Radio Occitania

Vaquí un dels artistas mai perfeccionistas de Tolosa… Deep Kellins nos ven de la vila ròsa e explòra lo rap dempuèi son adolescéncia amb una solida formacion musicala per l’assolidar. Ne sortiguèt un primièr album « Ego » al qual succediguèt fa gaire l’album « JDLSP » (Je danse sous la pluie en francés). Après la composicion de setanta tròces dont multipliquèt las versions, ne retenguèt uèit qu’acabèron sus aquel album dont festejarà la sortida lo 21 de decembre al Connexion, sala mitica de rap a Tolosa.

Soutenez-nous sur Patreon et HelloAsso !

« Estivada, es lo moment que pòdes tornar veire lo gari qu’aviás pas vist dempuèi un an ». Atal parlava Christian Grenet, ancian director e co-fondator de l’Estivada de Rodés quand ne voliá donar una definicion. Aquel festenal, primièr localisat puèi interregional, perdèt pauc a pauc sa vocacion e son ample inicials per venir la « Festivada »… Un festenal de mai qu’auriam de mal a distinguir d’un autre. Pels sòcis del collectiu « Gardarem l’Estivada » es temps de tornar fondar aquel festenal que permetiá al monde occitanista de se retrobar, segur, mas tanben de far descobrir la scèna occitana al public que veniá cada ser al còr de vila de Rodés. Primaèl Montgausi, artista roergàs nos a anonciat una assemblada generala pel 4 de novembre dins la capitala roergata. Torna primièr amb nosautres sus la genèsi d’aquel collectiu.

Soutenez-nous sur Patreon et HelloAsso !

Los movements occitanistas politics Prenon posicion dins lo dossièr de l’A69, autorota en bastison entre Tolosa e Castras. Alara que lo Partit Occitan a demandat l’arrèst immediat de las òbras, lo Partit de la Nacion Occitana pren el la posicion invèrsa. Dins un comunicat, se declara en favor del projècte pel desvolopament economic de totes los païses occitans. Sèrgi Viaule, sòci del PNO, nos a plan volgut precisar lo prepaus de son partit sus aquel dossièr.

Soutenez-nous sur Patreon et HelloAsso !

Cinquanta ans qu’aquò dura… De memòria d’òme, es pas de bon se sovenir del darrièr còp que Nadau faguèt fogaça sus una data. Lor chorma de fisèls, digna de la "Red Army" del Munster, los seguís d’en pertot quand pòt… E es pas un pichòt viatge en TGV cap a la capitala que los arrestarà per anar veire lor còla favorida a l’Olympia. Se vos caliá encara una pròva : a l’ora d’escriure aquelas linhas, las cinc datas organisadas al Zenith de Pau (entre novembre e febrièr) per festejar aquel cinquantenari son ja totas completas ! Jan de Nadau nos a plan volgut dire dos mots abans de tornar partir barrutlar.

Soutenez-nous sur Patreon et HelloAsso !

I a pas de destinada, juste d’actes… Esperem que perdonaretz aquela referéncia a un film de sciéncia-ficcion de las annadas nonanta mas es un pauc çò qu’anima lo tolosan Félix (fòto Ksenia Barzakovskaia) e son concèrt-espectacle « Demain est annulé ». Mesclant la cançon, lo hip hop e la pop, celèbra l’ambivaléncia de deman que serà pas encantant o desencantat … serà çò que serà. Bon, trèva de lapalissadas, escotem lo Fèlix nos parlar de son trabalh e de sos projèctes a venir.

Soutenez-nous sur Patreon et HelloAsso !

Lo creis per la rota, una idèa qu’a viscut ? Es lo debat soslevat en permanéncia per cada grand projècte d’infrastructura qu’es supausat ajudar un parçan a se desvolopar. La vila de Castras es la darrièra aglomeracion de mai de 100 000 estatjants a dispausar pas d’una ligason autorotièra amb Tolosa. D’entrepresas e d’elegits la reclaman per desvolopar lor afar mas tanben far venir d’autras entrepresas. Aquela logica es encara viabla a l’ora d’ara, a l’ora del capvirament climatic ? Es una de las questions qu’avèm pausadas al nòstre economista maison Domenge Salgon.

Soutenez-nous sur Patreon et HelloAsso !

Abans de se dire Moussu T, lo monde lo disián Prince Tatou. Fa quaranta ans, lo futur fondator del Massilia Sound System anava d’una sala foceana l’autra per pausar las platinas e far improvisar los MCs sus las « versions » o musicas instrumentalas que se trobavan sus las fàcias B dels 45 torns que viravan a contunhar. Ara acompanhat de Kayalik, DJ del Massilia Sound System e après quasi quaranta ans de servici bons e leials sus mai d’un projècte, Tatou s’en torna a sas primièras amors en prepausant de sesilhas sound system. La tecnologia a evolucionat mas l’esperit el es demorat.

Soutenez-nous sur Patreon et HelloAsso !

Dempuèi quasi dètz ans, Opus s’es fait un nom dins la vila ròsa. Aquel magazine en linha associatiu vos ten assabentats de l’actualitat musicala de la scèna tolosana a l’escrit, en audiò en vidèo. E coma se bastava pas, an aviat l’an passat un dispositiu d’acompanhament d’artistas batejat « Focus d’Opus » que se debana pendent un an e se conclutz sus un concèrt a la sala « Le metronum » situada dins lo barri mondin de Bòrda Roja. Rémy Sirieix, fondator d’Opus nos donèt lo programa del Focus d’Opus de 2023, programat pel 1èr de decembre.

Soutenez-nous sur Patreon et HelloAsso !

Jean Olivier docteur en écologie qui évoque les destructions du vivant

Mustapha Amokrane  (Mouss et Akim) qui se produiront au Métronum le 4 novembre

Nicolas Schaefers maraîcher bio à Quint Fonsegrives

La poétesse Osage Chelsea Tayrien Hiks

Soutenez-nous sur Patreon et HelloAsso !

En trenta ans, l’associacion bigordana Parlem s’es installada dins lo païsatge. 

Assegura mantunas activitats coma de corses de lenga pels adultes, d’estagis de quatre jorns, de formacions als personals dels EHPAD o de las estructuras d'enfància pichona… 

Trabalhan a dinamisar e faire pujar l’ofèrta per far venir l’occitan disponible al mai grand nombre.
Un concèrt de sosten se debanarà lo 25 de novembre de 2023 a la glèisa de Julhan en companhiá de grops bigordans e de Gèrs. 

Mai de detalhs amb Cristòu Dubertrand, salariat de l’estructura.

Soutenez-nous sur Patreon et HelloAsso !