Edición número 1438 de O Recanto do Corcovado. Puidestes escoitala o venres 14 de febreiro a través de RKV Radio Vigo, e o sábado 15 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 19 a través de Radio Crónica Folk Musical e o sábado 22 na sintonía de Rádio Filispim.

Estruturamos o programa desta semana en dous bloques diferenciados. No primeiro, entramos de cheo na fusión internacional cos novos discos de Jupiter & Okwess e da banda Dowdelin. Na segunda parte do programa desprazámonos até Finlandia para escoitar “Joku raja rakkaudessakin” (No amor tamén debe haber algún límite), o novo traballo dos Pauanne. Descubrimos, ademais, o disco colaborativo “Nouse luonto” (Arriba, natureza), onde participan diferentes artistas de Finlandia. O obxectivo do disco é fondamente político: o disco foi creado como mecanismo de defensa e conversación da biodiversidade do país nórdico. Colaboran, entre outros nomes, Kimmo Pohjonen, Maria Kalaniemi, Maija Kauhanen e Akkajee. Na recta final do programa seguimos a explorar o repertorio do novo disco da banda UTU.

Edición número 1437 de O Recanto do Corcovado. Puidestes escoitala o venres 7 de febreiro a través de RKV Radio Vigo, e o sábado 8 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 12 a través de Radio Crónica Folk Musical e o sábado 15 na sintonía de Rádio Filispim.

Os galegos Sumrrá están de festa: no presente ano celebran o seu vixésimo quinto aniversario. No programa desta semana aproveitamos esta circunstancia para recuperar a súa música e para introducir diferentes novas relacionadas coa banda: preparan xira e novo disco, o cal sairá á rúa a finais do presente ano 2025. Ben de cheo no mundo do jazz, escoitamos tamén as últimas producións do selo WeJazz, as asinadas por Joona Toivanen e Timo Lassy. Conectámolas con “Moondial”, o novo traballo para guitarra soa de Pat Metheny, prolongación filosófico-musical do seu anterior “Dreambox”. Na recta final do programa descubrimos “Azken uda”, o último disco do trompetista bilbaíno Juan de Diego. Despedímonos con “Grande-Terre”, disco gravado por Roy Hargrove no ano 1998 que vén de ser editado hai escasos meses.

Edición número 1436 de O Recanto do Corcovado. Puidestes escoitala o venres 31 de xaneiro a través de RKV Radio Vigo, e o sábado 1 de febreiro na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 5 a través de Radio Crónica Folk Musical e o sábado 8 na sintonía de Rádio Filispim.

A Banda da Loba vén de presentar ao vivo o seu novo traballo, “Lovismo”. Aproveitando esta circunstancia, escoitamos varias pezas do disco. O programa desta semana está cargado de novidades discográficas. Dende Portugal escoitamos os novos sinxelos de Rodrigo Leão e Omiri. O primeiro, “O rapaz da montanha”, forma parte dun disco que aínda non ten data de saída. Omiri, porén, anuncia o seu novo disco para o 7 de febreiro. Leva por título “Modas novas e algumas velhas”. Conectámolo co último sinxelo dos De Ninghures, “O último bale”. Completamos o programa con máis novidades: saltamos do novo EP do trío Trinka á nova música do artista de Compostela Ronroneo, sen nos esquecer das últimas producións da cubana Rita Donte e de Amparo Sánchez.

Edición número 1435 de O Recanto do Corcovado. Puidestes escoitala o venres 24 de xaneiro a través de RKV Radio Vigo, e o sábado 25 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 29 a través de Radio Crónica Folk Musical e o sábado 1 de febreiro na sintonía de Rádio Filispim.

Esta semana propóñovos un programa de texturas peninsulares e internacionais: escoitamos, no inicio, propostas ancoradas na música popular e tradicional que, de xeito evidente, tentan abrir vieiros de expresión musical diferenciados. Este é o caso dos novos traballos de Galgo, Casapalma e Álvaro Romero, desta volta co produtor Carlos Gárate. Escoitamos a seguir o último disco do compositor Fran MM Cabeza de Vaca, quen reúne en “Pistas de baile” pezas escritas para espectáculos de danza ao longo dos últimos vinte anos. Na recta final do programa navegamos por augas musicais diversas: do jazz ambiental de Silvan Strauss saltamos á new wave contemporánea dos holandeses Baby Berserk; da fusión entre soul, afrobeat e ritmos crioulos da banda Dowdelin, pasamos ao remix creado por Mo’Horizons a partir dun tema orixinal da brasileira Laiz.

