Соңку жаңылыктар

Ош облусуна караштуу Өзгөн райондук сотунда Айзирек Эралиеванын өлтүрүлүшүнө байланыштуу иш карала баштады. Маркум келиндин кылмышка шектүү күйөөсүнө "адам өлтүрүү", куралды, ок-дарыларды мыйзамсыз жүгүртүү" беренеси менен кылмыш иши козголгон.

Эралиеванын жакындары анын өмүр бою эркинен ажыратылышын талап кылып жатат.

Улуттук коопсуздук комитети (УКМК) Ош шаарындагы жогорку окуу жайлардан сабакка катышпаган же академиялык карызы бар 13 295 студент чыгарылганын билдирди. Мыйзамсыз иштерге жол бергендерди аныктоо, алардын жоопкерчилигин кароо уланып жатканын маалымдады.

Кыргызстандын Орусиядагы элчилиги “Азаттыкка” берген маалымат боюнча, бул өлкөдө мыйзам бузууларга байланыштуу көзөмөлдөөчү реестрге ("кара тизме") кирген кыргызстандыктардын саны 103 миңге жетти. Алардын 30 пайызы балдар.

Элчилик ушул тапта Орусиянын аймактарында мигранттарга түшүндүрүү иштерин жүргүзүп жатканын кошумчалады.

20-июлга караган түнү Москванын түндүк-батышындагы Зеленоград району украиналык дрондордун чабуулуна туш болду. Маалыматтарга караганда, атып түшүрүлгөн учкучсуз учактардын сыныктары тийген эки машина күйүп кетти. Көп кабаттуу үй зыян тартты. Жараат калгандар тууралуу маалымат берилген жок.

Шаардын мэри Сергей Собяниндин айтымында, абадан коргонуу күчтөрү Москваны көздөй учкан 16 дронду атып түшүрдү. Дагы беш учкучсуз учак 19-июлда атып түшүрүлгөн. Калаа мэри 20-июлда эртең менен дагы дрондор атып түшүрүлгөнүн кабарлады.

Улуттук коопсуздук мамлекеттик комитети (УКМК ) Бишкек шаарынын мэринин мурдагы орун басары Ы.Ж.С. (Жамалбек Ырсалиев) эч жакка кетпөө жөнүндө тил каттын негизинде чыгарылганын билдирди. Атайын кызматтын 18-июлдагы маалыматына караганда, ал 2.9 миллион сом зыяндын ордун мамлекетке төлөп берди.

17-июлда УКМК Ырсалиевге "кызмат абалынан кыянаттык менен пайдалануу" беренеси менен иш козголгонун, атайын кызматтын тергөө абагына камалганын билдирген. Тунгуч кичи ройонундагы 1,5 миңдей чарчы метр жерди алты жыл бою "мыйзамсыз пайдаланылып келгенине тиешеси бар" экенин, анын негизинде мамлекетке үч миллион сомдой зыян келтирилгени аныкталганын кабарлаган. Ырсалиев менен кошо В.Н.А аттуу жаран да камалганы белгилүү болгон.

Бишкектеги Улуттук госпиталдын жамааты аталган оорукананын дарыгерлери сабалган окуяларга байланыштуу бийлик башчыларына видео кайрылуу жолдошту.

Оорукананын Фейсбуктагы баракчасына 18-июлда жарыяланган билдирүүдө медициналык кызматкерлерге басым жасалып, ур-токмокко алган учурлар көбөйгөнү, жабыркагандар өч алууга кабылуудан айбыгып арыз жазуудан баш тартууга мажбур экени, айрыкча кол көтөргөн күч органдарынын кызматкерлери жазасыз калып жатканы айтылат.

Жаза аткаруу кызматы өздөрүнө караштуу Кайтаруу жана конвой менен коштоп жүрүү бөлүгүнүн жоокери өз өмүрүнө кол салып, мерт болгонун ырастады. Бул фактыны Аскердик прокуратура тергеп жатканын билдирди жана толук маалымат кийинчерээк берилерин айтты.

Орусиянын Мадумасынын айрым депутаттары мигранттардын сыртка которгон акча каражаттарына чектөө киргизүүнү сунуштоодо. Алар ушу тапта Орусияда иштеген мигранттардын которгон акчалары расмий кирешесине ылайыкпы дегенди көзөмөлдөгөн механизм жок экенин жүйө кылган. Эгерде бул ишке ашып калса, салыктан качкан жана кошумча кирешесин жашырган мигранттарды аныктоого мүмкүн болорун айтууда. Соңку учурлардагы мигранттарга карата эрежелер катаалданып, чектөөлөр күчөгөнү мигранттардын кирешесине кандай таасирин тийгизди?

Украинадагы согушта олуттуу бурулуш болобу? Дүйшөмбүдө АКШнын президенти Дональд Трамп Киевге курал-жарак жиберүүнүн жаңы планын жарыялады. Америкалык лидер Москва тынчтык келишимине көнбөсө орусиялык импортко 100% тарифтер киргизилерин эскертти.

Орусиянын президенти Владимир Путиндин басма сөз катчысы Дмитрий Песков Трамптын соңку билдирүүлөрүн талдап чыгууга убакыт керектигин билдирди.

Кыргызстанда алты айда кызамык (корь) жуккан 8572 учур катталды. Ушул убакыттын ичинде ооруга чалдыккан 10 бала чарчап калды. Алардын алтоо бир жашка чейинки ымыркайлар. Эки учур 1-5 жаш, дагы экөө 8 жаштан өткөн балдар. Республикалык иммунопрофилактика борборунун маалыматына караганда, каза болгондордун баары ооруга каршы эмделген эмес. Аталган борбордун өкүлү, эпидемиолог Гүлзада Даданова ооруну жуктуруп алгандар Бишкек шаарында көп болуп жатканын "Азаттыкка" билдирди.