ജീവിച്ചിരുന്നു എന്നതിന് ഒരു ​രേഖയുമില്ലാത്ത മനുഷ്യരായി മാറിയ മുന്നാറിലെ തേയില തോട്ടം തൊഴിലാളികൾ. കൃത്യമായ അടിസ്ഥാന സൗകര്യങ്ങളില്ലാത്ത കൃത്യമായ കൂലി ലഭിക്കാത്ത അങ്ങേയറ്റം തൊഴിൽ ചൂഷണം അനുഭവിച്ച് ജീവിക്കേണ്ടിവരുന്ന ഒരു കൂട്ടം മനുഷ്യർ. പല തരത്തിലുള്ള ചൂഷണങ്ങൾക്ക് അവർ ഇരയാക്കപ്പെട്ടു. തങ്ങൾ അനുഭവിച്ചുകൊണ്ടിരിക്കുന്ന അനീതികൾക്ക് നേരെ ഒന്നെതിർക്കാൻ പോലും ആവാതെ നിസ്സഹായരായി അടിമ ജീവിതം തുടരേണ്ടി വന്നു. മുന്നാറിലെ തേയിലക്കാട്ടിൽ ജോലിചെയ്തിരുന്ന സ്ത്രീകൾക്ക് തന്റെ കുഞ്ഞുങ്ങൾക്ക് പാൽ കൊടുക്കാൻ പോലും കഴിഞ്ഞിരുന്നില്ല. തൊഴിലാളികളുടെ ഇത്തരം ദുരിതങ്ങൾ കണ്ടറിഞ്ഞാണ് റോസമ്മ പുന്നൂസ് അവർക്കിടയിലേക്ക് എത്തിയത്. അത് കേരള ചരിത്രത്തിൽ ഇതുവരെ രേഖപ്പെടുത്താത്ത 'മുലപ്പാൽ' സമരത്തിൽ കൊണ്ടു ചെന്നെത്തിച്ചു. കമ്യൂണിസ്റ്റ് പാർട്ടി നേതാവായ റോസമ്മ പുന്നൂസിനെക്കുറിച്ചും മുലപ്പാൽ സമരത്തെക്കുറിച്ചും ഓർമപ്പെടുത്തുകയാണ് മുന്നാറിലെ തോട്ടം തൊഴിലാളികളായിരുന്ന പ്രേമലതയുടെയും കൃഷ്ണന്റെയും മകനായ പ്രഭാഹരന്‍ കെ. മൂന്നാറിന്റെ റാറ്റ് ബുക്ക്സ് പ്രസിദ്ധീകരിച്ച ആത്മകഥ മലങ്കാട് . ആ ഭാഗം കേൾക്കാം.