Þorgrímur Þráinsson hefur heimsótt ótal skóla undanfarin ár þar sem hann ræðir við unglinga um lífið og tilveruna. Þessir fyrirlestrar hafa notið mikilla vinsælda á þeim þrettán árum sem hann hefur farið í skóla, en þeir eru u.þ.b. 200 á hverjum vetri. Við fengum að vita í þættinum hvað það er sem hann leggur mesta áherslu á og hvað það er sem helst brennur á eldri grunnskólanemum þessa lands.

Bókaútgáfan Sæmundur lætur ekki deigan síga og hefur gefið út þrjár nýjar bækur á þessu nýbyrjaða ári. Ein þeirra heitir Mannavillt. Þetta er glæpasaga þar sem dularfull dauðsföll gamalla vinnufélaga og gáleysislegt tal á bar setja furðulega atburðarás af stað. Höfundurinn hefur verið þekktur fyrir að halda sig við staðreyndir í fyrri bókum sínum, enda sagnfræðingur, en heldur nú út á nýja braut, glæpabraut getum við kannski sagt, en þessi nýjasti glæpasagnahöfundur okkar heitir Anna Ólafsdóttir Björnsson og hún var gestur okkar í seinni hluta þáttarins í dag.

UMSJÓN GUNNAR HANSSON OG MARGRÉT BLÖNDAL?