Rev. Bidonbok Syiem

Devotional (25th March 2021)

Topic (22nd -28th March 2021) – “Ka jingkwah rhah” (Greed).

“To sumar, to kiar ruh na ka jingkwah lalot baroh : namar ka jingim u briew kam shong satia ha ka jingdap kyrhai jong kiei kiei kiba u don”( Loukas 12:15)

**************************************

U Philip Parham uba dei u British diplomat, u iathuh ia kawei ka jingiathuhkhana shaphang uwei u briew uba riewspah ne u Industrialist ha ka jingiakren ka jong u bad uwei u nongtongdohkha. Uta u riewspah ula iwit bad um lah ban peit haba u iohi ia uwei u nongtong dohkha ba u shong hajan ka lieng ka jong u, bad ha ka jingpeit ka jong une u riewspah u iohi kumba une u nongtongdohkha u shu shong jaituh, bad kumta u la kylli, “Balei me shu shong mem leit tong dohkha?” “Oh,” ong u nongtongdohkha, “nga khlem leit namarba nga la ioh lypa shibun ki dohkha na ka bynta mynta ka sngi.” La kylli biang uta u briew uba riewspah, “Balei mem tong shuh ki dohkha bad ba me tong tang kat kiba me donkam, balei mem tong shibun nalor na kaei kaba me dokam?” “Ngan leh aiu ia kita ki dohkha lada nga kem shibun?” ong u nongtongdohkha, “Me lah ban kham ioh shibun ka pisa,” ong uta u riewspah, bad u ong shuh shuh, “Men ioh ban thied shuh shibun ki lieng, men ioh ban kham leit ban tong dohkha sha ki jaka kiba kham jylliew, men ioh shuh shuh shibun ki dohkha, men ioh ruh shibun ka spah, bad sa tang katno men sa long u briew uba riewspah.” “Da nga ioh kumta ngan leh aiu pat?” Kylli uta u nongtongdohkha. “Oh” ong uta u riewspah, “Lada me ioh shibun ka spah men shongkai bad men ioh lehkmen (enjoy) ha ka jingim.” Jubab uta u nongtongdohkha, “Me mut nga leh aiu mynta. Hato mem iohi ba nga shongkai bad nga kmen (enjoy) ia ka jingim?”

Haba nga sngap ia kane ka khana, nga iohi ia kawei ka jingshisha ha ka, ba lada ngi ia beh shi iabeh ia ka spah pyrthei, kynmaw ba ngin nym ioh iaka jinghun. Namarba katba ngi dang ioh katta ngin dang kwah, bad kan pynlong ia ngi ba ngin beh shibeh haduh ba ngin da tlot bor bad ngin kyllon. Don ki briew kiba shu beh spah kat haduh ba kim pyrkhat shuh ia la ka jingim, kim pyrkhat shuh iala ka koit ka khiah. Kynmaw ba ka jingim ka kham kordor ban ia ka spah pyrthei, ngi donkam ban shah hikai kumno ba ngin iai shaniah ha U Blei bad ban hun ha kaei kaba U Blei u ai. U Jisu haba U kren shaphang ka pharshi u riewspah uba biej U ong, (Loukas 12:15) “To sumar, to kiar ruh na ka jingkwah lalot baroh : namar ka jingim u briew kam shong satia ha ka jingdap kyrhai jong kiei kiei kiba u don.” U Mahatma Gandhi ha kawei na ki jingkren ki jong u u ong, “Earth provides enough to satisfy every man's needs, but not every man's greed.” (Ka pyrthei ka la pynbiang lut ban pynhun ia ka jingdonkam ka jong u briew ym iaka jingkwah rhah ka jong u). U Blei Uba buh ia ngi ha kane ka pyrthei ula pynbiang lut ia kiei kiba ngi donkam watla ngim lah ban ioh pahuh kum kiwei, hynrei u la ai ia kaba ngi donkam bad ngi donkam ban sngewhun hangta ym ban kwah rhah namar ba ka jingim ka jong u briew kam shong satia ha ka jingdap kyrhai kiei kiei.

Jingduwai: - “Ah U Blei, iarap ia nga ba ngan leh kmen ha kane ka jingim bad ban sngewhun ha ki jingpyndap ki jong Me.” -Amen

U Blei Un kyrkhu, Pastor Bidonbok Syiem.

Devotional (24th March 2021)

Topic (22nd -28th March 2021) – “Ka jingkwah rhah” (Greed).

