្រឆាំង។ លោក លួន វិបុល ប្រធាន​សមាគម​ប្រជាធិបតេយ្យ​ខ្មែរ​ក្វាងជូ​បាន​ចែក​រំលែក​ការវិភាគ​របស់​លោក​អំពី​ការប្រកាស​ដ៏គួរ​ឱ្យ​ភ្ញាក់ផ្អើល​នៃ​ច្បាប់​អាជ្ញាសឹក​នៅ​ប្រទេស​កូរ៉េ​ខាងត្បូង។ ក្នុង​នាម​ជា​សកម្មជន​សង្គម​ខ្មែរ​ លោក វិបុល បាន​សម្តែង​ការ​ភ្ញាក់ផ្អើល​ដែល​ប្រទេស​ប្រជាធិបតេយ្យ​ដូច​កូរ៉េ​ខាង​ត្បូងបាន​ឈាន​ដល់វិធានការ​បែប​នេះ។ យ៉ាង​ណា​ក៏​ដោយ លោក​បាន​កោត​សរសើរ​សមាជិក​សភា​ និង​កង​កម្លាំង​ប្រដាប់​អាវុធ​ដែល​បាន​ឈរ​ជា​មួយ​ប្រជាពលរដ្ឋ​និង​លើក​ដម្កើង​លទ្ធិ​ប្រជាធិបតេយ្យ។ សូម​លោក​អ្នកស្តាប់​បទសម្ភាសន៍​របស់​លោក ម៉ែន គឹមសេង នៃ​វីអូអេ​ជាមួយ​នឹងលោក លួន វិបុល លើ​ការវិវឌ្ឍន៍​ដ៏​សំខាន់​នេះ និង​ផលប៉ះពាល់​ចំពោះ​អនាគត​របស់​ប្រទេស​កូរ៉េ​ខាងត្បូង៕

បាតុករខ្មែរ​នៅ​ប្រទេស​កូរ៉េខាងត្បូង​ជាច្រើននាក់ បានធ្វើមហាបាតុកម្ម កាលពី​ថ្ងៃទី១១​ខែសីហា​ឆ្នាំ២០២៤​ នៅ​ទីក្រុង​សេអ៊ូល ទាមទារ​ឲ្យ​រដ្ឋាភិបាល​កម្ពុជា​ដកខ្លួន​ចេញពី​តំបន់​ត្រីកោណ​អភិវឌ្ឍន៍​រួមគ្នា​ជាមួយ​នឹង ឡាវ និង​វៀតណាម​ដោយសារ​មាន​ការបារម្ភ​ពី​ការបាត់បង់​អធិបតេយ្យ​ជាតិ។ ពួកគេ​ស្នើឲ្យ​រដ្ឋាភិបាល​ប្រឹងប្រែង​រក ធនធាន​មក​អភិវឌ្ឍន៍​ដោយខ្លួន​ឯង​ជាជាង​ពឹងផ្អែក​លើ​ប្រទេស​វៀតណាម។ លោក ម៉ែន​ គឹមសេង នៃវីអូអេ​បានសម្ភាសលោក​មាស​ ពិសាល​ សមាជិក​មួយរូប​នៃ​ក្រុម​អ្នករៀបចំ​បាតុកម្ម​អំពី​ការជំទាស់របស់​ពួកគេ។​ សូមលោកអ្នកស្តាប់​បទសម្ភាស​នេះ​ដូចតទៅ៖

លោក សម រង្ស៉ី ​មេដឹកនាំ​គណបក្ស​ជំទាស់​ដែល​កំពុង​និរទេស​ខ្លួន​នៅ​ក្រៅប្រទេស​ និង​ជា​ប្រធាន​ស្តី​ទៅ​គណបក្ស​សង្គ្រោះ​ជាតិ​ បាន​អះអាង​ថា មេដឹកនាំ​កម្ពុជា​ធ្វើឲ្យ​បាត់បង់​អព្យាក្រឹត្យ​ដោយសារ​ពឹងផ្អែក​លើចិន​ខ្លាំង​ពេក​ ហើយ​ថា​ទស្សនកិច្ច​របស់​លោក​ រដ្ឋមន្ត្រី ​ការពារ​ប្រទេស​អាមេរិក​ទៅ​កម្ពុជា​មិនបាន​ទទួល​ផល​អ្វី​នោះ​ទេ​ដោយសារ​ថា​ឥទ្ធពល​ចិន​គ្រប​ដណ្តប់​ខ្លាំង​ពេក​នៅ​កម្ពុជា​ដែល​មិនអាច​ឲ្យមាន​ការ​ផ្លាស់ប្តូរភ្លាមៗ។ លោក​ សុខ ខេមរា ​នៃ​ វីអូអេ ​បានធ្វើ​បទសម្ភាសន៍​ជាមួយ​លោក​ សម រង្ស៉ី​តាម​ទូរសព្ទ​ពី​ប្រទេស​បារាំង​កាលពី​ថ្ងៃព្រហស្បតិ៍​ទី២៧ ​ខែ​មិថុនា។ សូម​ស្តាប់​កិច្ចសម្ភាសន៍​នេះ​ដូច​តទៅ៖

