19. öldin er merkileg á margan hátt og í dag ætlum við að skoða uppfinningar frá 1800-1899 sem breyttu mörgu fyrir samfélagið.

Af hverju er blár blár? Af hverju er rauður rauður? Sjáum við mennirnir alla liti? Hvernig myndast litir? Hvernig myndast regnboginn? Eru alltaf sömu litir í regnboganum? Hvað er litahringurinn og hver fann hann upp og hvað eru heitir og kaldir litir og andstæðir litir?

Við ætlum að gera okkar besta til að svara öllum þessum spurningum í dag.

Sérfræðingur þáttarins er: Ari Ólafsson

Heimildir: Hafdís Ólafsdóttir

Í þættinum í dag ætlum við að heimsækja hin nýju sjö undur veraldar sem voru valin af almenningi. Allt eru þetta gríðarleg mannvirki með magnaða sögu sem við ætlum að kynna okkur. Við flökkum um heiminn og kíkjum á þessa staði og heyrum í leiðinni margt fróðlegt um menninguna og fólkið, gullið og gimsteinana, fílana og fangana sem tengjast þeim.

Í þættinum í dag ætlum við að fræðast um vélmenni, vélmenni í geimnum, fólk á mars og gervigreind.

Hvernig voru fyrstu vélmennin? Hvernig hjálpa þau okku í dag? Taka þau einhverntímann yfir? Förum við mannfólkið einhverntímann til Mars? Geta vélmenni hjálpað okkur við það?

Hvað er gervigreind?

Sérfræðingur þáttarins er: Ari Kristinn Jónsson

Í þættinum í dag ætlum við að fræðast um hluti sem við tengjum öll við páskana og það frí sem framundan er.

Allt byrjar þetta einhversstaðar og við ætlum að fá að heyra um eggin og af hverju þau eru tengd við páskana. Svo er það súkkulaðið sem var einu sinni talað um sem fæðu guðanna. Þar koma við sögu Aztekar og Majar og Kristófer Kólumbus og maðurinn sem stofnaði British Museum sem hét Hans Sloane.

Málshættir eru eitthvað sem við Íslendingar tengjum við bæði súkkulaði og egg, nefnilega súkkulaði egg sem við borðum um páskana og köllum páskaegg. Hvernig byrjaði sú hefð að setja málshætti inn í eggin? Hvað er málshátuur? Er hægt að búa til nýja?

Sérfræðingur þáttarins er: Anna Sigríður Þráinsdóttir.

Þessa dagana er alþjóðleg fjármálalæsisvika. Við hjá KrakkaRúv tökum þátt í þessu flotta verkefni svo í dag ætlum við að fá að vita ýmislegt um peninga. Hvaðan koma þeir og hver er saga þeirra? Hvað er mynt? Hvernig var fyrsti seðillinn? Hver prentar seðlana? Hver ákveður hvaða fólk er á peningunum? Hafa einhverntímann verið myndir af krökkum á peningum?

Þetta og ýmislegt fleira spennandi og skemmtilegt um peninga.

Sérfræðingur þáttarins er: Sigurður Helgi Pálmason

Í þættinum í dag ætlum við að fræðast um flöskuskeyti og það ekki að ástæðulausu. Ævar vísindamaður er sérfræðingur þáttarins enda sá einstaklingur sem veit örugglega mest um flöskuskeyti á landinu. Eins og við vitum flest setti hann flöskuskeyti í sjóinn til að fylgjast með því hvert þau fara og við getum fylgst með því líka inn á krakkaruv.is/floskuskeyti.

Við fáum Ævar til að segja okkur frá þessari vísindatilraun og af hverju hann er svona hrifinn af flöskuskeytum. Hvaða skilaboð fóru í flöskurnar og hvað á að gera ef maður finnur skeytið? Hvaða upplýsingar verða að vera til staðar í flöskuskeytum og hvernig eru þessi skeyti öðruvísi en önnur sem hann hefur sent.

Þetta og margt fleira fróðlegt og fræðandi í þættinum í dag.

Í þætti dagsins ætlum við að fræðast um klukkur og hvernig þær urðu til. Hvenær fórum við mennirnir að reyna að mæla tímann og er hægt að skilgreina hann á einhvern hátt? Hvers konar uppfinningar voru fyrstu klukkurnar og hvenær var klukkan samstillt á Íslandi? Hvað er Greenwich og hvernig tengist sá staður því hvað klukkan er? Ef ég fer í ferðalag og þarf að breyta klukkunni minni 3 klukkutíma afturábak, er ég þá að fara til baka í tíma?

Ýmsar skemmtilegar vangaveltur um tímann og klukkur.

Sérfræðingur þáttarins er: Þorsteinn Vilhjálmsson

Í þætti dagsins ætlum við að fræðast um útvarp. Útvarpstækið breytti gríðarlega miklu í samfélagi okkar og ætlum við að heyra um upphafið og þær merku uppfinningar sem þurftu að smella saman svo útvarpið yrði að veruleika. Við heyrum svo um hvernig og hvenær útvarpið kom til Íslands, hvað var hægt að gera með útvarpstækjunum annað en að hlusta á útsendinguna og hrekki sem voru gerðir í útvarpi hér á árum áður.

Sérfræðingur þáttarins er: Hreinn Valdimarsson

Í þættinum í dag verða bollur, öskupokar, kettir, tunnur, dauðir hrafnar og saltkjöt og baunir, túkall í aðalhlutverki. Við kynnum okkur skemmtilega sögu og merkilegar hefðir þessara daga á Íslandi.