“To phin mut brai ia kita kiei kiei ruh kiba ha neng, ym ia kita kiei kiei ruh kiba ha ka khyndew.” (Kolossai 3:2)

**************************************

U  Herbert Vander Lugt uba dei u Pastor bad u nongthoh, u la iathuh ha kawei na ki jingiathuhkhana ki jong u shaphang uwei u briew u ba sah tang bad ka kmie-nah (kaba shipara bad ka kmie ka jong u) kane ka kmie-nah ka don ki jaka bad ki pisa kiba ka la pynlang, bad ki ia shong hi tang ar ngut ma ka bad une u khunruit jong ka, une u khunruit jong ka namarba um lah ban ap ia ka ba kan iap hi da ka jingiap kaba long natural, bad namarba u la kwah noh ia kata ka spah ka jong ka, u la pyniap ia ka da kaba u ai tam ia ki dawai (overdose) nalor kaba ka dei ban dih, bad haba ki la iit bniah ki lap ba ka dei ka jingpyniap ka jong une u khunruit iala ka kmienah, bad ka jingim ka jong u ka kut ha ka along.

Ha ka kitab 1 Ki Syiem 21, ngi pule shaphang U Syiem Ahab, uba kwah ia ka brisoh ka jong U Naboth bad U Ahab namar ka jingkwah palat ka jong u ia kata ka brisoh kat haduh ba u la shah ia ka lok jong u ba kan pyniap ia U Naboth. U Blei U la sngewsih ia ka jingleh ka jong U Ahab bad U la phah ia U Elijah ban kren pyrshah ia kaei kaba U Ahab u laleh. U Elijah u la ong ia U Ahab (1 Ki Syiem 21:19 ) “Kumne ong U Trai, ha ka jaka ha kaba ki ksew ki la jliah ia ka snam U Naboth ki ksew kin jliah ia ka snam jong me, ka jong me hi kein” ong shuh shuh U Elijah ia kaei kaba U Blei Un leh ia ka iing U Ahab, (1 Ki Syiem 21: 21) “bad ngan sar noh ia me baroh phar, bad ngan pynduh noh khoit na U Ahab ia u khun shynrang baroh, ia uta uba la set hapoh bad ia uta uba laitluid ha Israel.” Bad kane ka jingiathuhlypa ka jong U Elijah ia kaei kaba U Blei Un sa leh ia ka iing ka jong U Ahab ka la jia hadien 3 snem (2 Ki Syiem 9: 4-10:11). Kane ka jingjia kaba la wan hap ha U Ahab bad ha ka iing ka sem ka jong u ka dei ban long kum ka jingmaham ia ngi ban sheptieng bad ban kiar na ka pop jong ka jingkwah rhah, bad kumba ong U Paul ha ka shithi sha ki Kolossai (Kolossai 3:5), ba ngi dei ban pyniaptroin ia ka jingkwah lalot namar ba ka dei ka jingmane bleithaw. U Paul u pyniasyriem ia ka jingkwah lalot ne ka jingkwah rhah kum kaba mane bleithaw, bad u ong ba ngi dei ban pyniaptroin ia ka. U Paul ha kane kajuh ka shithi u iathuh ruh ba ngi lah ban lait na kata ka pop jong ka jingkwah rhah bad u ong, (Kolossai 3:2) “To phin mut brai ia kita kiei kiei ruh kiba ha neng, ym ia kita kiei kiei ruh kiba ha ka khyndew.” Lada ngi pyrkhat tang ia kiei kiei kiba iadei bad kaba kynja mynsiem dei hangta ba ngi lah ban jop ia ki jingpynshoi jong ka jingkwah rhah.

Jingduwai: - “Ah U Blei, iarap ia nga ba nga lah ban iai pynleit jingmut ha kiei kiei kiba kynja mynsiem ba nga lah ban jop ia ki jingpynshoi jong ka jingkwah rhah ha ka jingim ka jong nga.” -Amen

U Blei Un kyrkhu, Pastor Bidonbok Syiem.

Devotional (23rd March 2021)

Topic (22nd -28th March 2021) – “Ka jingkwah rhah” (Greed).

“Lah ka shikham da kaba suk, ban ia ka arkham da ka jingshitom bad kaba beh ia ka lyer” (Ekklesiastes 4:6)

**************************************

Ha ka jingiathuhkhana lyngkot ha ki por kiba kham mynshwa ha ka jingiathuhkhana kaba la ai kyrteng, “The Boy and the Filberts (Nuts),” la iathuh shaphang u khynnah uba la shim ia kita ki soh kiba kum ki soh-ot (nuts) kiba la thep ha u kynja klong bad uta u khynnah namar ba u kwah ban shim shibun u la kham shibun ia kita ki nuts bad haba u mut ban sei ia ka kti um lah shuh ban sei bad ban pyllait ia kita ki nuts kiba u la bat ruh u sngewbynnud kumta u bat beit ia ki, bad haba um lah shuh ban sei ia ka kti u la sdang ban iam, bad haba ki briew ki iohi ia u ba u iam ki la ong ia u ba un pyllait noh khyndiat na kita kiba u bat khnang ba un sa lah ban sei ia ka kti. Ka jingkwah rhah ka lah ban pynlong ia ngi kum une u khynnah ban sahkut ha ki jingeh.

