Sentir Asturies

Saludamos ya les vacaciones repasando l'actualidá d'Asturies y del mundu a la nuesa manera. Coneutamos Italia y Colombia de forma simultánea onde Bárbara Biaglioli y Andrés Toro fálannos de muyeres nel espaciu como Valentina Tereshkova o la italiana Samantha Cristoforetti. Tenemos una nueva tanda de coses random pa romper el xelu nun ascensor con Marcos Salazar que güei nos fala de los cantares que peor avieyaron. Pela terapia musical nel nuesu diván pasa'l cantante y compositor Alfredo González. Nos retayos d'historia va falanos Pilar Sánchez Vicente d'arte paleolíticu y de les representaciones de la muyer nel mesmu. Con Iván Llera percorremos l'actualidá de la pantalla piquiñina. Y güei, Día Internacional de la Visibilidá Transxéneru, vamos falar con Marián Lago, de l'asociación Disex. Y pa finar, como cada miércoles, resolvemos les duldes de los nuesos oyentes nel consultoriu.

Mirando de regüeyu ya pala Selmana Santa seguimos aportando visiones diferentes d'Asturies y del mundu. Arrancamos col nuesu particular filandón nel que conectamos col nuesu corresponsal en Berlín, Xuan Nel Turiel, que nos falará del grupu alemán Corvus Corax que, tamién, tien vinculu con Asturies anque seya de rebote. Tenemos nueva lleición del cursu de feminismu pa dummies con Jennifer Berrocal que güei mos trae cantares asturianos con mensaxe feminista. Nes moderneces y presumicios de Llucía Miravalles vamos averanos a la figura de la reina Victoria d'Inglaterra, la primer influencer. Una selmana más desarmamos la Historia con Faustino Zapico que va falanos de lo qu'hai de verdá alrodiu l'apostol Santiago. En "La viesca" la bióloga y educadora ambiental Ánxeles Rodríguez falaranos de la biomimética. Acompañaranos la escritora Jessica Gómez pa presentar el so nuevu llibru "Mamá en busca del polvo perdido". Y rematamos col radioteatru qu'esta selmana vuelve cola obra "La primer fola", col patrociniu del Conceyu de Castrillón, dirixía por Sergio Buelga ya interpretada por Pedro Fernández y Marcos SL.

Llegamos a la metá de la selmana con tiempu revueltu, pero non tan revueltu como tenemos el programa. Arrancamos coles noticies absurdes del mundu que nos trae David Fernández. Coneutamos con Bárbara Biaglioli que mos cuenta les tradiciones tipiques de la Selmana Santa n'Italia y con Andrés Toro que nos fala del bocadiello beleño y lo poco que se parez a lo que nos conocemos por bocadiellos. Tenemos terapia musical nel diván col escritor y axitador cultural Dolfo Camilo Díaz. Con Pilar Sánchez Vicente seguimos percorriendo la hestoria a traviés de les efemérides, que güei s'averen al güelpe d'estáu de Videla n'Arxentina. Conocemos les novedaes qu'aporten a la televisión estos díes con Iván Llera. Falamos con Pelayo Rodríguez, autor de "Una sentencia llamada bullying" que nos contará la so esperiencia pa col acosu escolar. Y, como cada miércoles, tenemos consultoriu pa intentar resolver les duldes de los oyentes.

Llegó la primavera y nótase nos nuesos collaboradores que lleguen más faladores que nunca. Estrenamos seición con Marcos Salazar de coses "random" coles que romper el xelu y con David Fernández averámonos a les noticies absurdes del mundu. Tenemos la segunda parte del pallabreru feminista con Jennifer Berrocal nel so cursu de feminismu pa dummies. Seguimos desarmando la historia con Faustino Zapico qu'agora tomóla colos vikingos. Nel percorríu poles muyeres artistes vamos conocer a Plinio y les muyeres n'antigüedá con Lucía Montejo. Pegamos un saltu al arte de la costura con Llucía Miravalles de RingoRango que nos fala de Balenciaga. Con Ánxeles Rodríguez, la nuesa bióloga y educadora ambiental, vamos conocer la importancia de protexer los inseutos. Y como aparte de sentir, tamién vemos, ponemos un güeyu pala tele y falamos con Carlos Alba "Cellero" responsable de "Animalada xabaz", el nuevu programa pala reciella que ta a piques d'estrenar TPA.

Arrancamos un nuevu programa nel que como cada selmana tendremos el nuesu particular filandón nel que Marcos Salazar y David Fernández nos amosarán la so particular visión del mundu y de l'actualidá. Conectamos con Berlín pa que'l nuesu corresponsal Xuan Nel Turiel nos cuente una de les fake news más rares de la capital xermana. Con Faustino Zapico seguimos desmontando falsos mitos históricos y güei toca-y a les pirámides d'Exiptu. Avanzando un poco nos sieglos con Lucía Montejo falaremos d'arte y de la monxa Claricia. Damos otru saltu y rozando ya'l presente percorremos la moda d'entamos del mileniu con Llucía Miravalles de RingoRango. Tendremos una nueva lleición de feminismu pa dummies con Jennifer Berrocal que güei abordará la primer parte del pallabreru feminista. Cola bióloga Ánxeles Rodríguez vamos conocer les especies invasores n'Asturies. Y con Marga Pedrayes averámonos a una hestoria de sidra cola so novela "Baxo'l pumar" que ta a piques d'espublizase.

