O Descodificador

A investigadora Hilda Romero Velo é a convidada do novo episodio de O Descodificador, o pódcast de GCiencia en colaboración co CITIC. Falamos sobre a súa tese de doutoramento, centrada en tres eixes vertebradores: a música tradicional galega, a computación e a bioloxía. Descubre connosco que teñen en común estas disciplinas tan dispares.

O proxecto Talentos Inclusivos xa vai pola sexta edición e acumula ás súas costas máis dunha decena de premios. A iniciativa do CITIC promove as vocacións STEM entre o alumnado de secundaria ao tempo que busca solucións prácticas para mellorar a vida de persoas con parálise cerebral. Neste novo episodio de O Descodificador convidamos a investigadora do CITIC Nieves Pedreira; a coordinadora do proxecto dende Aspace Coruña, Iria Robles; o usuario Jorge Santiago; a profesora do IES Poeta Díaz Castro de Guitiriz Marta López; e o alumno Juan Fraga.

O proxecto europeo InNoPor traballa cun claro obxectivo: crear simulacións para predicir mellor o comportamento de fluídos como o sangue e a lava. A coordinadora da iniciativa é a investigadora do CITIC María González Taboada.

A intelixencia artificial xa forma parte indiscutible da nosa vida cotiá. Non obstante, ten unha cara B non sempre visible: o seu custo ambiental. Igual que outras tecnoloxías e aparellos de uso diario, como os electrodomésticos e os coches, a investigación encamíñase a crear modelos tan precisos como sostible. E aquí onde xoga un papel fundamental o concepto "algoritmo verde". Neste novo episodio de O Descodificador, o pódcast de GCiencia en colaboración co CITIC, analizamos o termo coas investigadoras do centro Amparo Alonso e Bertha Guijarro.

Novo episodio de O Descodificador, o podcast de GCiencia en colaboración co CITIC da UDC. Falamos co catedrático Óscar Fontenla Romero, experto en ciencias da computación e intelixencia artificial. Está inmerso no proxecto Casandra, unha iniciativa cun claro obxectivo: modernizar a fabricación industrial e facela intelixente.

O cancro é unha enfermidade complexa, ao igual que o seu tratamento. Este pode provocar diversos efectos secundarios. No caso do cancro de mama, a cardiotoxicidade é unha desas consecuencias non desexadas: cando as substancias afectan ao corazón. Entender que perfil de paciente é máis proclive a ter esas consecuencias é importante para poder mellorar os tratamentos das persoas. A cardiotoxicidade pode ter consecuencias graves, como arritmias, isquemias ou ata insuficiencias cardíacas.

Os avances en comunicacións so esenciais nas tecnoloxías do noso día a día pero, en moitas ocasións, non teñen un importante impacto mediático. Desde a pagar co móbil, un reloxo intelixente ou dispositivos de realidade aumentada, todos teñen a necesidade de que a transmisión de información inalámbrica sexa eficiente e sinxela. Tamén cos coches intelixentes, con sistemas que requiren información masiva. E neste ámbito traballa Dariel Pereira, experto do Centro de Investigación en TIC (CITIC) dentro do programa 3i-ICT. Falamos con el en O Descodificador para afondar nestas innovacións ocultas que cambian o noso día a día.

O concepto 'conflito' fai referencia a múltiples dimensións: dende a toma de decisións entre varias persoas ata o cambio climático e o terrorismo. Os videoxogos poden ser un potente recurso pedagóxico para traballar o termo nas aulas de secundaria. E iso é precisamente o obxectivo do proxecto europeo InterGames, que adapta recursos habitualmente empregados no lecer para traballar co alumnado de 14 a 16 anos. Nesta iniciativa participa María Luz Castro Pena, investigadora do CITIC, coa que falamos neste novo episodio de O Descodificador.

O proxecto Talentos Inclusivos vai pola súa quinta edición. Impulsado polo CITIC en colaboración con ASPACE-GALICIA, o obxectivo é que alumnado de secundaria deseñe aplicacións tecnolóxicas que faciliten a vida das persoas con parálise cerebral. Neste segundo episodio da terceira tempada de O Descodificador falamos co investigador do CITIC Diego Darriba, cos profesores Óscar Rey e Fina Paulos do IES Maximino Romero de Lema, coa súa alumna Lola Cumplido, coa coordinadora de Talentos Inclusivos e educadora social en ASPACE-GALICIA, Iria Robles, e co usuario Jorge Liñares.

As finanzas non só son economía, nin cartos, nin diñeiro. As finanzas tamén son matemáticas. Neste primeiro episodio da terceira tempada de O Descodificador, o podcast de GCiencia en colaboración co CITIC, o investigador Álvaro Leitao Rodríguez explicaranos que papel xoga a computación cuántica no eido das finanzas. E como isto pode mellorar a nosa vida cotiá.

O CITIC está acreditado como Centro de Excelencia e membro da Rede CiGUS para o período 2024-2027. A acreditación, estruturación e mellora do CITIC está cofinanciada pola Xunta de Galicia e nun 60% pola Unión Europea no marco do Programa Operativo FEDER Galicia 2021-2027, co obxectivo temático de promover "unha Europa máis intelixente: transformación innovadora e intelixente" (ED431G 2023/01).