U Ekklesiastes u ai ha ngi ia ka jinghikai ha kaba iadei bad ka jingkwah rhah, ha kaba ha kane ka lynnong kaba 4 u ianujor ia u briew uba jaituh bad u briew uba kwah rhah bad u ong, (Ekklesiastes 4:5-6) “Uba bieit u shu thain kti, te u bam ia la ka jong ka doh. Lah ka shikham da kaba suk, ban ia ka arkham da ka jingshitom bad kaba beh ia ka lyer.” Ka jingmut ka jong U Ekklesiastes nangne ka long ba ngi dei ban hun ha kaei kaba ngi don bad dei haba ngi don ka jingsngewhun ha kaba ngi don ne iohpdiang dei hangta ruh ba ngi suk. Namarba kata kaba khyndiat kaba ngi don ka iaisah bad ngi hynrei haba ngi shu kwah rhah wat ia kata ka bym dei ka jong ngi ngin ngat ha ki jingeh kiba khraw. Kumta U Jisu U ong (Markos 8:36), “Naba u briew un myntoi aiu; lada un ioh ia ka pyrthei baroh, bad un duh noh ia la ka mynsiem?” Bad dei haba ngi don ka jingrhah ba ngi duh noh wat ia ka jingsngewsynei ban iarap ne ban lehbha ia ki parabriew. U Rusty Eric uba dei u nongthoh u ong, “As long as greed is stronger than compassion, there will always be suffering” (Katba ka jingkwah rhah ka jur ban ia ka jingisynei, kan iai don beit ka jingjynjar). Ka jingkhot ia ngi ka long ba ngin ialeh ban teh lakam ia ka jingkwah rhah da kaba ngin don ka jingsngewsynei bad lehisnei ia ki briew kiba donkam ia ka jingiarap ka jong ngi.

Jingduwai: - “Ah U Blei, nga ainguh ia Me namar ki jingpyndap ki jong Me ha ki jingdonkam jong nga baroh, iarap ia nga ba ngan sngewhun ha kata kaba Me Me ai, iarap ruh ba ngan iai pynpaw ia kata ka jingsngewnguh ka jong nga ia Me da kaba nga leh isynei lem ia ki briew kiba donkam kiba don sawdong jong nga.” -Amen

U Blei Un kyrkhu, Pastor Bidonbok Syiem.

Devotional (22nd March 2021)

Topic (22nd -28th March 2021) – “Ka jingkwah rhah” (Greed).

“Men ym ikwah” (Eksodos 20:17)

**************************************

Ka phang ia kaba ngin iapeit ha kane ka taiew (22nd -28th March 2021) ka long shaphang, “Ka jingkwah rhah” (Greed). Kane ka phang kan iarap ia ngi ba ngin sngewthuh ia ka jingdonkam ban sngewhun ha kaei kaei kaba U Blei U la ai ha ngi ym ban kwah rhah ia kaei kaei ka bym dei ka jong ngi, ne kaba U Blei U khlem ai ha ngi.

Teng teng nga pyrkhat balei ba U Blei Um pynkylla ia kine ki shiphew hukum bad ban buh noh ia kane ka hukum kaba 10 kum ka hukum kaba nyngkong? Namar haba ngi peit ia ka pop kaba nyngkong eh kaba Ka Im bad U Adam ki la leh ka mih na ka jingikwah. Ka Im ka kwah ym dei ban bam ia uta u soh, hynrei ka jingkwah jong ka ka long ban ioh ia ka jingtip ba kan long kum U Blei (Jenesis 3:5), bad kadei kata ka jingikwah ban long kum U Blei kaba pynlong ia ka ba kan bam ia u soh ia uba U Blei U la adong ia ki ba kim dei ban bam. Bad kata ka jingkwah jong ka Im ka la pynlong ia ka ban pynkhein ia ka hukum kaba nyngkong bad kaba shiphew na ki shiphew hukum kiba U Blei U la ai hadien ha U Moses.

Dei haba ngim don ka jingikwah ba ngi lah ban iada ialade na kaba ryngkang ia kiwei pat ki hukum kiba U Blei U la ai lyngba U Moses, kum kaba tuh, kaba shukor, kaba pyniap bad kiwei kiwei. Bunsien namar ka jingkwah rhah ka jong ngi ba ngim dap ia kaba ngi ioh nalor ba ngi la trei baroh 6 sngi ha ka taiew ngi kwah ruh ban trei sa ha ka sngi U Trai namar ba ngi kwah rhah, teng teng ngi pyndonkam bakla wat ia ka kyrteng U Blei tang ban ioh ia kaba ngi kwah, teng teng ngi pynlong blei noh ia ka spah namar ka jingkwah rhah ka jong ngi.