Tres el matriarcáu proclamáu nel programa anterior, reincorpórase Inaciu Galán a copresentar el programa con Arantxa Margolles y, al filandón, vuelven Marcos Salazar y David Fernández colos qu'analizaremos l'actualidá o intentarémoslo. Como cada miércoles conectamos con Italia dende onde Bárbara Biaglioli encamentarános a conocer Venecia y, dende Colombia, Andrés Toro fairános un repás de los oríxenes del chicolate, tan importante na hestoria americana. Pela terapia musical del nuesu diván pasará l'actor asturianu David Blanka, qu'inda arrastra la resaca de los Premios Goya onde "Ane", la película na que participó, algamó tres de los cinco premios a los que taba nominada. Iván Llera fadrá que nos asomemos a la pantallina y falaremos del recién estrenáu documental "Nevenka" sobre'l casu d'acoso sexual nel Ayuntamientu de Ponferrada que sacudió la opinión pública d'entamos de los 2000. Con Vítor Suárez vamos seguir confesando placeres culpables del cine con toes eses películes que, siendo males, nun podemos dexar de ver. Seguimos recuperando retayos d'historia a traviés de les efemérides con Pilar Sánchez Vicente que güei nos recuerda la Constitución de Cádiz de 1812 y a Fernando VII. Nel radioteatru tendremos la segunda y última parte de "El camín de Don Gaspar" interpretada por Sergio Buelga y Lluís Antón González, col patrociniu del Conceyu de Castrillón. Y rematamos, como cada miércoles, col nueso particular consultoriu de duldes de los oyentes.

Inda sonando les reivindicaciones del 8 de marzu, Día Internacional de la Muyer, arrancamos col nuesu filandón d’actualidá al que s’incorporen, ente otres, Alma Hidalgo y Maggy García. Como cada martes asomámonos a les moderneces y presumicios con Llucía Miravalles que nos fala de muyeres con muncho ringo rango en dos de les firmes más conocíes de la moda: Chanel y Dior. Cola historiadora del arte Lucía Montejo conocemos la iniciativa entamada pola Plataforma “La Roldana” que trabaya por visibilizar ya incluyir nos currículos educativos a les artistes olvidaes a lo llargo de la Historia. Con Jennifer Berrocal tenemos una lleición nueva del cursu de feminismu pa dummies averándonos a l’orixe del 8M. Claudia Gutiérrez desplícanos les dificultaes nel deporte femenín onde se caltienen actitudes discriminatories. Les mesmes de les que nun se llibren tampoco los contestos virtuales onde Blanca Fernández, cosplayer y gamer, tien una bayurosa experiencia de lo que ye’l machismu nel mundu los videoxuegos. Y pa finar, como la ciencia tamién s’escribe en femenín, la bióloga Ánxeles Rodríguez falarános del por qué de que se muevan les plantes. Y asina, de sópitu, una hora sintiendo l’Asturies que fala con voces de muyer.

Algamamos l’ecuador de la selmana y afrontámoslu col nuesu filandón nel que David Fernández y Marcos Salazar mos despliquen les novedaes nel conflicto diplomáticu col programa matutino “Desayuno con liantes”. Conectamos colos nuesos corresponsales pel mundu: Bárbara Baglioli va contanos dende Italia cómo son les famoses carreres de caballos de la ciudá de Siena y Andrés Toro dende Colombia va falanos de l’orixe del 8M que se cellebra la prósima selmana. Pel diván de Galán pasará Arantxa Nieto, rostro conocíu de la TPA, a la que-y fadremos la nuesa particular terapia. Na pantallina d’Iván Llera falaremos de frases mítiques de la televisión que pasaron al llinguaxe colectivu, tanto de les teles xeneralistes como de la nuesa TPA. Y na pantallona de Vítor Suárez falaremos de placeres culpables, d’eses películes qu’ensín ser bones, vemos una y otra vez. Tamién tenemos los retayos d’historia de Pilar Sánchez Vicente nos que güei nos ponemos metafísicos nun viaxe dende Giordano Bruno al reló de la fin del mundu y a les grandes duldes de la humanidá. Y pa finar, como cada miércoles, consultoriu pa resolver les duldes de los nuesos oyentes.

 Arrancamos marzu y nun sabemos si marcea o mayea, pero sí que ya miramos de regüeyu a la primavera. Y eso nótase porque nel nuesu filandón los charranes de David Fernández y Marcos Salazar tan especialmente revueltos. Como revuelta tuvo Alemania en tola so historia ente lo xermánicu y lo eslavu como nos cuenta Xuan Nel Turiel dende Berlín. Revuelta anda tamién la nuesa audiencia, sobre tóo Rosa Suardíaz que sigue mandándonos los sos particulares conseyos al programa. Con Jennifer Berrocal, de l’asociación Reflexu de Mieres, averámonos al afrofeminismu y a la doble mochila por ser muyer y racializada. Seguimos desmontando la Historia con Faustino Zapico y esta vez averámonos a qué hai de verdá nel perconocíu derechu de pernada. Nun dexamos lo medieval porque cola historiadora del arte Lucía Montejo vamos averanos al arte medieval y, en concretu, al menos conocíu desendolcáu poles monxes. Pegamos un saltu al presente y futuru pa percorrer con Llucía Miravalles, de Ringo Rango, películes que falen de moda y de lo qu’ella más sabe: moderneces y presumicios. Y finamos, una selmana más, col nuesu radioteatru. Nesti capítulu “El camín de Don Gaspar. Parte 1”, dirixía por Sergio Buelga, col patrociniu del conceyu de Castrillón ya interpretada pol propiu Sergio Buelga y Lluis Antón González.