Tabakgolo

Re amogela babegaditaba bao ba bego ba šetše morago ditiragalo tša bosenyi, le go bega ka ga tšona elego Pelane Phakgadi le Maageketla Mohlabe. Pelane Phakgadi obe a bega ka ditiragalo tše go tšwa ka Durban go la Kwa-Zulu Natal, mola Maageketla Mohlabe a be a beile seemo leihlo le go bega ka ditiragalo tše ka kua go la Johannesburg, ka Gauteng.

Mopresitente wa naga Cyril Ramaphosa o boile gape morago ga matšatši a lesomenne, go tla go boledišana le setšhaba sa Afrika Borwa, kage a ile a tshephiša mo dibekeng tše pedi tša go feta. Mopresitente le kabinete ya gagwe, ka maele a boramahlale ba fihleletše sephetho sa go tlogela naga ye go legato la bone leo le katodišitšwego la dikiletšo tša mesepelo ya malebana le leuba la Covid-19, tekano ya dibeke tše dingwe gape tše pedi – elego go fihla ka la 25 kgweding ye ya Mosegamanye.Ramaphosa o re naga ye mo bekeng tše pedi tša go feta ebe e itemogela diphetetšo tše diswa tša Covid-19, tša go balelwa go tše 20,000 tšatši ka tšatši, mola batho ba go feta 4,200 ba lobile maphelo a bona ka baka la Covid-19, mo dibekeng tše pedi fela.