Naalakkersuisut siulittaasuat Inatsisartut ukiaanerani ataatsimiinnerat aallarnerlugu tallimanngormat kingullermik oqalugiarpoq, taannalu Inatsisartunit ataasinngormat oqaluuserineqarpoq. Partiit Inatsisartuni ilaasortaatitaqartut siulittaasuisa oqalugiaat tunngavigalugu oqallitsippavut. Peqataasut tassaapput: Demokraatit siulittaasuat Jens Frederik Nielsen, Naleqqap siulittaasua Pele Broberg, Siumup siulittaasua Erik Jensen, Inuit Ataqatigiit siulittaasuat Múte Bourup Egede aamma Atassutip siulittaasua Aqqalu C. Jerimiassen. Aaqqissuisoq Thora Monrad Hansen

Ataatsimoorluta inissiat peqqissuutitsigit. Naalakkersuisut Namminersorlutik Oqartussat inissiaataannik iluarsartuussinissamut pilersaarutaat" saqqummiunneqaqqammerpoq. Partiit Inatsisartuni ilaasortaatitaqartut Oqalliffimmi peqataapput, tassaappullu: Naleqqaminngaanniit Pele Broberg, Siumuminngaanniit Kuno Fencker, Atassumminngaanniit Bentiaraq Ottosen, Inuit Ataqatigiinninngaanniit Kristian Jerimiassen aamma Demokraatininngaanniit Jens-Frederik Nielsen. Aaqqissuisoq Thora Monrad Hansen.

Inatsisartuni ilaasortat maannamut 31-upput, taama amerlassuseqartuaannassappat? Kisitseriaaseq allanngortinneqassava? Nuna tamakkerlugu qinersivik ataasiinnaasoq allanngortinneqartariaqarpa, kommuunitoqqat qinersiviit uterfigineqassappat? Apeqqutit ilaatigut taama ittut Inatsisartuni ilaasortap Naleqqaminngaanneersup Jens Napaattuup Inatsisartunut oqallisissiarisimavai. Taakku akissutissarsiniarlugit Inatsisartuni partiit aallartitaat oqallitsippavut, tassaappullu: Inuit Ataqatigiinninngaanniit Aqqaluaq B. Egede, Siumuminngaanniit Kuno Fencker, Demokraatininngaanniit Nivi Olsen, Atassumminngaanniit Aqqalu C. Jerimiassen aamma Naleqqaminngaanneersoq Jens Napaattooq. Aaqqissuisoq Thora Monrad Hansen.

Arctic Umiaq Linemut kiffartuussinissamut isumaqatigiissut aappaagu ukiup naanerani naassaaq, taassuma kingorna angallassinikkut aaqqissuussaaneq qanoq iluseqassava? Arctic Umiaq Linemik isumaqatigiissut nanginneqassava imaluunniit taamaatinneqassava? Oqalliffimmi peqataasut tassaapput: Naleqqaminngaanniit Pele Broberg, Demokraatininngaanniit Jens Frederik Nielsen, Atassumminngaanniit Aqqalu C. Jerimiassen aamma Siumuminngaanniit Anders Olsen. Aaqqissuisoq Thora Monrad Hansen.

Oqalliffimmi qulequtarineqartoq tassaavoq Naalakkersuisut 2025-mut Aningaasanut Inatsisissatut Siunnersuutaat. Oqallinnermi peqataasut tassaapput Demokraatit siulittaasuat Jens Frederik Nielsen, Siumup siulittaasua Erik Jensen, Inuit Ataqatigiinninngaanniit Asii Chemnitz Narup, Naleqqap siulittaasua Pele Broberg aamma Atassutip siulittaasua Aqqalu C. Jerimiassen.

Oqalliffimmi aqutsisuuvoq Thora Monrad Hansen.

Avannaata Kommuniata siunissaa qanoq isikkoqarpa? Aaqqissuisoq Thora Monrad Hansen.

Kalaallit Nunaanni Danmarkimilu tjenestemandit pensionisiallit atugarisaat Ilinniartitsisut Kattuffiata IMAK-ip misissuiffigisimavai. Misissuinermi inernerineqartut aammali soraarnerussutisiallit allat Danmarkimut nuuttarnerat Oqalliffimmi sammivavut. Tassunga atatillugu Nunatsinni Perorsaasut Kattuffianni siulittaasoq Arnaq Brønlund aamma Ilinniartitsisut Meeqqat Atuarfianneersut Kattuffianni IMAK-imi siulittaasoq Elna Heilmann isummersortinneqarput. Aaqqissuisoq Thora Monrad Hansen.

Namminersorneq pillugu Inatsimmut §21-mut aamma Naalagaaffinngornissaq pillugu isumasiuilluni taasisitsinissamut tunngasoq Inatsisartut ataatsimoortillugit maajip 28-ani aappassaanik naggataasumillu oqaluuseraat. Partiit Inatsisartuni ilaasortaatitaqartut Oqalliffimmut peqataatitaqarnissaannik periarfissinnikuuavut, peqataasullu tassaapput: Inuit Ataqatigiinninngaanniit Harald Bianco, Siumuminngaanniit Kuno Fencker, Naleqqaminngaanniit Pele Broberg aamma Atassumminngaanniit Aqqalu C. Jerimiassen. Aaqqissuisoq Thora Monrad Hansen.

"Naalakkersuisut takornariaqarneq pillugu tusarniaassutit marluk maanna ingerlappaat. Taakku tamarmik kikkut takornarialerisuusarnissaannut aamma sumiiffinni assigiinngitsuni takornariartitsisarnermut tunngassuteqarput. Inatsisit atuutilissappata tamarmik januaarip aallaqqaataani 2025-imi atuutilissapput. Nunatsinni takornarialerineq qanoq ilusilersussavarput? Oqalliffimmi tamanna sammissavarput. Oqalliffimmi peqataasut tassaapput Inatsisartuni ilaasortat; Siumuminngaanniit Lars Poulsen, Naleqqaminngaanniit Pele Broberg, Demokraatininngaanniit Jens-Frederik Nielsen, Inuit Ataqatigiinninngaanniit Mikivsuk Thomassen aamma Atassumminngaanniit Aqqalu C. Jerimiassen. Aaqqissuisoq Thora Monrad Hansen."

Aalisarnermut inatsisissatut siunnersuut Inatsisartut sisamanngornermi 16.maj oqaluuserimmassuk amerlanerussuteqartut, tassalu partiit Naalakkersuisuutitaqartut, akueraat. Taamaalilluni aalisarnermut inatsit nutaaq 2025-mi ukiup aallartinneranit atuutilissaaq. Aalisarnermut inatsisip suliarineqarnera naammassineqarneralu pillugit Inatsisartuni partiit siulittaasui oqallitsippavut, tassaappullu: Inuit Ataqatigiit siulittaasuat Múte B. Egede, Siumup siulittaasua Erik Jensen, Naleqqap siulittaasua Pele Broberg, Demokraatit siulittaasuat Jens-Frederik Nielsen aamma Atassutip siulittaasua Aqqalu C. Jerimiassen. Aaqqissuisoq Thora Monrad Hansen.