Romane Paramichi

Romane Paramichi

By Sveriges RadioKids & Family
Download on the App Store

Romane Paramichi episodes

  • Elsa ande Saajvoe rajo 4 kotor

    Parno kraj parudas pesko ghindo thaj nas dosta e lilesa thaj akanak musaj voj te skrij jekh kevnia. Feri sar kerla voj kodo? voj si feri 9 bershengi.

    Lyssna på alla avsnitt i Sveriges Radios app.

    4. E kevnia

    Buerie biejjie! Kade das lashio djes pe samitsko chib. Loshav ke kames te aves manca maj dur kate. Butivar acharav man korkoro kate. Feri akanak boldas amen khaj o maj vazno. Elsa Laula. Ehh. Khaj samas? Elsa dikhlas peske prales thaj peske dades. Feri vorta kana e Elsa ghindojas ke voj shajas te ingrel len kere, dem me, o parno kraj anda Saavjoe-rajo, Elsa jekh nevi misia. Haha! kadej, chack nashtik o trajo te avel lokho na?

    Musaj te maras amen anda amare! Mindik phenav kodo. Kana dikhas a Elsa kadi data nakhlas aba trin kurke. E Elsa beshel peske khere thaj skrij mangee jekh kevnia.

    "Chack kado chi djal" tsipij e Elsa holjasa, thaj dikhel pe sa e paperioshi khaj shudas angla peste. Voj acharel ke kanchi chi djal lake sar mukhlas o Saajvoe-rajo thaj sa djal pharimasa.


    "Me sim feri 9 bershengi, kadoj dilipe! Sar te skrij jekh intrego kevnia?" phenel e Elsa peske tela nakh, thaj ushtiel opre te kerel variso kaver. E kevnia si vazno, feri e familja musaj vi kade te han variso, thaj akanak kana o Mattias thaj o tata si kote musaj e Elsa te zhutij peska da. Koncentrovano djal e Elsa avri anda lengo kher thaj djal khaj peski dej khaj beshel thaj muzil a guruvnia.



    "Mamo, so birij te ushtiavel jekhes anda pharo sojipe" pushel e Elsa, thaj laki dej dikhel chudne jakhenca pe late.
    "Chi acharav so pushes, Elsa" phenel laki dej. Voj mukhlas a guruvnia thaj boldas pe karing peski chej.

    "Musaj te kerav variso … Te birij te anavav palpale e Mattiasost haj mure dades. Musaj te skrij jekh kevnia. Thaj kadi kevnia si te ushtiavel jekhes anda pharo sojipe. Feri… chi acharav so kodo chachimasa znacij, phenel e Elsa thaj dikhel brigasa pe phuv.

    Laki dej tsirdel jekh phari dzi ande peste zhi pun voj del la atveto, thaj dichiol pa lako muj ke phares si lake te vorbij pa kodo.
    "Muri chej, Mattias thaj chiro dat tasile. E mursh arakhle lengo parahodici pa kaver rig, thaj tu avilan khindi sa kodo djes, phenel kai dej brigasa. "Chi birij pe te ustjiavel pe opre e mulen muri chej!"

    Elsa chi djanel sar te phenel peska dejorake so chachimasa kerdas pe ke o Mattias thaj lako dat chachimasa trajin. Chack voj djanel ke von trajin ke voj sas ando Saajvoe-rajo, vi te si kade ke laki dej lake chi pachal.
    "Djanav ke mezij ke von mule, feri me djanav ke von si maj dur zuvinde", phenel e Elsa. "Feri zhi pun birij te sikavav kado tuke musaj me anglunes te skrij jekh kevnia".

    "Khaj si te ushtiavel e muloren?", pushel e mama. Voj dikhel rojimasa pe peski chej. "Atunchi ghindoj ke musaj te skris variso so si amare manushege zurales vazno. Kam si te skris jekh kevnia sar e shvedicka gadje zumaven te paronchin pe amare trajora. Butivar dos man ghindo te tradav khaj o Kraj ando Stockholm thaj te phanav leske sar leske manush amenca keren. Thaj ke von mindik amenge phenen ke ame Sami manush musaj te khidas amen avri pa lengi phuv vi te sas kodi phuv amari maj anglunes!"

    Elsa kerel anda shero, thaj pachal ke achardas peska da.
    "Apool so, pachas ke te skrija jekh kevnia pa kodo so amare manush e Sami trajisarask, ke trobusardamas te trajisas ande khera, te avel amenge slobodo te trajisaras pala amare zakonura kusa amare cherbura, ke atunchi avilov muri kevnia lashi?", pushel e Elsa.

    "Ova, pachav, feri dostaj aba, mangav tut Elsa …" phenel e mama thaj muzil a guruvnia po dujto. "Aba nakhlas jekh shon sar hasajlas chiro dat thaj chiro pral. Trobuj te mukhas kodo akanak, Vi te si kodo phares amenge".