Ka jingkhot ka jong U Blei ia ngi ka long ba ngim dei ban ikwah, teng teng ngi sngew, Oh! Ba ka dei ka hukum kaba 10 na kita ki 10 hukum da pynkhein ruh kam lei lei namar ngi la leh ia ki 9 tylli, hynrei kynmaw ba kane ka long ka tynrai ba ngi dei ban leh namar dei na ka jingikwah lalot ka jong ngi ba ngi pynkhein ia kiwei pat ki hukum kiba U Blei U la ai.

Jingduwai: - “Ah U Blei, ai hapoh jong nga ia ka mynsiem ba nga lah ban sngewhun ha kiei kiei kiba Me Me ai ha nga.” -Amen

U Blei Un kyrkhu, Pastor Bidonbok Syiem.

Devotional (21st March 2021)

Topic (15th – 21st March 2021) – “Ka jingduk ne ka jinglong duk” (Poverty).

“Hynrei tang ba ngin kynmaw ia kiba duk; ia kata kajuh hi nga ruh nga la sngew shitrhem ban leh.” (Galatia 2:10)

*************************************

U Jakob u para jong U Jisu Khrist u la don lang bad U Petros bad U Ioannis ha ka jingiakynduh ia U Barnabas, U Titos bad U Paul ha Jerusalem ha kaba iadei bad ka jingialap ia ka Gospel (Galatia 2:1-10). Une u juh U Jakob udei ruh uba thoh ia ka shithi ka jong U Jakob, ia kaba la tip da kiba bun ia kane ka shithi kum ka shithi kaba kren ia ka jingeh jong ki briew kiba duk bad kaba khot ia ka Balang ban iarap ia ki briew kiba kum kine (Jakob 1:27; 2:1-7; 2:14-17; 5:1-6), kumta kam long kaba sngewphylla ba kane ka phang shaphang kaba kynmaw ia kiba duk ka mih hadien ba U Jakob u leit ban iakynduh ia U Paul ha Jerusalem.

Ha kane ka bynta na ka Ktien ka jong U Blei U Paul u pynkut ia kane ka jingiathuh ka jong u ha kaba iadei bad ka jingleit kiew ka jong u sha Jerusalem ban iakynduh bad ki Apostol, u thoh ba dei hadien ka jingiakynduh bad ki ba u sngewthuh ba udei ban kynmaw ia kiba duk bad u pynpaw ruh ia ka jingshitrhem ba udei ban leh kumta (Galatia 2:10). U Paul haba u kren ia kiba duk hangne, u thew ia kito kiba duk kiba don ha Judia ha ka spah snem kaba nyngkong kiba mad ia ka jingduk namar ka khlam, namar ki thma bad kiwei kiwei ki jingjia kiba pynlong ia ki ban kylla duk, bad U Paul u ioh ia ka jingshitrhem ban iarap ia ki briew kiba duk dei hadien ba u la iakynduh ia kine ki Apostol kumba u la iathuh ha kane ka shithi (Galatia 2:10). Ym dei ba U Paul um don ka mynsiem ban iarap ia kiba duk hashwa jong kata ka jingiakynduh bad ki Apostol, hynrei ngi iohi haba ngi pule ia Ka Ktien ka jong U Blei ba U Paul u ju iaroh ia ki Jentil Khristan kiba kloi ban iarap ia ki briew kiba duk (1 Korinth 16:1-4). Baroh kiba ngeit ha U Jisu Khrist ki don ka kamram ban iarap lem ia ki briew kiba donkam kiba don sawdong jong ki, to ngin pynlong ia ki balang ki jong ngi kiba nyngkong eh ha ka ban ai ka kti jong ka jingiarap na ka bynta ki briew kiba duk kiba kyrduh. U Martin Luther u ong, “After the preaching of the gospel, the office and charge of a true and faithful pastor is to be mindful of the poor.” (Hadien ka jingialap ia ka gospel, ka office bad ka kamram jong u pastor uba iaineh ka long ba u dei ban pyrkhat ia ki briew kiba duk). Ka dei ka kamram jong ngi kum ki nongialam balang ba ngin ialam lang ruh ia kiwei ha kaba leh isnei na ka bynta kiwei kiba don ha ka jingduk jingkyrduh jong ka jingim.

Jingduwai: - “Ah U Blei, ai hapoh jong nga ia ka mynsiem ka jong Me ba nga lah ban iohi ia ki briew bad ia ki jingdonkam jong ki kumba ki long bad ba nga lah ban kner ia ka kti jong ka jingiarap na ka bynta jong ki.” - Amen

U Blei Un kyrkhu, Pastor Bidonbok Syiem.