ក្រោយ​លទ្ធផល​ក្រៅ​ផ្លូវការ​បឋមៗ​បង្ហាញ​ថា ​គណបក្ស​ប្រជាជន​កម្ពុជា​របស់​លោក​ នាយក​រដ្ឋមន្ត្រី ​ហ៊ុន សែន ​ឈ្នះ​ការ​បោះឆ្នោតជាតិ​កាល​ពី​ថ្ងៃទី​២៣ ខែកក្កដា ឆ្នាំ​២០២៣​ ដោយគ្មាន​វត្តមាន​គណបក្ស​ប្រឆាំង​ដ៏​ចម្បង​នោះ​ ឮ​ ថ្នាក់ដឹកនាំ​កំពូលៗរបស់​ចិន​បានផ្ញើ​សារអបអរ និង​បង្ហាញ​ការគាំទ្រ​ចំពោះ​ជ័យជម្នះ​គណបក្ស​គ្រប់គ្រង​ប្រទេស។ លោក សុខ ​ខេមរា នៃ​វីអូអេ ​ពី​រដ្ឋធានី​វ៉ាស៊ីនតោន និង​ អ្នកនាង​កាន់ វិច្ឆិកា ​ពី​រាជធានី​ភ្នំពេញ ​ជូន​កិច្ច​សន្ទនា​អំពីការ​លើកឡើង​របស់​ថ្នាក់ដឹកនាំ​កំពូលៗ​របស់​ចិន​និងដំណើរការ​វិវត្ត​ផ្សេងៗ​ទាក់ទង​នឹង​ការ​បោះឆ្នោត។ សូម​ស្តាប់​កិច្ច​សន្ទនា​រវាង ​លោក សុខ ខេមរា​ នៃ​ វីអូអេ  ជាមួយ​អ្នកនាង ​កាន់ វិច្ឆិកា​ ពី​រាជធានី​ភ្នំពេញ​ដូចតទៅ៕

ក្រោយ​ការ​បោះឆ្នោត​ថ្នាក់​ជាតិ​ដែលបាន​បញ្ចប់​ទៅ​កាលពី​ថ្ងៃទី​២៣ ខែ​កក្កដា​ ឆ្នាំ​២០២៣​ ដោយមិន​មាន​វត្តមាន​របស់​គណបក្ស​ប្រឆាំង​ដ៏​ចម្បង​ ក្រុម​សមាជិក​សភាអាស៊ាន​សម្រាប់​សិទ្ធិ​មនុស្ស និង​មជ្ឈដ្ឋានអន្តរជាតិ​ និងក្នុង​តំបន់បាន​រិះ​គន់​ការ​បោះឆ្នោត​នៅ​កម្ពុជា ថា​ ជាការ​បោះឆ្នោត​ដែលមិន​មាន​ភាព​សេរី និង​យុត្តិធម៌។ លោក ​សុខ ខេមរា នៃ​វីអូអេ ពី​រដ្ឋធានី​ វ៉ាស៊ីនតោន ​និង ​អ្នកនាង ​កាន់ វិច្ឆិកា​ នៃ​វីអូអេ​ពី​រាជធានី​ភ្នំពេញ ​ជូន​កិច្ច​សន្ទនា​អំពី​រឿង​នេះ៕

ការបោះឆ្នោត​នៅ​ក្នុង​ប្រទេស​កម្ពុជា​ បាន​បញ្ចប់​ដោយ​មាន​ការ​ប្រកាស​ឲ្យ​ដឹង​ពី​លទ្ធផល​បឋម​ក្រៅ​ផ្លូវការ​ដំបូងៗ​ថា ​គណបក្ស​ប្រជាជន​កម្ពុជា​របស់​លោក​នាយករដ្ឋមន្ត្រី ​ហ៊ុន​ សែន បាន​ឈ្នះ​ដោយ​សំឡេង​គាំទ្រ​ច្រើន​លើសលុប។ លោក ​សុខ ខេមរា​ នៃ ​វីអូអេ​ ពី​រដ្ឋធានី​វ៉ាស៊ីនតោន​ និង​ លោក ស៊ុន ណារិន​ ពី​រាជធានី​ភ្នំពេញ​ ជូន​កិច្ច​សន្ទនា​អំពី​រឿងនេះ​ដូច​តទៅ៖