    Elsa dikhel ke laka dake jakha asvaren, thaj boldel pet haj djaltar. Akanak djanel pa soste te skrij e kevnia thaj kodo kerel e buchi maj lokho ando skiripe.

    Kodi rachi skrij e Elsa opral shtarvardesh patra. Kana o odut khatar o shunuto parudjilas khatar e khamesko odut das e Elsa gata peski kevnia. Voj uradas pe sigo thaj las te nashel sig karing o bar khaj puterdas lake o vudar khaj o parno kraj thaj lesko Saajvoe-rajo.

    Kana e Elsa aresel khaj o bar, mezij kodo bar sa kade mysticno sar e paluni data, thaj e Elsa pachal ke vi kado drom puterdjiola pe kodo magicno vudar. Thaj kade vi sas, ke kana e Elsa shiol o vast po bar acharel voj sar voj tsirdel pe andre ande kodo bar.

    Voj tsirdel jekh baro vozduho ande peste, feri chi ushpeji te tsirdel les gata ke hirtelen acharel voj sar lake buke dhukan. o lufto ande kodo bar phabarel lake parne bukhe, feri e Elsa chi del pe, kade dur areslas thaj voj das len peski vorba. Hirtelen acharel voj ke voj kotej thaj voj acharel sar voj hasal zurales. Voj acharel ke zurales phares si lake te aresel ande kado Saajvoe-rajo thaj ke kado shaja te mudarel la.


    "Chi avilan pe vrama!" E parne krajesko glaso si holjarniko thaj e Elsa tordjiol sigo opre. Musaj te morel e jakha te birij te dikhel maj feder thaj atunchi dikhel voj e parne krajes angla peste, voj kerel e gada pe peste te mezij mishto angla leste.

    "Mangav bari ertechia…. hiresha kraja. Feri las mange vrama te skrij kadi kevnia, thaj kadi kevnia si lashi thaj feri tuke", phenel e Elsa thaj del e parne krajes e intrego kevnia so voj skirisardas.

    O parno kraj ginavel thaj boldel e patra, thaj univar vazdel pesko shero thaj shudel e jak pe Elsa. Pala jekh vram phandavel vov e kevnia thaj dikhel seriozne jakhenca pe Elsa.

    "Musaj te phenav ke chi daras kanchestar, thaj vi tromandan te aves mande vi te chi avilan pe vrama…. Kodo chalilas man. Vi kade chi mukov chire dades thaj chire prales, ke chi dan gata e kevnia pe kodi vrama so me tuke phendem!"

    Elsa lel te rovel thaj e asva hiordjion pa lake jakha, voj mangel e parne krajes anda intrego pesko hjilo te miloj pe latar.
    "Me sim feri jekh tsini chejori," phenel e Elsa rojimasa. "Mangav tut, mukh man te dikhav mure dades thaj mure prales, mangas tut?"
    O parno kraj dikhel pe late thaj mirij la peske jakhenca, zhi pun vov putrel pesko muj.

    "Hmm, mukhav tut te dikhes chire dades, thaj dav tut jekh maj paluni chansa te les len avri anda muro rajo. Feri atunchi musaj te khides khetanes e shtar balvalja ande jekh than. Te birisa te khides len khetanes, atunchi mukov tuke chire prales thaj chire dades, feri vi kado phenav tuke thaj achar so phenav. Te na birisa te keres kado atunchi chi dikhes len soha maj but ande intrego chiro trajo!"

    Kodole vorbenca boldel pe o parno kraj thaj djal thaj pala leske dume tordjiol hirtelen lako dat. E vrama ashadjilas ande late thaj rojimasa nashel voj khaj pesko dat.

    9 min
  • Elsa ando Saajvoe rajo 3 kotor

    Elsa Laula skirisardas jekh lil thaj o Parno kraj kamlas kodo lil. Akanak si voj te dikhel peske dades thaj peske prales.

    Lyssna på alla avsnitt i Sveriges Radios app.

    3. Pale khetanes

    Bööresth! Jaj ke mishtoj! Maj dur san amenca ande parne krajesko Saajvoe-rajo. Muro rajo.
    Fajma kames te djanes sar djal amara amljake a Elsa Laulake? Ande paluno kotor skirisardas e Elsa jekh lungo lil mange. O lil sas pa chavoresko chachipe te avel khetanes peska familjasa, thaj te na aven uni manush shudine kaverendar.
    Voj musajsas te arakhel jekh kaver vudar kadi data te aresel ande muro rajo thaj kodo kerdas voj kana voj nakhlas perdal jekh mysticno bar, khaj sas lishime khatar e bari kali chirikli. Kana aresena ande paramichia akanak aresena kote kana e Elsa vorta dikhel peske dades.

