Nace unha nova organización para facer custodia do territorio en Galiza. Faise chamar Bétula e dedicarase a promover e desenvolver proxectos de custodia nos bosques atlánticos de Galiza. Aínda que está nunha fase incial, a súa vocación é de permanencia e de ámbito galego.

ADEGA pon en marcha a IX edición do programa de educación ambiental "O lixo desde o teu concello" na Mancomunidade do Barbanza. Este programa promove outro modelo de xestión e separación de residuos sólidos urbanos máis respeituoso co medio natural e coa saúde das persoas.

Galiza está nunha zona de risco 2 de contaminación de radón, o que equivale a un risco elevado. A USC elaborou un mapa de riscos galego para determinar as zonas máis vulnerables á contaminación por este gas, que é o segundo causante dos cancros de pulmón no mundo. Non obstante, as administracións públicas aínda desatenden a importancia deste tipo de radiación natural para a saúde humana.

As novas ambientais da semana en Galiza están dispoñibles para escoitar. Entérate de como lle foi á natureza galega nos últimos días...

Unha asociación estudantil de Lugo, formada por alumnos e alumnas de Veterinaria, organizan por primeira vez unhas xornadas de protección animal e medio ambiente para esta fin de semana. Neste espazo coñeceremos as temáticas a tratar nestas xornadas, os seus obxectivos e quen van ser os relatores/as.

Este mexillón de Nova Zelanda descubriuse hai poucos anos nas rías do sur de Galiza, pero estase a estender xa ás rías medias. Constitúe unha seria ameaza para o sector mexiloeiro e imos saber porqué neste programa coa axuda do biólogo mariño, Alexandre García.

Esta é a pregunta á que debe responder a Xunta diante dos proxectos mineiros que solicitan a explotación de terras de Galiza eminentemente produtivas en alimentos. As dúas actividades na mesma terra son incompatibles, por iso, da decisión que tome a Xunta, vai depender o futuro de zonas agrarias como A Limia ou a Terra Chá. Escoitamos a análise que fai desta dicotomía o Sindicato Labrego Galego.

Os proxectos da minaría emerxente non son os únicos que constitúen a nova era do sector en Galiza. Outros proxectos extractivos de minerais máis comúns están a constituírse como ameaza de zonas agrogandeiras de Galiza tremendamente produtivas. É o caso da Limia, que agora se enfronta aos intereses dunha empresa castellonense que pretende explotar feldespato na zona onde se produce o 90% da pataca con indicación xeográfica de Galiza.

Escoita neste espazo Cerna cales foron as noticiais do eido ambiental galego máis relevantes da última semana. En 10 minutos contámoschas todas!

Algunhas empresas solicitan que o seu proxecto industrial sexa considerado estratéxico. Isto ofrece unha serie de vantaxes á promotora en termos de tramitacións, subvencións e preferencia sobre outros usos. A este modelos de proxecto quérense acoller algúns dos últimos proxectos mineiros que se están a tramitar en Galiza. Hoxe coñecemos coa profesora en dereito ambiental o que implica que un destes proxectos sexa declarado estratéxico para o país.