Devotional (20th March 2021)

Topic (15th – 21st March 2021) – “Ka jingduk ne ka jinglong duk” (Poverty).

“Wat leh ka bym hok ha ka jingbishar: wat shah shiliang ia uba duk, lymne burom ia ka khmat uba donbor: hynrei men bishar ia u paramarjan jong me ha ka hok.” (Lebitekos 19:15)

*************************************

Ka jinglong nongsumar (stewardship) bad ka ioh ka kot la buh ha Ka Ktien ka jong U Blei ban batai ia ka spah bad ia ka jinglongduk. Ka Bible kam shym hikai ba kaba riewspah ka dei kaba pop bad kaba duk ka dei kaba pynpaw ia ka jinglong hok, hynrei ka ong ba ka jingieit sbai kata ka dei ka tynrai jong baroh ki jingsniew (1 Timothy 6:10). U briew u lah ban don shibun ka spah ha kajuh ka por u dei ruh u briew uba hok haba um pat buh ia ka jingieit ia ka spah nyngkong ha ka jingim ka jong u, kumba long U Abraham, ong ka Bible ba u don shibun ka spah (Jenesis 13: 2), bad ngi shah hikai na U Abraham kumno ban im da ka jingngeit (Hebru 11:8-9). Ka long kumjuh ia ki briew kiba duk ki lah ban long ruh ki nongpop kiba khraw, kum U Judas u ba long u synran u jong U Jisu, um dei u briew uba riewspah hynrei Ka Ktien ka jong U Blei ka ong ba u long u briew uba ieit ia ka spah bad u la pynpaw ia kata ha ki ar tylli ki jingjia (Mathaios 26.14-16 & Ioannis 12:1-8).

Ngi im ha ka pyrthei kaba don ka jingiapher kaba khraw hapdeng uba riewspah bad uba duk, hynrei Ka Ktien ka jong U Blei ka hikai ia ngi ba U Blei U don ka jingsngewkhia na ka bynta ki briew kiba duk, bad ka jingiarap ka jong ngi na ka bynta ki briew kiba duk dei ban thew na ka daw kaba pynlong ia ki kiba duk. Don ki briew kiba mad ia ka jingduk namar ki jingjia kiba ki ki iashem ha ka jingim bad kam dei ka jingleh ka jong ki, ka balang ka dei ban peit ia kiba kum kita, kumba thoh U Jakob ha ka shithi ka jong u haba u kren shaphang ka jingduk u ong ruh ba ka kamram ka jong ka Balang ka long ban leit jngoh ia ki khunswet, ki riewkynthei (Jakob 1:27), namar kine ki kylla duk ymdei ka jingleh jong ki, ki kylla duk lehse ba u kpa ka iing u khlad noh. Kawei pat ka daw ba ki briew ki kylla duk ka long namar ka jingban bein ka jong ki briew kiba sniew, kum ia kita ruh ka dei ka kamram jong ngi ban kren ban pynsngew wat sha ki bor synshar ban wanrah ia ka jingbishar hok ia kiba duk bad kane ka long katkum Ka Ktien ka jong U Blei (Lebitekos 19:15) “Wat leh ka bym hok ha ka jingbishar: wat shah shiliang ia uba duk, lymne burom ia ka khmat uba donbor: hynrei men bishar ia u paramarjan jong me ha ka hok.” Kiwei pat ki kylla duk namar ka jingjaituh jong ki bad kim treh ban trei shitom, hooid kane kam long naka bynta baroh, hynrei don kiba long kumta, bad U Paul u ong (2 Thessaloni 3:10) “Lada uno uno ruh um mon ban trei, te wat ai ba un bam ruh.” Kumta ka long kaba donkam ia ngi kum kiba ngeit ban iarap khamtam ia kito kiba ngi tip bad sngewthuh shai ia ki daw kiba pynlong ia ki ban iashem ban iakynduh ia ka jingduk bad ka jingkyrduh ha ka jingim.

Jingduwai: - “Ah U Blei, ai hapoh jong ngi ba ngi lah ban iohi ia ki briew kiba don sawdong jong ngi kiba shitom, kiba duk, kiba kyrduh, bad iarap ia ngi ba ngin ioh ia ka mynsiem jong ka jingsngewlem na ka bynta jong ki.” - Amen

U Blei Un kyrkhu, Pastor Bidonbok Syiem.

Devotional (19th March 2021)

Topic (15th – 21st March 2021) – “Ka jingduk ne ka jinglong duk” (Poverty).