    "Aehtjie!" tsipij e Elsa loshasa, thaj lel te nashel karing pesko dat khaj beshel ande jekh tserha ande parne krajesko Saajvoe-rajo. Sar mindik te beshlov kote.
    Sar te djanglov ke o lil khaj e Elsa skirja avla dosta lashio. Pasha leste tordjiol o Mattias.

    "Jaj ke mishtoj, ke tume san kate! Chi acharen sar mange sas shusho bi tumaro. Me thaj e tjidtjie, thaj vi e mama!" phenel e Elsa bara loshasa thaj e vorbi huran anda lako muj. Aba chi acharel e dukh ando vast kana kikidel peske dades, voj loshal kade zurales ke soha chi kamel te mukhel peske dades.

    Pala jekh lungo vrama kikidimasa phenel o Mattias khaj e Elsa ke vov kamel te sikavel lake e parne krajesko Saajvoe-rajo, thaj o tata phenel ke kodo si jekh lashio ghindo.

    "Zurales shukares si kate", phenel o Mattias thaj sikavel e najesa karing e plaja thaj o len khaj si angla lende.

    Pe phuv baron parne luludjia thaj e bahovinja pashliov pe bara. Kate birisardov e cherbura te nashen ande slobodia thaj te han pe chale sako djes.
    Elsa khaj si sikli e cherbonca arakhel sigo e parne krajeske cherbura ande Saajvoe-rajo.


    "Dikhen sa parnej! Sako jekh cherbo si parno, Mattias!", phenel e Elsa. "E parne krajeske cherbura musaj te aven e maj bahtale cherbura ande ljuma".


    Elsako dat kerel anda shero thaj harundel peski falka.

    "Chaches Elsa, but bajura si zurales lashie kate, vi te sam zurales dur keral. O parno kraj phendas ke dela amen unien anda kadal cherbon, feri te inkrov amen pe amari righ thaj te na diljaras les", phenel e Elsako dat.

    "Me aba dem anav mure cherbos", phenel o Mattias loshasa, thaj e Elsa musaj te serel sostar voj kote avilas. Laki dej thaj lake kaver pral djukaren pe lende khere.

    "Aehtjie, O parno kraj ande Saajvoe-rajo phendas ke tume aba shaj te aven khere akanak", phenel e Elsa. "Tume trobun amen khere. phares si amenge bi tumaro."
    Lako dat dikhel brigasa pe late. Mattias, khaj vorta las te nashel karing e cherbura ashavel te nashel, thaj boldel pe lende. Vi vov dikhel pe late jakhenca khaj sikaven ke vov chi pachal ande late.

    "Elsa, pachas chachimasa ande kodo? O parno kraj anda Saajvoe-rajo si pindjardo ke pharoj thaj chi inkrel mindik peski vorba. Nashtik te aves za brigaki te na mukhela amen te djas khere adjes." Tatasko glaso si khino, thaj e Elsa chi djanel so te phenel leske palpale.

    "Chak vov si o kraj, jekh kraj musaj te inkrel peski vorba, na?" pushel e Elsa.

    "No… jo…" phenel lako dat. "Jekh kraj trobusardov te inkrel peski vorba. Thaj tu djanes kodo , ke univar naj dosta feri te skrij pe jekh lil, thaj te djukarel pe ke o kraj avla thaj zhutija."

    Tela kodi vrama so o tata vorbijas keradas o Mattias jekh jagh, thaj e Elsa thaj o lengo dat beshen kote pasha leste.

    "Sar te na avel, katej maj feder, kana si o ivend, ke e cherbura birina te chaljion kate." phenel hirtelen o Mattias. Lengo dat thaj e Elsa dikhen pe leste thaj keren anda shero ke kadej.
    "Chachimasa si o Saajvoe rajo jekh lashio than e cherbonge thaj kodolenge so len sama pala lende, thaj e maj lashi djela si kodo ke vi te chi birisaras te mukhas kado than bi krajeski permisia, si kado than chachimasa jekh rajo pasha e temlica ande Umeå." Tatasko hango si pharo kana vov vorbij pa Umeå. Na durmut kodolestar dosharnas les kaver Sami ke vov butobi chordas lenge cherbura.
    Elsa serel mishto kodo djes kana e policia dine andre ande lengo kher thaj line lake dades. Beshlas jekh intrego bersh thaj e familja trajias chorimasa thaj univar chin anas len so te han kodo jivend.

    "Dostaj, na vorbin pa Umeå!" phenel e Elsa. "Na vorbin pa kodo kana sam khetanes. Chi birij te ghindoj pa kodi vrama". Mattias kerel anda shero thaj von lenas avri o habe anda trasta khaj sas pe Mattiaski trasta.
    "Akanak trobusaras te has", phenel o Mattias, thaj lel te shingrel anda o shutjardo mas.
    "Jo, thaj pala kodo tradas amenge khere!" phenel e Elsa loshasa.


