Sentir Asturies

Arrancamos el programa col nuesu filandón al que s'axunten los charranes de David Fernández y Marcos Salazar. Comentamos el conflictu diplomáticu abiertu col programa hermanu "Desayuno con liantes". Conectamos colos nuesos corresponsales Bárbara Bagioli que nos enseña cómo facer un bon café italianu y dende Colombia lléganos el desafíu d'Andrés Toro pa que faigamos arepes. Pela terapia musical del nuesu diván de Galán va pasar Silvia Quesada, perconocía voz de la música asturiana. Con Iván Llera averarémonos a les novedaes de la televisión, nesti casu la carrera a Eurovisión y con Vítor Suárez falaremos de cine y de los Globos d'Oru que s'entreguen nunos díes. Pilar Sánchez Vicente aprovecha la efeméride del cuarenta aniversariu del 23-F pa falar de los güelpes d'estáu na nuesa hestoria. Y del cine pasamos al teatru porque falamos con Estrella R. y Jorge Arche, de Kamante Teatro, qu'estrenen la obra "Anatomía de una habitación propia" na Llaboral onde reciben una residencia del Centru de Recursos Escénicos del Principáu d'Asturies. Y pa finar, como cada miércoles, pesllamos el programa col nuesu consultoriu de duldes de los oyentes.

Comentamos l’actualidá menos normal col nuesu charrán profesional, David Fernández, al que se sumen los despistes de Marcos Salazar. Cola resaca del Día Internacional de la Llingua materna vamos conocer col nuesu corresponsal n'Alemania, Xuan Nel Turiel, la llingua sorbia, una de llingües minorizaes d’esi país. Pintamos la nueche de moráu con otra lleición del cursu de "Feminismu pa dummies" con Jennifer Berrocal, de l'asociación Reflexu de Mieres, cola que percorreremos el movimientu sufraxista y la concepción de la violencia anguñu y nos entamos del movimiento feminista. Con Faustino Zapico seguimos desmontando la Historia y los falsos históricos alrodiu los Illuminati. N’Asturies sabemos muncho d’ocalitos, asina que nes moderneces y los presumicios de Llucía Miravalles, de Ringo Rango Shop, vamos conocer el lyocell, un texíu mui de moda fechu a base d’esti árbol. Y como n’Asturies, aparte d’ocalitos, lo que tenemos ye munchos quesos, vamos falar col cineasta Pablo Casanueva y el cocineru Lluis Nel Estrada sobro la so nueva serie “Tierra de quesu” que mañana estrenen na TPA. Acabamos, como cada selmana, con una nueva entrega del nuesu radioteatru. Nesti capítulu "Descensu real n’Arnáu", dirixía por Sergio Buelga, col patrociniu del conceyu de Castrillón ya interpretada por Lucía Carracedo, Pedro Fernández y Lluis Antón González.

Acaba un Antroxu que nun ye Antroxu y dende Sentir Asturies intentamos que nun se note muncho. Entamamos col filandón nel que'l nuesu charrán profesional, David Fernández, métese nun endegüeyu colos compañeros de "Desayuno con liantes". Dende Colombia y dende Italia estrenamos corresponsalíes con Andrés Toro y Bárbara Biagioli, que nos falen dende la distancia na nuesa llingua. Pel diván de la nuesa terapia musical pasa Cristina del Valle, cantante asturiana perconocía nel panorama musical poles sos canciones n'Amistades Peligrosas. Como nun podemos escaecer que ye Antroxu, vamos recordar con Pilar Sánchez Vicente les prohibiciones que tuvo esta folixa a lo llargo de la historia, cómo foi el primer antroxu tres la democracia y, como non, falaremos de les comadres. Con Iván Llera conocemos les novedaes de la televisión na pantallina y con Vítor Suárez facemos quiniela de lo que puede pasar nos Oscar. Y, como cada miércoles, finamos col consultoriu de los nuesos oyentes qu'esta vez remóntase a duldes propies de los albores de la Humanidá.

Entamamos con un homenaxe a Juan Luis Nepomuceno, col que tanto disfrutamos y a quien dedicamos esti programa. Nel filandón abordamos les noticies menos noticiables col nuesu charrán profesional, David Fernández. Dende'l coral d'Europa vamos conocer col nuesu corresponsal n'Alemania, Xuan Nel Turiel, la hestoria del checkpoint Qualitz. Pintamos la nueche de moráu p'arrancar el cursu de "Feminismu pa dummies" con Jennifer Berrocal, de l'asociación Reflexu de Mieres. Aprovechando les feches, desmontamos la historia con Faustino Zapico recordando la figura d'Amadeo de Saboya. Como tamién nos presten les moderneces y los presumicios, percorremos con Llucía Miravalles, de Ringo Rango Shop, les nueves tendencies de moda amosaes por Valentino, a ritmu de Massive Attack y con eso del "hate dressing" que nos dexó l'andanciu. Y pa finar, como cada selmana, una nueva entrega del nuesu radioteatru. Nesti capítulu "Pasión nel castiellu de Gauzón", dirixía por Sergio Buelga, col patrociniu del conceyu de Castrillón ya interpretada por Lucía Carracedo, Pedro Fernández y Lluis Antón González.

Arrancamos col nuesu particular filandón al que se suma'l charrán profesional David Fernández. Entamamos cola primer entrevista nel diván de Galán con Rodrigo Cuevas, l’artista más conocíu y reconocíu del panorama musical asturianu col que percorremos la so vida tres de les canciones que-y marcaron. Y d’un artista pasamos a otra, Pilar Sánchez Vicente, cola que nos averamos a Carlos IV, la prohibición de los toros y algo de que nun sé quiénes son unos lladrones.  Y tamién hai tiempu pal ociu y por eso Iván Llera nos avera a les novedaes de la televisión, de la pantallina.  Y si falamos de pantallina, hai que lu facer de la pantallona, al que nos avera Vítor Suárez coles sos propuestes cinematográfiques. Y como la radio tien de ser un mediu d’ida y vuelta, pesllamos el programa col nuesu particular consultoriu resolviendo les duldes de los oyentes unviáes al nuesu Whatsapp.

Moda, Historia, "lleendes urbanes" y muncho arte pa entamar a Sentir Asturies. Arrancamos col nuesu particular filandón al que se suma'l charrán profesional David Fernández. Coneutaremos con Berlín con Xuan Nel Turiel que nos desmonta los mitos alrodiu la eficiencia alemana. Y tamién sobro desmontar coses, nesti casu la Historia, encargase l'historiador mierense Faustino Zapico pa desaniciar mitos tan vieyos como actuales como'l tierraplanismu. Charramos con Lucía Montejo, responsable de Hojas de Acanto ya historiadora del arte, sobre'l papel de la muyer nes representaciones artístiques. Y finamos con Llucía Miravalles, diseñadora de moda maliaya responsable de Ringo Rango, cola que percorremos les nueves tendencies de la temporada usando The Bridgerton, la serie de moda a mou d'escusa. Y, como somos un programa nuevo que nun escaez la radio de tola vida, tenemos radioteatru cola obra "Amor nel Náutico de Salinas", interpretada por Lucía Carracedo, Pedro Fernández, Lluís Antón González, baxo la direición de Sergio Buelga y col patrociniu del Ayuntamientu de Castrillón.