“Te baroh kiba la ngeit ki la long hajuh, bad ia kiei kiei baroh ki la ialeh lang, bad ki la iadie noh ia la ki bri, ia la ki iing, bad ia la ki mar bad ki la iasam ia ki ha baroh, kat ha kiba donkam.” (Ki Kam 2:44-45)

*************************************

U Tertullian uba long u Nongialam Balang (Church leader) jong ka spah snem kaba 2, haba u peit ia ka jinglong jong kiba ngeit ha ka spah snem kaba nyngkong, u la ong, “The unbelievers would say, after observing the lives of Christians, ‘See how they love each other.’" (Ki bymngeit kin ong, haba ki la peit ia ka jingim jong ki Khristan, ‘Peit haduh katno ki ia ieit iwei ia iwei pat’). Haba ngi pule ia Ka Kitab Ki Kam ki Apostol, ki Khristan jong ka Balang kaba nyngkong ki pynpaw ia ka jingieit ka jong ki ia U Khrist da kaba ki peit, “ba yn ym don uwei ruh u ban kyrduh hapdeng jong ki” (Ki Kam 4:34).

Kine kiba ngeit ki sakhi ia U Jisu Khrist ha ka jingim ka jong ki da kaba ki iasam lem ia kaei kaba ki ki don khnang ban nym don uba kyrduh hapdeng jong ki. Ka jingsbun mynsiem ka jong ki bad ka jinglehisynei ka jong ki ia ki briew kiba duk ka pyni ba ki long ki nongbud kiba shisha ki jong U Jisu Khrist Uba Ka Ktien ka jong U Blei ka ong (2 Korinth 8:9) “Ba U long Uba riewspah pynban U la wan long duk n aka bynta jong ngi, ba lyngba ka jingduk ka jong U ngin ioh long kiba riewspah.” Kine kiba ngeit haka Balang kaba nyngkong ki sngewthuh bha ruh ia kaei kaba U Jakob u thoh (Jakob 2:20) “ba ka jingleh ka pynjanai ia kata ka jingngeit.”

Don ki Khristan kiba mutdur ba ka jingsakhi ka jong ngi ia U Jisu Khrist ka long tang da kaba ngi kren ia Ka Ktien ka jong U Blei na ki jaka kyntang, hynrei kynmaw ba ka jingsakhi kaba shisha ia U Jisu Khrist ka dei kaba ngi pynpaw ia ka jingieit bad ia ka jingisynei ka jong U Khirst lyngba ka jingiasam lem ka jong ngi ia kiei kiei kiba ngi don na ka bynta ki briew kiba duk bad kiba kyrduh kiba don sawdong jong ngi. Ngi kum ki nongbud ki jong U Jisu Uba la mihpat na ka jingiap, ngi lah ban iarap ia ki briew kiba thngan bad ngi lah ruh ban kner ia la ki kti sha ki briew kiba donkam, phi lah ban kylli ialade, kumno nga lah ban iasam lem? Kumno ngan im kum u sakhi u jong U Jisu Khrist? Kumno nga lah ban pynpaw ia ka jingieit bad ia ka jingisynei ka jong U Khirst sha kiwei pat? Kynmaw ba ka donkam ia ngi ban leh ei ei, namar ba ka kam ka kren khamjam ban ia ka Ktien.

Jingduwai: - “Ah U Blei, iarap ia nga ba nga lah ban long u sakhi u jong Me lyngba ki kam ki jong nga kiba nga leh, khamtam da kaba nga iasam lem ia kata kaba nga nga don na ka bynta kiwei pat kiba donkam kiba don sawdong jong nga.” - Amen

U Blei Un kyrkhu, Pastor Bidonbok Syiem.

Devotional (18th March 2021)

Topic (15th – 21st March 2021) – “Ka jingduk ne ka jinglong duk” (Poverty).

“Uba hok u pyrkhat ia ka kam jong uba duk.” (Proberb 29:7)

**************************************

Ha u snem 1780 U Robert Raikes u don ka jingsngewkhia na ka bynta ki briew kiba duk, na ka bynta ki khynnah kiba don ha London kiba sah sawdong ia ki jaka kiba U Robert Raikes u sah, ki khynnah ki bym ioh ka lad ban pule, kiba wan na ki longiing longsem kiba duk, kiba ha ki sngi pohïa ki ju leit trei bad ha ka sngi U Trai namarba ka dei ka sngi shuti ia ki kumta ki ju pynlutkai ia ka por ha ki kam sniew kiba har rukom. U Robert Raikes u iohi ruh ba ym don mano mano ban leh ei ei na ka bynta ban pynkylla ia ka jingim ka jong kine ki khynnah, kumta u la buh ia ki katto katne ki briew ki ban iarap ia u ban pynlong da ka skul ha ka sngi U Trai, bad ki la pyndonkam ia ka Bible kum ka kot pule, kine ki la hikai ia kine ki khynnah kiba duk ia ka jingstad kaba ki lah ban ioh na Ka Ktien ka jong U Blei.

