Nel programa d'esta selmana celebramos el Día de la Muyer con Inaciu Galán, Jennifer Berrocal, Lluis Fanjul y Raúl Alonso recomendando cantares feministes. Afondamos en Feminismu pa Dummies, charrando de Les Sinsombreru. Aida Iriarte va falar de la química de los golores, ya nel Diván de Galán charramos con Beatriz, cantante del Grupo Beatriz. ¡Puxa la llucha de les muyeres!

Nel programa d'esta selmana celebramos el Día Internacional de los Escritores con Inaciu Galán, Jennifer Berrocal, Lluis Fanjul y Raúl Alonso recomendando dellos cantares rellacionaos cola escritura. Afondamos na programación del 8M en Feminismu pa Dummies, entrevistamos al duu euskaldun de moda, Dupla y tamos d'estrena cola sección d'Aida Iriarte, el Meitneriu. D'otra banda, echamos el sudu con Pelayo Olái y celebramos los diez años d'Alderiques con Samuel Gradín.

Nel programa d'esta selmana recordamos la nacencia de la poeta gallega Rosalía de Castro y aprovechamos pa falar de los nuesos vecinos, los gallegos. Inaciu Galán encarga a Jennifer Berrocal, Lluís Fanjul y Raúl Alonso cantares gallegos pal filandón del programa. Visítennos les campeones del Telecable Hoquéi Club de Xixón, que tán acabante facese cola Copa Intercontinental, y ponémonos toes de lo más reivindicativo. D'otra banda, volvemos col Feminismu pa Dummies, repasando datos chocantes de Rosalía de Castro, y a lo último, charramos col grupu vascu Nogen, que van tar estos díes per Asturies de conciertu.

Nel programa d'esta selmana pasamos el tiempu del antroxu, con Inaciu Galán, Jennifer Berrocal, Lluís Fanjul y Raúl Alonso poniendo cantares antroxeros. Visítennos Rubén Bada y Leticia Baselgas, de L-R, pa presentar el discu nuevu V.O.S.; echamos el sudu con Pelayo Olái y el Club Badminton Uviéu; charramos con Lluis Aique Iglesias sobre l'actividá cultural en Llangréu. D'otra banda, volvemos col Feminismu pa Dummies y dellos mitos feministes y, a lo último, charramos colos mozos del podcast A fueu celta sobre'l so proyectu. ¡Y a antroxase, que tamos en feches pa ello!

Nel programa d'esta selmana pasamos el tiempu ente perrinos, con Inaciu Galán, Jennifer Berrocal, Lluís Fanjul y Raúl Alonso poniendo cantares bien perrunos y, de la mesma manera, les collaboradores Eva Cameán y Bárbara Biagioli afonden n'anécdotes sobre perros nos sos países. Aymara Glez. Montoto pasa pel estudiu pa falanos de dellos proyectos, como Verbéu o la Tuna Femenina de la Universidá d'Uviéu. Aitor Riera vuelve pa la viesca con dálmates y echamos un poco de sudu con Pelayo Olái y el Hockey Solimar de Xixón. Esti programa ye... ¡guau!

Nel programa d'esta selmana tamos de folixa porque... ¡cumplimos 100 programes! Y ye que too (o casi) va xirar al rodiu d'esi númberu, con cantares que faigan usu d'él. Visítanos Leti Cernuda pa falanos del so proyectu fotográficu prestosísimu Díes Adulces y Xicu Ariza fai lo propio cola segunda edición del Semando Fest, festival de música moza n'asturianu. Pelayo Olái cuéntanos la hestoria de la surfista Carmen López, Aitor Riera fala de coses rares... y nel Diván de Galán tenemos a Arantza Margolles. ¡A brindar!

Nel programa d'esta selmana viaxamos nel tiempu (metafóricamente) pa conocer la música y les noticies que fueron tendencia nos años nos que nacieron los nuesos collaboradores. Temazos y noticiones pal filandón. Lluci Miravalles fálanos d'una conspiración de la Marca Balencaiaga. ¿Sedrá verdá? La cantante del momentu Beatriz, vien a falanos del cantar que sacó con Rodrigo Cuevas va unos díes; adentrámonos na viesca pa conocer animales simpáticos con Aitor Riera, echamos un pocu de sudu con Pelayo Olái y l'Uviéu Balonmano, retresmitimos la última parte del radioteatru con Sergio Buelga y pesllamos con un poco de señardá...

Nes ondes d'esta selmana, Inaciu Galán y los sos collaboradores tresmiten el fríu qu'atopamos nes cais y charramos sobre la nieve mientres calecen nel estudiu. Fernando Argüelles vien a cuntanos la campaña pola salú mental que ta desenvolviendo; Jennifer Berrocal pon nel puntu de mira a los Golden Globes y recomienda películes que pasen el test de Betcher en Feminismu pa Dummies; Lluci Miravalles nos cunta en Moderneces y Presumicios el so viaxe a París; Aitor Riera enséñanos a diferenciar camellos y dromedarios y rematamos el programa cla segunda parte del radioteatru... y un pequeñu problema nel estudiu.

Sentir Asturies vuelve a les ondes de la RPA nun programa presentáu por Inaciu Galán na que va sentise la maxa de los Reis Magos y l'amor pol Nadal (o quiciabes non tanto). Pelayo Martínez Olái, con El Sudu, cuéntanos la hestoria del club de fútbol Riaño, Lluci Miravalles analiza los traxes de los Reis Magos en Moderneces y Presumicios y Sergio Buelga representa un radioteatru mui navidiegu. Too eso y más, onde si non, en Sentir Asturies.