នៅ​ថ្ងៃ​ទី២៣​ ខែកក្កដា​ ឆ្នាំ​២០២៣​នេះ កម្ពុជា​បាន​រៀបចំ​ការបោះឆ្នោត​ជ្រើស​តាំង​តំណាងរាស្រ្ត​អាណត្តិ​ទី៧​ ដោយ​មិន​មាន​គណបក្ស​ប្រឆាំង​ដ៏​សំខាន់​ចូលរួម។ អ្នកនាង​ កាន់ វិច្ឆិកា ​នៃ​វីអូអេ​បាន​ទៅ​យក​ព័ត៌មាន​នៅ​ការិយាល័យ​បោះឆ្នោត​ដែល​លោក ​ហ៊ុន ម៉ាណែត ​បេក្ខភាព​អនាគត​នាយករដ្ឋមន្រ្តី​បាន​ទៅ​បោះ​នៅ​ព្រឹក​ថ្ងៃអាទិត្យ​នេះ ​ក្នុង​សង្កាត់​បឹងកក់១ ​ខណ្ឌ​ទួលគោក។ សូម​ស្តាប់​កិច្ច​សន្ទនា​រវាង ​លោក សុខ ខេមរា​ នៃ​ វីអូអេ  ជាមួយ​អ្នកនាង ​កាន់ វិច្ឆិកា​ ពី​រាជធានី​ភ្នំពេញ​ដូចតទៅ៕

លទ្ធផល​នៃ​ការ​បោះឆ្នោត​ក្រៅ​ផ្លូវការ​បឋមៗ​ត្រូវ​គណបក្ស​កាន់​អំណាច​ប្រកាស​ឲ្យ​ដឹង​ថា​ឈ្នះ​នាំមុខ​ដាច់​គណបក្ស​ចំនួន​១៧ទៀត​ ក្នុង​ការ​បោះឆ្នោត​កាលពី​ថ្ងៃទី​២៣​ ខែក្កដា​ ឆ្នាំ​២០២៣ ដែល​គ្មាន​គណបក្ស​ជំទាស់​ចម្បង​ចូលរួម។ លោក​ ស៊ុន ណារិន ​អ្នកយកព័ត៌មាន​វីអូអេ បាន​ចុះ​យក​ព័ត៌មាន​នៅ​ការិយាល័យ​បោះឆ្នោត​មួយ​ចំនួន​ក្នុង​រាជធានី​ភ្នំពេញ ​ជូន​កិច្ច​សន្ទនា ​ជាមួយ​លោក ​សុខ ខេមរា ​នៃ​វីអូអេ ​ក្នុង​រដ្ឋធានី​វ៉ាស៊ីនតោន៕

ភ្លាមៗ​ក្រោយ​ការ​បោះឆ្នោត​ដែល​បង្ហាញ​លទ្ធផល​បឋមៗ​ក្រៅផ្លូវការ​ថា​ គណបក្ស​គ្រប់គ្រង​ប្រទេស​របស់​លោក​នាយក​រដ្ឋមន្ត្រី​ ហ៊ុន សែន​ ឈ្នះ​សំឡេង​លើស​លុប​ មេដឹកនាំ​ក្រុម​ជំទាស់​ដែល​កំពុង​និរទេស​ខ្លួន​នៅ​ក្រៅ​ប្រទេស​គឺ​លោក​ សម រង្ស៉ី ​បាន​អះអាង​ថា លទ្ធផល​នៃ​ការ​បោះឆ្នោត​ ដែល​គ្មាន​គណបក្ស​ជំទាស់​ដ៏​សំខាន់​ចូលរួម​នោះ​ នឹង​គ្មាន​ការ​ទទួល​ស្គាល់​ពី​សហគមន៍​អន្តរជាតិ​ទេ ហើយ​លោក​បន្ត​ថា​ ផែនការ​ផ្ទេរ​អំណាច​របស់​លោក ​ហ៊ុន សែន ដល់​លោក ហ៊ុន ម៉ាណែត​ ជា​កូន​ច្បង​ក៏​មិន​អាច​ទៅ​រួចដែរ។ លោក​ សម រង្ស៉ី បាន​ផ្តល់​កិច្ចសម្ភាសន៍​ផ្តាច់មុខ​ តាម​ទូរស័ព្ទ​ជាមួយ​លោក ​សុខ ខេមរា ​នៃ ​វីអូអេ​ ក្នុង​រដ្ឋធានី​វ៉ាស៊ីនតោន​កាល​ពី​ថ្ងៃអាទិត្យ។ សូម​ស្តាប់​កិច្ចសម្ភាសន៍​នេះ​ដូច​តទៅ៖