La ong ba hadien katto katne por ba ki plie ia kata ka skul ha ka sngi U Trai kumba 100 ngut ki khynnah ki la wan ban pule ha kata ka skul, kine ki khynnah nalor ba ki ioh ia ki jinghikai na ka Ka Ktien ka jong U Blei, ki ioh ruh ia ki jingbam sngi bad ia ki jinghikai kumno ba kin im ka jingim kaba lehkhuid. Lyngba kine ki skul kiba la tip kum ki “Sunday Schools” la lah shisha ban pynkylla ia kiba bun ki khynnah, kynthei bad shynrang. Ha u snem 1831, kine ki Sunday School tang ha Ri England ki la lah ban kynthup haduh palat ia ka shi million ki khynnah. Kine ki khynnah baroh ki mad ia ka jingkylla ha ka jingim ka jong ki namar ka jingsngewthuh jong uwei u briew ia kane ka jingshisha ba “Uba hok u pyrkhat ia ka kam jong uba duk” (Prob 29:7).

Haba ngi Pule ia Ka Ktien ka jong U Blei ngi iohi haduh katno ba U Jisu U sngewkhia na ka bynta ki briew kiba duk, kiba kyrduh, kiba mad ia ki jingeh ha ka jingim namar ka jingduk ka jingkyrduh ka jong ki. Ha ka Gospel ka jong U Mathaios 25, U Jisu U hikai ia kiba ngeit kiba long ki nongbud ki jong U ba ki dei ban long kiba la pynkhreh ia ka jingwan ka jong U da kaba ki leh isnei ia kiba duk, kiba shitom, ban ai bam ia ki bym don jingbam, ban pynkup jain ia kiba lyngkhuid, ban leit jngoh ia kiba shitom (Mathaios 25:35-36). Kumta kum ki nongbud ki jong U Jisu Khrist ka dei ia ngi ruh ba ngin kup ia kane ka jinglong ka jong U Jisu Khrist ban don ia ka mynsiem jong ka jingsngewsynei ia kiwei pat.

Jingduwai: - “Ah U Blei, buh hapoh jong nga ia ka mynsiem jong ka jingsngewsynei ba nga lah ban iarap lem ia kito kiba donkam ia ka jingiarap ka jong nga.” - Amen

U Blei Un kyrkhu, Pastor Bidonbok Syiem.

Devotional (17th March 2021)

Topic (15th – 21st March 2021) – “Ka jingduk ne ka jinglong duk” (Poverty).

“Naba kita baroh ki la noh na kaba sah tam ia ki hynrei kane na ka jingkyrduh jong ka ka la noh baroh, katba ka don.” (Markos 12:44)

**************************************

U Warren Buffett, U Bill Gates bad Ka Melinda Gates ki la pynlong kaei kaei ka ban sah jingkynmaw haba ki pynmih ia ka Giving Pledge ne ka jingkular kaba iadei bad ka jingai, bad ki kular ban ai shiteng na ka pisa kaba ki don. Bad ha U snem 2018, kane ka jingkular ka jong ki ka thew haduh 92 billion dollars. Kane ka jingkular ka jong ki ka pynlong ia U Paul Piff uba dei u Psychologist ban leh ia ka jingiit bniah ha kaba iadei bad ka jingai ka jong ki briew, bad lyngba ka jingiit bniah ka jong u u shem ba kiba duk ki ai haduh 44% tam ia kiwei pat ki briew kiba kham riewspah na kaei kaba ki ki don bad ha ki kyntien ki jong U Paul Piff u ong, “Those who’ve felt their own poverty are often moved to greater generosity.” (Kito kiba la mad ia ka jingduk halade bunsien ki kham kylluid mynsiem ha ka jingaisbun).

