„Það skiptir meira máli að hjálpast að við að búa til frábæra einstaklinga heldur en frábæra íþróttamenn. Ef við tökum sem dæmi 70 krakka í 7. flokki, þá komast kannski 1 eða 2 í meistaraflokk. Þá er svo mikilvægt að hinir 68 klári ferilinn hjá félaginu með sterka sjálfsmynd. Þori í menntaskóla með kassan úti, í háskóla og blómstri í því sem þeir taka sér fyrir hendur, afþví að þeir fengu svo frábæra þjálfun,“ sagði Þorgrímur Þráinsson í Taktíkinni á N4.

Rithöfundurinn og formaðurinn Þorgrímur Þráinsson hefur alltaf verið viðriðinn íþróttir. Hann á að baki glæsilegan íþróttaferil þar sem m.a. mætti nefna bikarmeistaratitil í spjótkasti, fjölmarga meistaraflokksleiki í efstu deild í knattspyrnu og 17 landsleiki með A-landsliði Íslands. Þá hefur hann starfað með landsliði Íslands í knattspyrnu í 12 ár og þekkir því starfið úr innsta hring. Í þættinum ræðir Þorgrímur við Skúla Braga um ferilinni, starfið með landsliðinu og gildi liðsheildar. Öll tilheyrum við einhverri liðsheild í lífinu, en getum við mögulega lært eitthvað af íslenska landsliðinu? Liði sem státar af einstaklega sterkri liðsheild sem hefur skilað þeim eftirtektarveðrum árangri á heimsvísu.

Silvía Rán Björgvinsdóttir er gestur Skúla Braga í þætti kvöldsins af Taktíkinni á N4.

▶️ Íþróttakona Skautafélags Akureyrar fyrir árið 2018.

Þrátt fyrir ungan aldur hefur Silvía unnið 7 Íslandsmeistaratitla með Skautafélagi Akureyrar og skorað 23 mörk og gefið 7 stoðsendingar í 20 leikjum með landsliði Íslands, en hún er aðeins 19 ára gömul.

Ásamt henni mætir ein sigursælasta júdókona Íslands frá upphafi, Anna Soffía Víkingsdóttir í settið.

▶️ 29 Íslandsmeistaratitlar

Hér ræðum við m.a. uppbyggingu í júdó kvenna:

„Íþróttir kenna okkur svo mikið á lífið og það er það sem ég segi við krakkana mína. Það verður ekkert allt auðvelt og fullt af erfiðleikum sem við eigum eftir að upplifa, en þið vitið að þið rúllið því upp ef að þið rúllið þessu upp í dag,“ sagði Ragnheiður Runólfsdóttir, yfirþjálfari hjá Sundfélaginu Óðni. En hún á að baki glæsilegan feril sem afreksíþróttakona í sundi, þar sem hún keppti meðal annars tvisvar sinnum á Ólympíuleikum og var valin Íþróttamaður ársins 1991, og var þá aðeins önnur konan til þess að hljóta þá nafnbót.

„Hér hittist fólk, og líka þeir sem horfa kannski ekkert á fótbolta dagsdaglega. Það mætir til að hitta aðra, fá sér kaffi, Prins Póló, fara yfir málin og samgleðjast unga fólkinu sem er að spila hérna. Þessvegna er það grátlegt að knattspyrnan hafi ekki fengið til baka frá sveitarfélaginu það sem hún hefur gefið byggðalaginu gegnum tíðina.“

„Það skiptir engu máli hvort það er kvenna eða karlabolti. Það er rosalega sterk knattspyrnuhefð og áhugi á íþróttinni á Vopnafirði. Það hefur verið alla tíð og ætli það megi ekki rekja það til góðs árangurs á áttunda og níunda áratugnum, það skilur eitthvað eftir,“ sagði Bjartur Aðalbjörnsson um áhugann á knattspyrnu á Vopnafirði í viðtali í Taktíkinni sem var tekið úti á knattspyrnuvellinum á Vopnafirði. 

„Þetta er erfitt þegar þú byrjar ekki með allt liðið fyrr en í lok apríl eða byrjun maí. Þá tekur það alveg 4-5 leiki í deildinni að fá liðið til þess að spila eins og maður leggur upp með. Þetta er því kannski erfiðara en í Reykjavík eða á Akureyri. En svona er þetta og við verðum bara að reyna að vinna sem best úr stöðunni,“ sagði Dragan Stojanovic í viðtali hjá Skúla Braga úti á vellinum í Neskaupsstað. 

Íþróttakarl Akureyrar 2018 er Viktor Samúelsson.  

Íþróttakona Akureyrar 2018 er Hulda B. Waage

Akureyri Handboltafélag ákvað að hefja nýtt ár með nýjum þjálfara. Geir Sveinsson er mættur norður og tekinn við liðinu. „Ég segi oft að handbolti sé tiltölulega einfaldur, hann gengur út á það að vinna leiki og það auðvitað verður okkar markmið.“

Þá mætir Þórólfur Sveinsson einnig í settið til þess að ræða markmiðasetningu og mikilvægi þess að bjóða uppá fræðslufyrirlestra um íþróttir í auknum mæli. Hann lét hanna og útbúa markmiðakort í þeim tilgangi að hjálpa fólki að setja sér markmið og fylgja þeim eftir. 

