Dada is gegryp en in die duikboot ingeboender. Willem het agterna gespring, die ysige waters in ... maar gelukkig werk Staal-hulle se spesiale selfone ook onder water.

Die Afrikopter kom Staal en sy span dringend oplaai, want een van ons duikbote is in Simonstad gesteel en op pad Namibië toe. Staal-hulle moet een van ons vloot se fregatte by Lüderitz ontmoet om die probleempie op te los, soos net hy kan.

Dié week raak Staal baie deurmekaar … Vreeslik deurmekaar, want Staal raak deurmekaar met die politiek en politici en om dinge verder te vererger – met die twee boewe ook nog wat hulle eie pad byster raak met hulle sluwe plan omdat spiritusdampe hulle bedwelm.

Indien julle dalk wonder wat maak Staal en Koos en Willem en Dada en advokaat Gerrie Nel op ʼn trein – hulle ry trein vir ontspanning. Maar, die groot vraag is, is dit enigsins moontlik vir Staal Burger om heeltemal te ontspan? Wel, luister en vind uit …

Staal Burger is dol oor museums, want jy leer soveel interessanthede oor geskiedenis en die verlede. Maar sy museumbesoek verander al weer in ʼn avontuur as dit blyk dat twee werkers eintlik museum-muiters is …

Die Suid-Afrikaanse Bond van Onbehulpsame Klerke roep Staal Burger se hulp in, want die twee klerke van Klerksdorp is nog meer onbehulpsaam as gewoonlik.

Nog een van Staal Burger se vele talente is dat hy ʼn bobaaskok is. Hy het ʼn diploma wat hy in een van die top-sjef-akademies in Switserland verwerf het – destyds, toe Gordon Ramsey een van sy klasmaats was. Maar in vandag se episode kry hy nie eintlik kans om te kook nie….

Staal Burger moet twee gomtorre (wat boonop met torre boer) keer dat hulle nie ʼn tussenverkiesing met hulle torre in die wiele kan ry nie.

Staal Burger moet Gerrie Nel bystaan teen twee boewe wat die hele rooibosteebedryf in die Clanwilliam-omgewing bedreig. Om die waarheid te sê, ons rooibosteebedryf is dalk op die koffie….

Staal was juis op die punt om die jongste boek oor hondesielkunde te begin lees toe die skype-alarmpie op sy superslim-slimfoon afgaan. Staal Burger se hulp word ingeroep by ʼn hondeskou in Brakpan, waar dinge dreig om lelik skeef te loop.