    Kodi rachi beshlas e Elsa, Mattias thaj lengo dat lungo vrama angla jagh thaj vorbin jekh kaveresa,

    thaj hirtelen nakhlas e vrama 2 pe rachiate. Elsa del pe ghindo ke puznoj thaj ke trobunas aba te djan peske khere, feri zhi pun voj ushpeji te ushjel opre tordjiol kode pasha lende o parno kraj.

    "Ke mishtoj tumenge kate, si tumen ekcera kava vi mange" phenel o parno kraj, feri ande lesko hango achardjiol pe ke vov kamel variso kaver.

    "Elsa, chachimasa chalilas man chiro lil" phenel o kraj, "feri me kamav variso maj but tutar, zhi pun birij te mukhav chire prales thaj chire dades tusa khere ".

    Elsa dikhel chudasa po parno kraj, thaj zhi pun voj ushpeji te putrel pesko muj te phenel variso, vazdel o kraj pesko vast, te na vorbij e Elsa.

    "Kodo kon pucharel pe ande peske buchia chi agorij butivar intrego buchi", phenel o kraj,

    "Thaj anda kodo ke tuke gelas kade lokho te skris kado lil, si te dav tut jekh nevi misia te keres. Jekh kasavi phari sar kana phirel pe mashkar duj planeti."

    "Chak dan chiri vorba!" tsipij e Elsa thaj dikhel holjasa po parno kraj anda Saajvoe-rajo.

    "hm, me sim o kraj- thaj birij te paruvav muro ghindo kana me kamav thaj akanak kamav te skris mange jekh intrego kevnia, jekh kevnia khaj birij te ushtiavel anda lindri. Djatar thaj si te aves palpale angla dujto kurko ke te na avilan, chi dikhesa soha chire prales thaj chire dades!"

    Thaj kana o parno kraj anda Saajvoe-rajo phandavel pesko muj lel intrego lesko rajo te boldel pe zurales sigo. Sa e kolorura thaj sa e formi bolden pe khetanes, thaj e Elsa lel te hural opre karing o cheri khaj chachimasa si o jezhoro.

    Kana e Elsa puterdas peske jakha pashliolas voj korkori pasha o jezhoro, thaj kote usijas e bari kali chiriklori, thaj e Elsa rovel.

    "Aehtjie, Mattias. Na daran, pa na buteste dikhasam amen", phenel voj rojimasa. "O parno kraj chi njerija manca! dav tumen muri vorba"

    10 min
  • Elsa ande Saajvoe rajo 2 kotor

    Elsa areslas khaj pesko dat thaj lako pral tela paji thaj musaj akanak te skrij jekh lil e Parne krajeske te birin von te skepin pe lestar.

    Lyssna på alla avsnitt i Sveriges Radios app.

    2. O lil

    Bahtalo djes! Loshav ke inke san amenca! Phares si te mukhel pe kado than na? Me sim o parno kraj Saajvoe, thaj ande paluno kotor ande amari historia birisardan te pindjaren a Elsa Laula khaj dikhlas sar lako dat thaj lako pral o Mattias tasile ando paji thaj varisar jutisarde ande muro rajo. Atunchi dem la jekh misia. Te skrij jekh lil. Te birija voj kodo te kerel dav la lake dades thaj lake prales. Akanak kana das andre ande historia bishavav me vorta a Elsa mura magiasa opral pa paji.

    Zhi pun e Elsa lel sama so lasa kerel pe, lel voj sama ke o paji krujal late kiral, bare bubli huran pasha late, sar te beshlov ande jekh bari piri, kusa kirado paji.

    Voj chi acharel chachimsa so lasa kerel pe feri lel sam asar voj hural opre thaj hirtelen del voj opral pa paji.

    Voj acharel pe sar jekh khindo kotor thaj hasal khatar o paji.

    "So kerdas pe kate chachimasa" pushel pe e Elsa pestar, voj beshel po kishaj angla paji. Anglunes ghindoj voj ke sa kado sas jekh suno, feri chi achardjiol sar jekh suno.

    Uni bajura si za chache sar te avilov kodo jekh suno.

    Elsa lel te khidel e patra anda bal thaj te strangol e bal thaj del pe sa kodi sekunda ke mishtoj ke o kham phabarel avral, te birin lake ghada te shutcion. Vorta atunchi, kana kamlas te aceptulij ke sa kado sas feri jekh suno. Pa papina koronenca po shero, thaj pa jekh rajo tela paji dikhel voj vorta kodo zeleno karandashi.

    Kodo so o kraj-Saajvoe das la te skrij jekh lil.

    "Apol chachoj o parno kraj - Saajvoe!" phenel e Elsa zurales thaj dikhel holjasa pe kodo jezhoro. "No ja, feri te lav man te skrij kado lil. Aehtjie thaj o Mattias si te aven khere, dav muri vorba pe kodo!"