Já flugdreki tekst ekki á loft í meðbyr heldur mótvindi! Sandra María Jessen er sönnun þess. Hún heldur nú út í atvinnumennsku til Bayer Leverkusen eftir 140 leiki og 85 mörk fyrir Þór/KA, en hún á einnig 24 leiki og 6 mörk fyrir íslenska landsliðið. Hún hefur gengið gegnum súrt og sætt á þessum tíma en virðist alltaf koma sterkari til baka! Tvö krossbandaslit, tveir Íslandsmeistaratitlar og núna nýlega hefur hún opnað sig um það að lenda á vegg og finna fyrir áhugaleysi. Sandra er sannarlega fyrirmynd þegar að kemur að því að takast á við mótlæti.   

182 landsleikir fyrir Ísland, silfurverðlaun á Ólympíuleikunum í Peking 2008, Brons á EM í Austurríki 2010, Bikarmeistaratitlar með KA 1995 og 1996 og síðan Íslandsmeistaratitill 1997 með KA og 2006 með Fram. Já það er ekki amaleg ferilskráin hjá handboltamanninum Sverre Jakobssyni sem upplifði flest allt sem ungum iðkendum íþróttarinnar dreymir um. En á sínum atvinnumannaferli spilaði hann með VfL Gummersbach og TV Großwallstadt í Þýskalandi.

Alexander Heiðarsson júdókappi og Rut Herner körfuknattleikskona eru gestir Skúla Braga í Taktíkinni að þessu sinni.

„Það sem stendur uppúr er þegar að ég tók Evróputúrinn í sumar, keppti þá á tveimur European Cup mótum. Svo vann ég til verðlauna á alþjóðlegu móti í Svíþjóð og þá fékk ég KEA styrkinn núna um daginn,“ sagði Alexander Heiðarsson einn efnilegasti júdókappi landsins þegar að hann var spurður að því hvað stæði uppúr á árinu 2018. Hann stefnir á stóra hluti á næsta ári og Ólympíuleikana 2024.

„Hæfileikarnir, getan og þekkingin í körfubolta er orðin svo gríðarleg. Þú getur byggt þig upp á svo mörgum sviðum. Þetta er ekki lengur bara þannig að þú ert annaðhvort stór undir körfunni eða lítill útá velli sem hleypur með boltann, það er svo margt þarna á milli og við erum alveg farin að sjá það. Enda erum við orðin miklu betri í körfubolta núna en við vorum fyrir einhverjum árum síðan,“ sagði Rut Herner Konráðsdóttir fyrirliði Þórs í körfubolta í áhugaverðu viðtali um lífið í körfuboltanum og stöðuna á körfuboltanum hjá Þór á Akureyri.

„Maður lærir það held ég bara mjög snemma að það sem gerist á vellinum, það skilur maður eftir á vellinum,“ sagði Rut einnig, en konan hennar Unnur Lára Ásgeirsdóttir er einnig leikmaður liðsins og þær eiga saman eitt barn og annað á leiðinni.

Björk Óðinsdóttir, Crossfitkeppandi og Andri Snær Stefánsson leikmaður KA í handbolta eru gestir Skúla Braga að þessu sinni í Taktíkinni

„Ég myndi segja að þetta væri tvískipt íþrótt. Crossfit er æfingarform fyrir alla, líka fyrir ömmu mína. Þetta er í raun hugmynd af hreyfingu, hvernig hún er sett upp og þú ert alltaf í hóp. Ég get í raun æft með ömmu minni, því við getum verið að gera sömu æfingu nema ég geri hana erfiðari og hún meira á sínum hraða og síðan getur hún breytt aðeins æfingunum til að henta sér betur. Þetta er það sem er svo lokkandi og þessvegna er þetta orðið svona stórt. Það eru svo margir sem að geta farið í Crossfit. En svo er keppnisíþróttin Corssfit og hún er dálítið meira crazy,“ sagði Björk Óðinsdóttir keppandi í Crossfit og þjálfari.

KA vann Akureyri um helgina 25-26 í Olís deildinni í leiknum um montréttinn í bænum. KA hefur því unnnið báðar rimmur þessara liða á tímabilinu sem hafa báðar verið rosalegar, troðfullar hallir og rífandi stemning. „Ég er orðin 32 ára en ég fékk gæsahúð strax í upphitun þegar að menn byrjuðu á trommunum að styðja sín lið. Það var þvílíkur kraftur báðu megin,“ sagði Andri Snær Stefánsson fyrirliði KA í handbolta eftir leik og bætti síðan við „svona vill maður hafa þetta. Þetta var ótrúlega gaman og ástæðan fyrir því að maður er í þessu, til þess að spila svona leiki.“