U Jisu U tip ia kane, kumta haba U leit sha ka temple, U peit ia ki paitbah kiba noh sha ka jingkynshew (Markos 12:41), kiba riewspah kila noh shikatdei hynrei ka riewkynthei kaba duk ka la noh tang ar damli kaba la jan shi pisa (Markos 12:42), U Jisu Um kwah ba ki synran kin ym iohi ia kata, kumta U la khot ia ki synran ba kin peit ia kata bad U la ong ha ki, (Markos 12:43) “Shisha Nga ong ha phi, ba kane ka riewkynthei kaba duk ka la noh kham bun ia kita baroh kiba la noh sha kata ka jingkynshew.” Nga ngeit ba ki synran ha kata ka por ki la iapeit iwei ia iwei bad ki la ia kylli, kumno kane ka lah ban long ba kane ka riewkynthei kaba noh tang ar damli ka la noh kham bun? Kumta U Jisu ban ai ka jingshai ia ki synran U la ong ia ki, (Markos 12:44) “Naba kita baroh ki la noh na kaba sah tam ia ki hynrei kane na ka jingkyrduh jong ka ka la noh baroh, katba ka don.” Ngi ruh ngi lah ban don khyndiat eh, hynrei kaba U Jisu U kwah na ngi ka long ba ngin ai na kata kaba ngi don wat ha ka jinglong duk ka jong ngi namarba U Blei Um peit katno ngi ai hynrei U peit katno ngi pynsah. U George Mueller u ong, "God judges what we give by what we keep." (U Blei U bishar ia ki jingai jong ngi da kaei kaba ngi buh ialade).

Jingduwai: - “Ah U Blei, ngam don shibun ban ai sha ka kam ka jong Me, hynrei nga ngeit ba Men pdiang ia ki jingai kiba la noh naduh ka dohnud ka jong nga baroh.” -Amen

U Blei Un kyrkhu, Pastor Bidonbok Syiem.

Devotional (16th March 2021)

Topic (15th – 21st March 2021) – “Ka jingduk ne ka jinglong duk” (Poverty).

“Ka jinglong riewblei kaba sngur bad bymtngit hakhmat U Blei bad U Kpa ka long kane kein, ban leit khmih ia ki khunswet bad ia ki riewkynthei ha ka jingshitom jong ki” (Jakob 1:27)

**************************************

Ha ka Report jong U Jacob Riis u ai ia ka dur kaba shai bha jong ka jingduk ka jong ki briew ha ka Nongbah New York ha ka spah snem kaba 19, bad haba u la pynmih ia kata ka report ka la pynlyngngoh ia kiba bun ban iohi ia ka jingduk ki briew ha ka Nongbah New York. Ha ka kot, “How the Other Half Lives,” U Jacob Riis u thoh ia ki jingiohi ki jong u ia ka jingduk ka jingkyrduh ka jong ki briew ha kito ki por, bad ha kane ka kot u buh ruh ia ki dur ban pynshisha ia ka jinglong duk ka jong ki briew ha kato ka por. U Jacob Riis u thoh ha kane ka kot ia ka jinglong jong kine ki briew kiba duk kiba kyrduh, ka daw ba u thoh ia kane ka kot bad ia kiwei ruh ki jingthoh ki jong u namarba u kwah ban wanrah ia ka jingkylla ha ka jingim jong kine ki briew.

Hadien katto katne por ba U Jacob Riis u la pyllait paitbah ia kane ka kot, u la ioh ia kawei ka card na uwei u briew uba dang shu sdang ban rung sha ka kam sain hima (Politics) bad ha ita i card la thoh kumne, “I have read your book, and I have come to help. Theodore Roosevelt.”  (Nga la pule ia ka kot jong phi, bad nga la wan ban iarap. Na U Theodore Roosevelt), bad une u politician u long ruh hadien u President jong ka Ri America. Bad ha ka por jong u kum u president u pyrshang ban leh ei ei na ka bynta ki briew kiba duk ha kato ka por, bad u pyrshang ban wanrah ia ka jingkylla. U Jacob Riis um shim poi pyrkhat ba kata ka jingpyrshang ka jong u lyngba kita ki jingthoh ki jong u un iohi ia ka jingiarap ba kan wan, hynrei kata ka jingpyrshang ka jong u ka la long kaba seisoh.

Ka long ka jingkhot ia ngi ruh ba ngin leh ei ei na ka bynta ki briew kiba duk kiba jynjar kiba don sawdong jong ngi, bad da ka jingngeit ha U Blei Uba ngi shakri, ngi ngeit ba Un plie ia ki lad ki lynti ban lah ban iarap lem ia ki briew kiba donkam ia ka jingiarap. Ka jingkhot ia ngi ruh ka long ba ngim dei ban sngapjar na ka bynta jong ki . U Jakob u pynkynmaw ha ngi ba ka jinglong riewblei kaba shisha kam dei tang kato kaba ngi shu shakri ia U Blei ha ki jaka mane Blei, hynrei kaba leit ban khmih ia ki khunswet bad ki riewkynthei ha ka por ka jingshitom ka jong ki bad ban leh ei ei na ka bynta jong ki (Jakob 1:27).

Jingduwai: - “Ah U Blei, hapdeng ka jingsngewkutlad ka jong ngi ban ai ka jingiarap ia ki briew kiba duk kiba kyrduh iarap ia ngi ba ngi lah ban shaniah tang ha Me.” -Amen

U Blei Un kyrkhu, Pastor Bidonbok Syiem.