    Sar phirel e Elsa peske po drom khere ghindoj voj peske ke o parno kraj anda Saajvoje rajo das la jekh lokho misia. Ke voj si e maj lashi ande peski klasa te skrij thaj vi te ginavel, e sikavni anda klasa phendas butivar ke e Elsa trobusardov te nakhel uche skoli.

    Jekh djes manglas la laki sikavni te skrij e Elsa jekh lil khaj e Krajaskina ando Stockholm thaj te mangel latar love te birij e Elsa te studiolij thaj te kerel buchi ande bolnica. Elsake sas kodo interesno thaj vov delas pe ghindo save argumentura te skrij ande pesko lil khaj e krajaskina te birij e krajaskina te bishavel lake love.

    "Nashtik te avel maj phares te skrij pe jekh lil khaj o kraj sar khaj jekh krajaskina" phenel e Elsa kana voj aresel khaj lengo kheroro ande Kanaan. "Dostaj feri te skrij variso godjaver."

    Thaj kodole vorbenca lel voj avri o karandashi thaj lel avri paperoshi thaj lel te skrij thaj te ginavel sako vorba po glaso kana voj lel te skrij o lil.

    "Hiresha kraja", skrij voj. "Jekh familja khaj naj intrego, si jekh bibahtali, brigaki familja. Anda kodo naj shukares te mukhel pe shavores te barol opre bi dadesko.
    Djanav ke san jekh zurales godjaver mursh, thaj anda kodo achares kado vi tu. Thaj vi kade musaj me te skrij kado lil te des palpale mure dades thaj mure prales.

    Trobuj te achares, ke bilengo si amaro kher zurales shushio, thaj chi sosko shavoro chi trobijas te barol bi dadesko …"

    Pala but chasura agorij voj pesko skiripe.

    "Kade de! Kodo nas pharo! Tehara si te huchav ande kodo jezhoro thaj si te usij tele khaj kodo parno kraj ande lesko Saajvoe-rajo, thaj anav khere mure dades thaj e Mattiasos!" ghindoj e Elsa peske.

    Voj acharel pe barikani anda pesko lil. Kamlov chachimasa aba akanak te nashel khaj o jezhoro, feri varisar acharel voj ke voj trobuj te pehenij anglunes.

    Kana e Elsa ushtsiel acharel voj ke la si perdo zor. Sigo uravel pe thaj shiol o lil ande pesko gono. Lel pe peste pesko zubuno khaj maj dur sas ekcera khindo.

    "Jaj, ke shill si!" tsipij voj zurales thaj nashel maj dur, ghindosa ke vi kade si te huchel andre ande kodo melalo paji.

    Nashimasa acharel voj sar o gono malavel la ande dume thaj voj lel te djilabel peske jojk thaj acharel pe zurales zurali thaj acharel ke kado djes si lako djes.

    Sar nashel del pe voj ghindo ke voj si fajme e angluni khaj keladas e parne krajes anda Saajvoe kade sigo.

    Feri variso naj sar khaj trobuj kana voj areslas pasha paji. Ke vi te si milaj avral si o intrego jezhoro pahome thaj sa si jekh baro lodo. Kasavo thuloj o paho ke e Elsa chi birij te paravel les, kodo so mezijas kade bahtales de duj minutsi kodolestar mezij hirtelen ke kanchi chi djala avri kadale lilesa.

    "Keladas man kodo ruto kraj!" phenel e Elsa brigasa, thaj vazdel opre o maj baro bar thaj shudel les ando kodo pahome paji. Feri kanchi chi kerdjiol pe. Kana o bar malavel ando paho malavel o bar thaj hural ande kaver righ thaj e Elsa lel te rovel.

    E Elsa shunel sar jekh bari chirikli ficoli pala lake dume thaj kado si lake ekcera chudno. Ke kodi chirikli chi hural thaj inke maj chudnoj kana voj dikhel ke e chirikli si opre pe jekh bari kopachi. Thaj atunchi maladas la o ghindo ke o parno kraj anda Saajvoe avilas e paluni data sar jekh papin. Voj ushtiel opre pe pundre thaj djal karing o vesh te arakhel a bara chirikla.

    Maj feder si kodo te djal ando vesh thaj te rodel sar te beshel angla jekh pahome jezhoro.

    Chi nakhel but vrama zhi pun e Elsa arakhel kodola chirikla. E bari kali chirikli beshlas opre pe jekh baro bar, thaj e Elsa acharel, ke variso chudnoj kadale chiriklasa.

    "Kam djanes sar te aresav khaj o parno kraj ande Saajvoe-rajo…" phenel e Elsa buzhangles, thaj vorta sar si te astarel a chirikla, putrel e chirikli pesko muj thaj djilabel.