Edición número 1434 de O Recanto do Corcovado. Puidestes escoitala o venres 17 de xaneiro a través de RKV Radio Vigo, e o sábado 18 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 22 a través de Radio Crónica Folk Musical e o sábado 25, tamén de xaneiro, na sintonía de Rádio Filispim.

UTU é unha das bandas máis inclasificables do panorama musical de Finlandia. Cultivan un pop de autor repleto de referencias cruzadas: ademais de certos matices progresivos, insiren paisaxes harmónicas que nos levan á música de cámara e, en ocasións, á propia música tradicional. Veñen de editar o seu novo disco, “Love Collection - By the Ashes That Used to Be the Everlasting Fire”, un traballo de texturas melancólicas e amplas intensidades sonoras. Velaiquí o noso disco destacado da semana. Os UTU están comandados por Petra Poutanen, quen tamén defende o seu propio proxecto en solitario. Faino baixo o alcume de Pelkkä Poutanen (“Unicamente a Poutanen”). No pasado ano 2024 presentou o proxecto no WOMEX de Manchester. Poutanen vén de estrear dous sinxelos que, en principio, funcionan como adianto do que será o seu segundo disco. Escoitamos ámbolos dous. Tamén presentamos, sen saírmos de Finlandia, os novos discos de Ánnámáret, Salamakannel e Pekko Käppi. Completamos o programa con “Valsette”, primeiro sinxelo extraído do novo disco dos Frigg. Levará por título “Dreamscapes” e será editado por Bafe’s Factory o vindeiro mes de febreiro.

Edición número 1433 de O Recanto do Corcovado. Puidestes escoitala o venres 10 de xaneiro a través de RKV Radio Vigo, e o sábado 11 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 15 a través de Radio Crónica Folk Musical e o sábado 18, tamén de xaneiro, na sintonía de Rádio Filispim.

Esta semana pechamos o noso repaso aos mellores discos galegos do pasado ano. Desvelamos que traballos ocupan os seis primeiros postos da nosa listaxe. A Pedreira, con “Basal”, asina o que na nosa opinión é o mellor disco galego do pasado ano 2024:

6. Hilario Rodeiro: “Pausa”. Errabal Jazz.

5. Carme López Carmela: “Vinde todas”. Carme López.

4. Baldo Martínez: “Música imaginaria”. Karonte.

3. Abe Rábade Trío: “Tempo de cor”. Karonte.

2. Xabier Díaz e as Adufeiras de Salitre: “Axúdame a sentir”. Músicas de salitre.

1. A Pedreira: “Basal”. Raso.

Edición número 1432 de O Recanto do Corcovado. Puidestes escoitala o venres 3 de xaneiro a través de RKV Radio Vigo, e o sábado 4 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 8 a través de Radio Crónica Folk Musical e o sábado 11, tamén de xaneiro, na sintonía de Rádio Filispim.

Esta semana, seguindo a nosa liña de traballo habitual, ofrecémosvos a primeira parte do noso repaso aos mellores 15 discos galegos do pasado ano. Danos tempo a escoitar do posto número 15 ao posto número 7. Lembrade que para elaborar esta listaxe respectamos as seguintes condicións:

• Só consideramos discos presentados no programa e editados ao longo do 2024. Aqueles traballos que polo motivo que sexa non chegaron ás nosas mans, non serán valorados.

• Non incluímos escolmas nin discos gravados ao vivo, a non ser que estes últimos conteñan un repertorio orixinal.

• Só valoramos os discos colectivos cando un dos seus artistas principais é galego ou galega.

• Só consideramos discos completos. Non entran na listaxe nin EP’s nin sinxelos.

Sodes quen de intuír que discos imos incluír na nosa listaxe?

Aquí tedes os primeiros postos da listaxe:

15. Xosé Lois Romero: “A mulher Lyrio”. Raso.

14. Carme López: “Quintela”. Warm Winters Ltd.

13. Catuxa Salom: “Cāldo”. Catuxa Salom.

12. Mocho Gris: “2”. Raso.

11. Terrae: “Medra”. Human Sounds of Nature Records.

10. Stormy Trucks: “Darl Lady”. Tiny Moon Records.

9. Baiuca: “Barullo”. Raso.

8. Narci Rodríguez dA Trío: “The Glitch: Suite Of the Sad Young Men”. Autoedición.

7. Matt Otto, Abe Rábade e Xosé Miguélez: “The Landscape Listens”. Tiny Moon Records.

Edición número 1431 de O Recanto do Corcovado. Puidestes escoitala o venres 27 de decembro a través de RKV Radio Vigo, e o sábado 28 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 1 de xaneiro a través de Radio Crónica Folk Musical e o sábado 4, tamén de xaneiro, na sintonía de Rádio Filispim.

