Orpippassuarni arnamik naapitaqarneq, Jiisusimik takuneq kiisalu ajortup naalagaaffianut aallerneq. Tasiilameersup Nivi Bianco Sanimuinnaap sinnattorisimasani oqaluttuarai. Aallakaatitami sinnattut oqaluttuarineqartut nassuiaatissarsiorlugit sinnattut isumaanik nassuiaanermik ilinniagalimmut Rosa Marie Høyer Lorentzenimut nassuiartippagut. /Salomine Tobiassen.

Telegramip siulliup nassiunneqarneraniit ukiut 100-it qaangiupput. Qanga nalunaarasuartaateqarnerup iluani sulisimasut oqaluttuaat sammivagut. Uanilu Telep kingumut qiviarluta aallartinneranit allaaserisat tusarfigissavagut. Aallakaatitassiortoq: Maliinannguaq Marcussen-Mølgaard.

2025-mi Innarluutilinnut sapaatip akunneritinneqartumi 41-mi meeraq ersinngitsumik innarluutilik qulequtaralugu, angajoqqaat qatanngutillu qitiutinneqarput. Aallakaatitami Inuit isumaliortaatsikkut napparsimasut innarluuteqartullu Sugisaasa Peqatigiiffiata SUGISAP siunertaa suliai sammillugit siulittaasoq Nina Møller, aamma isumaliortaatsikkut napparsimasumut ataataasoq Ezekias Therkelsen sugisatut inuunermi aqqusaarsimasani misigisartakkani suliniuteqartarnerillu oqaluttuarai. Aamma Inuit Innarluutillit pillugit oqaaseqartartoq Qivioq Løvstrøm ersinngitsumik innarluuteqarneq pillugu oqaaseqartipparput. Aallakaatitassiortoq: Salomine Tobiassen

Napasumi inunngortoq Julie Møller meeraanerminit misigisartakkaminik, ilaatigullu sinnattuminik eqquuttartunik, misigisaminillu eqqumiittunik oqaluttuarpoq. Aallakatitassiortoq: Maliinannguaq Marcussen-Mølgaard

Nipilersukkat nuannarisagut kinaassutsitsinnut ilisarnaataalluartuusinnaapput. Nipilersukkat erinnat tallimat atorlugit peqatigisarput Anton M. Petersen ilisarinerulaarumallugu appillattaaqatigaarput, tusakkagullu sammilaartarlugit. Aallakaatitamik suliarinnittoq Arqaluk Brandt Johansen.

Nuka Didriksen, Hans Lange-ugaluup 60-nik ukioqalerfissaraluani taalliaanik erinniaanillu tallimanik imaqartumik EP-mik saqqummersitsivoq atserlugu 'Suli akisuavutit'. Nuka tamanna pillugu aallakaatitsivimmi pulaartoralugu oqaloqatigaarput. Aallakaatitamik suliarinnittoq Arqaluk Brandt Johansen.