Sentir Asturies

Otra selmana más y seguimos descontando pal branu asturianu, si ye que llega. Lo que sí que llega ye'l nuesu particular filandón y les noticies del mundu que mos trae David Fernández. Facemos conexón internacional con Xuan Nel Turiel que mos sigue faciendo crónica dende'l coral d'Europa. Y seguimos saltando llendes, anque estes menos alloñaes, pa falar col escritor llionés Abel Aparicio que mos presenta "¿Dónde está nuestro pan?". Otra vuelta más tenemos les moderneces y presumicios de Llucía Miravalles, de RingoRango, que güei vien a falanos del mal rollu nel mundu la moda. Y onde siempre mos dixeron que nun había mal rollu yera na España de les tres cultures, otru mitu históricu más del que Faustino Zapico va decínos qué hai de verdá. Y una selmana más tenemos radioteatru cola primer parte de la obra "L'Antroiro", dirixía por Sergio Buelga.

Llegamos a lo cimeru de la selmana ya intentamos facer más fácil tirar lo que queda. Coneutamos con Barbara Biagioli qu'una selmana más fainos reportaxe dende Italia, nesti casu de los sos volcanes. Sentamos nel diván al músicu Luis Núñez, qu'anque folgazán, de música sabe abondo. Seguimos colos retayos d'Historia con Pilar Sánchez Vicente, qu'esta selmana va falanos de los pueblos de tierra, de los celtes. Asomámonos a la pantallina con Iván Llera que mos trae eses series feches nel estáu y que foron ésitu internacional. Ponémonos cómodos na butaca con Vítor Suárez pa falar de les películes que cumplen agora veinte años y que mos faen sentir vieyos.

Arrancamos xunu y paez que la calor ta entrando fuerte nel estudiu porque ya solo pensamos en sol y playa. Y por eso, pa dir bien preparaes a la playa, tenemos delles propuestes lliteraries pa tostar y culturizar. Falamos con Blanca Fernández que ta acabante d'espublizar la so novela "L'home de les caparines". Tamién echamos un ratín cola periodista d'esta casa, Carolina Sarmiento, que mos presenta "Tarada". Seguimos coles moderneces y presumicios de Llucía Miravalles, de RingoRango, que güei mos fala de moda perruna. El que nun sabemos si tien perru, pero sí ye de Mieres, ye l'historiador Faustino Zapico col que seguimos desarmando la historia y que güei mos avera a qué hai de verdá y non alrodiu la figura de Drácula. Y finamos con otra entrega del nuesu radioteatru con "Aeropuertu 68", de Sergio Buelga.

Llega'l 25 de mayu y anque ensin napoleones, llevantamos la mesma bandera nes ondes. Analizamos l'actualidá col nuesu particular filandón y colos datos random pa romper el xelu de Marcos Salazar. Una nueva lleición nel cursu de feminismu pa dummies con Jennifer Berrocal que güei sigue falándonos de violencia sexual. Nes moderneces y presumicios de Llucía Miravalles, de RingoRango, descubrimos qué ye eso del piñatex. Falamos col poeta Diego Solís de la revista de lliteratura mozo "Formientu". Y siguiendo cola lliteratura, nesti casu pala reciella, falamos de "¡Bum!" con Susana Sela y Maitetxu Isla. L'enfermeru Xosé Ambás sigue faciéndonos reflexonar a un añu d'entamar l'andanciu. Y finamos cola bióloga Ánxeles Rodríguez que nos va falar del cuerpu humanu como ecosistema.

Llega'l 25 de mayu y anque ensin napoleones, llevantamos la mesma bandera nes ondes. Analizamos l'actualidá col nuesu particular filandón y colos datos random pa romper el xelu de Marcos Salazar. Una nueva lleición nel cursu de feminismu pa dummies con Jennifer Berrocal que güei sigue falándonos de violencia sexual. Nes moderneces y presumicios de Llucía Miravalles, de RingoRango, descubrimos qué ye eso del piñatex. Falamos col poeta Diego Solís de la revista de lliteratura mozo "Formientu". Y siguiendo cola lliteratura, nesti casu pala reciella, falamos de "¡Bum!" con Susana Sela y Maitetxu Isla. L'enfermeru Xosé Ambás sigue faciéndonos reflexonar a un añu d'entamar l'andanciu. Y finamos cola bióloga Ánxeles Rodríguez que nos va falar del cuerpu humanu como ecosistema.

Rematamos una selmana más analizando l'actualidá a la nuesa manera col filandón y les noticies lloques del mundu de David Fernández. Como cada miércoles seguimos recuperando retayos d'historia con Pilar Sánchez Vicente que güei mos fala de los vicios imperiales romanos. Pela terapia musical pasará Laude Martínez, presentador de "De romandela" en TPA. Asomámonos a la pantallina con Iván Llera pa falar d'Eurovisión y sentámonos na butaca'l cine con Vítor Suárez pa que mos desplique qué ta pasando colos Globos d'Oro. Y, como ayeri marchamos ensín mirar, quedó equí Alma Hidalgo que mos va acompañar a ver si pon orden

Ya nun sabemos si mayea o marcea, pero'l casu ye que vamos viendo ya'l branu de regüeyu. Lo que sí que vemos ensín torcer el güeyu ye los falsos mitos históricos que cada martes mos desarma Faustino Zapico y que güei mos va falar de la camisa d'Isabel la Católica. Falando de camises y de sayes, Llucía Miravalles, de Ringo Rango, vien con otra tanda de moderneces y presumicios, nesi casu d'arte y moda. Coneutamos con Berlín dende onde'l nuesu corresponsal Xuan Nel Turiel mos desplica les razones hestóriques de por qué hai tantos vietnamites na ciudá. Otra lleición más nel cursu de feminismu pa dummies de Jennifer Berrocal nel qu'afondamos na violencia sexual. Asomámonos a la viesca cola bióloga Ánxeles Rodríguez que mos desplica qué ye eso del mimetismu. Y pa finar vien a visitanos Alma Hidalgo, una de les voces más moces de les lletres asturianes y acabante de ganar el premiu "Entaína a escribir" de microrellatos n'asturianu convocáu pola Direición Xeneral de Política Llingüística y l'Institutu Asturianu de la Mocedá.