Chegamos ao remate do ano 2024. Para despedir o ano, preséntovos dous discos sobresalientes, ámbolos dous asinados por artistas galegos. O primeiro, “Tempo de cor”, de Abe Rábade. Gravouno, de novo, con Bruno Pedroso á batería e Pablo Martín Caminero ao contrabaixo. O disco funciona como una reflexión de natureza metamusical onde Rábade dialoga coas pinturas da artista Beatriz Saá. O resultado final é extraordinario. Segue esta mesma liña de excelencia “Música imaginaria”, a nova produción de Baldo Martínez. O proxecto foi apadriñado polo Festival de Jazz de Vitoria-Gasteiz a partires dunha residencia que se concretou nos escenarios do propio festival, no ano 2023. A música deste disco é complexa e inqueda. Baldo Martínez foxe de posicións acomodadas para crear un traballo coral onde damos con referencias musicais plurais —da música popular ao bop; dos loops melódicos obsesivos á progresión rítmica máis imprevisíbel—. Estes discos son, sen dúbida, dúas das mellores producións galegas do 2024. Na recta final do programa estréovos o primeiro sinxelo extraído de “Gravity”, o novo disco do trío de Joona Toivanen. Editarao WeJazz o vindeiro 31 de xaneiro. Completamos o programa con “After Bach II”, segundo volume consagrado á revisión persoal que Brad Mehldau realiza da música de Johann Sebastian Bach.

Edición número 1430 de O Recanto do Corcovado. Puidestes escoitala o venres 14 de decembro a través de RKV Radio Vigo, e o sábado 21 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 25 de decembro a través de Radio Crónica Folk Musical e o sábado 28 na sintonía de Rádio Filispim.

Xabier Díaz e as Adufeiras de Salitre veñen de adiantar as datas da súa xira de Nadal. Son catro, todas en decembro: Verín (Auditorio, sábado 21, 20:30h); Lugo (Sala Tebras, domingo 22, 19:30h); Narón (Pazo da cultural, sábado 28, 20:00h); Boiro (A Pousada da Galiza Imaxinaria, domingo 29, 19:00h). Aproveitando esta circunstancia, recuperamos un par de temas do seu último disco, “Axúdame a sentir”. Estréovos, sen saírmos do país, os últimos sinxelos de De Ninghures e dos Dios Ke Te Crew, para a seguir continuarmos a explorar a obra musical de Carme López. Na segunda parte do programa mudamos de rexistro para escoitar “No Title as of 13 February 2024 28,340 Dead”, o novo disco dos Godspeed You! Black Emperor. O título fai referencia aos palestinos e palestinas asasinadas dende o comezo da invasión israelita de Gaza, o pasado 7 de outubro do 2023, até a data de publicación do disco. É un proxecto brillante, cheo de reflexións sonoras cargadas de compromiso político.

Edición número 1429 de O Recanto do Corcovado. Puidestes escoitala o venres 13 de decembro a través de RKV Radio Vigo, e o sábado 14 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 18 de decembro a través de Radio Crónica Folk Musical e o sábado 21 na sintonía de Rádio Filispim.

No programa desta semana escoitamos diferentes novidades. Parte delas están asinadas por artistas africanos e africanas. É o caso das novas producións de Les Amazones d’Afrique, Aboubakar Traoré & Balima e Kin'Gongolo Kiniata. Exploramos, ademais, os últimos discos de bandas nacidas en Europa onde converxen os talentos de diferentes músicos, todos eles e todas elas con diferentes raíces xeográficas. Pertencen a esta liña de traballo os últimos discos de Sonic Interventions, Tamala e Montparnasse Musique. Na parte final do programa entramos de cheo na conexión artística entre África e a lusofonía con dous sinxelos recentemente pulicados, os asinados polo trío Trinka e os Jupiter & Okwes. Este últimos preséntannos “Les bons comptes”, primeiro adianto do seu cuarto disco. Gravárono coa complicidade ás voces solitas da brasileira Flávia Coelho.