    "Vålå, vålå, gierkie oksedh lea, vålå vålå, o bar angla tute si chiro vudar!"

    Elsa acharel ke loshajvel khatar e djili thaj djal zurale pasonca karing o bar te zumavel te lel pe andre po dujto ande Saajvoe rajo.

    Feri o bar chi putrel chi sosko vudar, sar khaj e Elsa ghindojas ke kerla, hirtelen acharel e Elsa sar voj tsinjol thaj del varisar andre ande kodo shudro bar. Kado si ekcera daravno thaj vi melalo. Sar te peres andre ande chick, thaj tela sa kodi vrama randel o bar laki pofa thaj vi dukhavel lako stungo piko... Pala jekh skurto vrama khaj achardjiolas sar 100 bersh aresel voj pe jekh drom.

    Thaj vorta sar ghindojas, areslas voj po dujto ande Saajvoe-rajo, ke opral pa late birij voj te dikhel o paho khaj si opral pa paji.

    "Juuj, areslan aba palpale" phenel jekh glaso pa Elsaki stungo righ, thaj kana voj boldel pe dikhel voj e parne krajes sar vov beshel pe jekh bucuma angla jekh tsini jagori.

    "Jo, thaj andem vi chiro lil khaj manglan mandar" phenel e Elsa. Voj daral feri chi kamel te sikavel peski dar thaj lel jekh paso angla peste te sikavel ke voj naj daravni thaj lel avri o lil. "Pacav ked osta avla kado lil."

    "Chachimasa, tume khaj san sami tume mindik sanas lashie te skrin lila. Te si kade ke varikon sas nasul karing tumende. Na bister kodo kana avesa maj phuri, Elsa, dikhesa ke skrisa but maj but lila ande chiro trajo maj angle", phenel o parno kraj anda Saajvoe-rajo kana vov ginavel o lil khaj e Elsa leske skirisardas.

    Kana das gata kusa o ginajipe dikhlas vov pe Elsa thaj lesko muj asalas.

    "Musaj te phenav ke chachimasa skirisardan o lil mishto", phendas vov. "Kade mishto skirisardan ke fajma mukhav tut te dikhes chire prales thaj chire dades. Von beshen vorta pala kadi tserha".

    12 min
  • Elsa ande Saajvoe rajo

    Elsa djal pe mashie peske dadesa thaj peske pralesa. Hirtelen shunel voj jekh tsipipe. Lako pral mangel zhutipe...

    Lyssna på alla avsnitt i Sveriges Radios app.

    1. Tela paji

    Lashio djes! Loshav ke areslan mande ande muro rajo! Chi pachav ke dikhlam amen maj anglal? Me sim o parno kraj anda Saajvoe thaj me kamlemas te vorbij tumenge pa jekh tsini samitsko tjej khaj bushiolas Elsa Laula.

    Voj sas zurales godjaver thaj chi daral kanikastar, kam shundan aba pa late?

    Besh tuke tele thaj phenov tuke variso so inke kanikaske chi phendem.. Birisa te shunes so e Elsa nakhlas kana voj musajas te nakhel mysticne daravne bucia kana musajsas te arakhel peske prales thaj dades ande muro rajo.

    Beshen tele… ke akank lel pe!

    "Av, Elsa, ke inke but mrezhi si amen te shas ando paji"
    Aehtjies, tatasko hango shudjiol pa intrego paji. Muglaj avral thaj o balval si khindo. Naj shudro, feri e Elsa khaj si 9 bershengi chi kamel te avel pasha paji.
    Kodo shaj lako pral o Mattias te kerel, vov si vorta te perdjiol 7 bershengo.

    "Jaj Elsa, daravni kajni san" phenel o Mattias thaj asal.

    Elsake bal si lunge thaj khudej, thaj ande lako shukar muj si but piegi, thaj vorta sar dikhel pe pesko pral sikavel voj leske jekh nasul muj.
    "Tato, djanes ke mange shudroj o paji! Birin te keren kado, bi muro, me djukarov katet haj khidov ekcera muri. Mekh o Mattias te avel tusa po parahodici, leske dragoj te khindzol" phenel voj, thaj lako dat djanel ke chi njerija lasa, asal tela nakh thaj kerel anda pike.

    "No mishto, Elsa, feri tu uzharesa sa e mashien khaj astarasam" phenel vov thaj pizdel o parahodici ando paji.

    Vi te si jokor tetehara, phabarel o kham zurales pe kado jezhero pasha e shudre plaja. Elsa lel te khidel e muri so voj dikhlas pasha drom kana voj thaj lako pral phirnas karing o jezhero. Kado djes si lake lashio.

    Thaj hirtelen shunel voj jekh baro malajipe ando paji. Elsa boldel pe sigo karing o paji.

