Tabakgolo

Ga bjale re kitima magatong a godimo a kgaotšokgaotšo ya mohlagase. Taba ye ke hlobaboroko ka mono nageng ka ge e ama mafapha le ditirelo tše dintši.

Kgoro ya Tlhabollo ya ikonomi, Tikologo le Boeti yeo e etilwe ke Molekgotlaphethiši Rodgers Monama ka mono profinsing e tsebagaditše sephetho sa go beya molao gore mafelo ka moka a go rekiša madila a tla tswalela ka 12AM. Ngongerego ye kgolo ke ya gore Intasteri ye ya go rekiša madila le bona badiragatši ebe ele gona ba leka go tsoša hlogo morago ga leuba la Covid-19.

Polelo e re mogolo ga a hlokege baneng! Le moetapele wo moswa wa liki ya baswa ya ANC o tlogile a laetša gore baswa ba swanetše go ba le kemedi ya go tsebalega boetapeleng bja naga.

Baetapele le baemedi ba dinaga tsa go fapana tsa lefase ba sa tswela pele go etela ka mono Afrika Borwa. Beke ka beke re amogela baeng. Ge re bolela ka se sebaka Toonakgolo wa Netherlands Mna Mark Rutte le wa Denmark Mme Mette Frederikse.

Ke mengwagangwaga mosadi yo a ketekaketa dikgorong tša tsheko e le ge a lwantšhana le go fegwa ga gagwe. Ga bjale o ntšhitše maina le dikgatišo tša bangwe bagolwane ba phathi ye e bušago gore ba lekile go jabetša monna wa gagwe mašeleng a go balelwa R600 000.00 gore pego ya dinyakišišo tša bohodu polaseng ya Phalaphala e timelele. 

Moeng: Mosekaseki wa ditaba tša merero ya dipolotiki Dr Sebake.