    "ZHUTIN MAN! CHI BIRIJ TE MISHKIJ MAN! EMREZHA INKREL MAN TELE!" Mattias tsipij thaj shudjiol e bari panika ande lesko hango,

    thaj e Elsa nashel karing o paji te zhutij pesle prales. Mattias marel peske vastorenca opral pa paji thaj vi te si vov feri 100 metri khatar e Elsa mezin kodal metri sar kilometri..Lake ghada kinjaren la, feri e Elsa usij vi kade sa anda peski zor karing o tsiono parahodici khaj das mujal ando paji.

    Elsa chi acharel dar anglunimastar zhi pun lel sama ke vi voj aba del dela paji. Chachimasa djanel e Elsa te usij mishto, feri akanak chi birij voj te dikhel peske pralesko sheroro opral pa paji.

    Vi lako dat hasajlas. Elsake ghada achardjion zurales phare thaj voj acharel ke aba chi birij, feri lake naj slobodo te ashiavel.

    Voj musaj varisar te zhutij peske dades thaj peske pralores. Del peski maj paluni zor thaj aresel pasha o parahodici, kote tsirdel voj jekh baro vozduho ande peste thaj usij tela paji.

    Sa mezij melalo tela paji thaj Elsa chi birij te dikhel mishto, feri varisar arakhel voj e mrezha thaj usij pasha e mrezha.

    Kote telal acharel voj sar e khan len de dukhan zurales. E bukhe len te dukhan thaj achardjiol pe ke mindjar paradjiona von thaj hirtelen kaljiol sa angla late.
    Vi te si kade ke e Elsa djanel ke nashtik te tsirdel jekh vozduho tela paji kerel voj kodo thaj tsirdel voj jekh vozduho.

    Hirtelen lel sakofalo tela kodo paji te kirol ande diferentne kolorura thaj zuralo odut del tela paji, thaj ande sa kado dikhel e Elsa peske pralesko pundro, khaj das perdal pa e mashengi mrezha.

    "Mattias! aba avav …" tsipij voj. Phabon lake buke ande bare dukha, thaj vi te si voj tela paji chi prdjion von pajesa.
    Feri laki zor del aba avri, thaj lake phare ghada keren kodo ke aba naj la zor te usij maj dur.

    Maj paluno ghindo so nakhel pa lako shero si kodo ke zurales chudnoj kado ke voj chachimasa chi trobusardo te birij te phurdel tela paji.

    Elsa beshel hirtelen opre, thaj tsirdel sigo pala vozduho. Voj ghindoj peske ke voj trobusardov te avel muli, feri variso chudno acharel pe voj sar te kerdjiolov voj jekh masho andral ke o paji smakulij sar o lufto.

    E Elsa beshel peske tele, tela o paji thaj dikhel pe kodol pajeske zelenimata mezij kodo sar te avilov opral pa paji.

    "Kado sas … chudno" Elsa chudij pe ke voj birij korkoro te shunel pesko glaso vi te si voj tela o paji. "Kadoj fajma jekh sunoj" phenel voj peske. Dikhel pe righ thaj kote pashliol e mrezha, feri o Mattias naj kote.

    "Kon san, manusha?" phenel jekh thulo glaso khaj avel maj pashe, thaj e Elsa zumavel te dikhel maj feder ande kodo melalo paji, dikhel voj jekh papin khaj si maj parni sar o jiv. Opral pa a papinako shero si jekh rupuni korona, thaj e Elsa chi birij te inkrel pet haj lel te asal ekcera.

    "Kado kerdjiol feri maj chudno thaj maj chudno! Ertin mange, vorbisardan manca chachimasa, papina??"

    "Kam vorbisardem tusa" phenel e papin, thaj ashavel. "O pushipe si vaj tu manca vorbisardan? thaj so si maj chudno? Manush khaj ghindon ke von birin te vorbin chiriklianca, hmm, chaches hasajlas e ljuma!"

    "Feri … Khaj sim akanak?" Elsa chi acharel kanchi. Khaj lo lako dat thaj o Mattias? Thaj kodi papin phiravel jekh rupuni korona po shero, So kamel latar e papin?

    Angla Elsa lel e papin te parudjiol angla lake jekha, thaj hirtelen parudjilas e papin pe jekh maj phuro mursh, urado ande parne ghada, thaj maj dur si e rupuno korona pe lesko shero.

    "Me sim o Saajvoe-Gånka" phenel o parno kraj, "thaj tu san ande muro them. Chi trobusardanas te aves kate, phen mange sostar tu avilam thaj me dov man ghindo vaj shaj te ashios mande vaj na".

    "Me sim e Elsa Laula thaj me rodav mure dades thaj mure prales, von pele avri anda amaro tsino parahodici thaj von trobusardov te aven ande kodi mrezha, feri von naj kote thaj me chi djanav so te kerav akanak.

    "Chacimasa pelan ande jekh phari situatcia" phenel o prano kraj "Djanes, kado si muro rajo, thaj fajma birij vi te zhutij tut kate". Hirtelen inkrel vov jekh vuneto shipka ande peske vast, thaj e Elsa tsirdel jekh phari dzi.

    "Kodi si mure dadeski shipka, me sudem leske kodi tjohpe - shipka, phen mange akanak kahj lo muro dat!"

    "Nashtik feri te chorel pe varikhon andre amende ando Saajvoe thaj te na nakhel krisi. Elsa, tu chi trobusardanas te aves kate, ale kadi data chi kerov me kanchi. Djanes te skris?"

    "Maj lashi ande intregi ljuma te avla mange musaj!" phenel e Elsa bi darako, "thaj chachimasa chi chordem man andre ande chiro rajo, me usisardem feri pala o Mattias thaj e mrezha!"

    O parno kraj dikhel jekh lungo vrama pe late zhi pun vov del la jekh atveto.

    "No mishto. Atunchi kamav te skris o maj vazno lil so skirisardan ande intrego chiro trajo, jekh lil khaj jekh kraj, thaj zhi pun o kaver shon aresel.. si te anes o lil palpale mande.

    Te birisa te keres kado, atunchi dov tut palpale chire dades thaj chire prales. Te chi birisa te keres kado…. atunchi si von mure… thaj mindik avna maj dur mure.

    Le kado karandashi, thaj atunchi avla fajma o lil lashio!"

    Paramichaki skiritora: Johan Sandberg Mcguinne och Anne Wuolab

    11 min
  • Irma thaj e Bibi Sofia

    Bibi Sofia avilas anda Finlando thaj vorbij sigo e finlandicko chib thaj mindik anel a Irmake presentura.

    Lyssna på alla avsnitt i Sveriges Radios app.

    E Irma kamel peska bibora anda intrego pesko hjilo thaj a Irmake naj drago kana e mama phenel a bibake te na anavel a Irmake presentura.

    E paramichia si finlandicko thaj e Katja Aiha skirisardas la.

    9 min
  • Kheresko mikolajo ando Upplands Väsby

    Juha thaj leski dej si khine pe sa kodo so si melalo avral kote khaj von trajin ando Upplands Väsby. Feri jekh rachi dikhel o Juha jekhe figuros so si ekcera chudno...

    Lyssna på alla avsnitt i Sveriges Radios app.

    Juha shunel jekh djes khatar peski dej ke ando Finlando sas len jekh kheresko mikolajo so lishijaslengo kher.

    Numa sar si ando Upplands Väsby?
    Si vi kote jekh kasavo mikolajo so lishij o kher?



    E paramichia si finlandicko thaj si skirisardi khatar e Johanna Koljonen.

    10 min
  • Rondzeto thaj ping pong lopti

    Liida rutsij pe, thaj e mama feri marel pe karfa te del gata o kheroro.

    Lyssna på alla avsnitt i Sveriges Radios app.

    Liida djal peske maj dur thaj kote si jekh daravno kher.
    Hirtelen lel te brishindel thaj e dar barol thaj e Liida chi djanel khaj te garudjiol.

    E paramichia si finlandicko thaj o Marko Posero skirisardas


    9 min
  • Eira thaj me

    "Me kamlemas te tradav ande dzungli khaj si nasul tigri thaj ande forura khaj vorbin kaver chiba. Kadi paramichia si pa mande thaj muri amalni Eira kana ame planulisardam te tradas ando Finlando."

    Lyssna på alla avsnitt i Sveriges Radios app.

    E paramichia si pa duj amalnia so planulin te traden khetanes anda Uppsala ando Finlando pe duj grast.

    Numa sar djal kado?


    Kadi paramichia si finlandicko thaj e Lisa Lundström skirisardas kadi paramichia.

    9 min
  • Andu o rapper

    Andu si te dikhel peske bare idolos khaj djilabel - o rapper Cheek. Konserto si magicno thaj o Andu phenel ke vi vov si te kerdjiol jekh rapper.

    Lyssna på alla avsnitt i Sveriges Radios app.

    Andu thaj lesko amal o Robin keren jekh grupa thaj si te keren jekh koncerto, numa trobuj te trenulin but.


    Kadi si jekh finlandicko paramichia so e rapp artiska Jesse Piisinen skirisardas.

    9 min
  • Nevi paramicha pe romani chib

    Sako bersh karing o ivent mekel o Radio Romano paramichi pe romani chib.

    Lyssna på alla avsnitt i Sveriges Radios app.

    O Adam Parno Szoppe sas amende ando studio te penel sar zal e buchi kana boldel jek paramicha savi si samisk pe romani chib.

    5 min

About Romane Paramichi

From the publisher's feed

Sagor och berättelser för barn på romani.