طعمية في الغربة

انا اتعرفت على إسلام عشان احنا الاتنين كنا بنحاول نسافر ونشوف الحياة في بلاد جديدة. دلوقتي بعد ما استقر في التشيك وانا استقرت في كندا قولنا ندردش ونشوف حياتنا عاملة ازاي برة مصر.

ليه في مصريين كتير في المانيا؟ بتكلم في الحلقة ديه مع محمد عبدالناصر صديقي اللي عايش في برلين وبيحكلنا تفاصيل حياته في بلد لسة مش متمكن من اللغة بتاعتها. عبدالناصر بيتكلم في مميزات برلين كمدينة فيها كل شكل ونوع وفي نفس الوقت بيتكلم عن الحاجات اللي هو شايفها مهمة في مصر مش بيلاقيها في المانيا.

آية هي السبب الرئيسي اللي خلاني اسافر كندا. احنا الاتنين عملنا نفس الماجستير في كندا والصين بس هي كانت سابقاني بسنة. دلوقتي بعد ما عاشت سنة في كندا وسنة في الصين، بتشتغل في دبي. في الحلقة ديه بنشرح ميزة العيشة في كندا والصعوبات اللي واجهتنا في الصين وليه دبي مش مدينة الاحلام لكل المصريين.

اهم ما في تجربة عمار انه عاش في ثلاث بلاد مختلفين تماما وكل بلد فيهم كان بيعمل حاجة مختلفة عن التانية. من دراسة لتدريس لمحاولة اخيرة للاستقرار برة مصر، بتكلم مع عمار عن اهم المراحل اللي عدت عليه في التجربة ديه والأهم، ازاي قدر يكون مجتمع وصداقات في كل مكان بيروحوه. 

فرق كبير بين انك تعيش في بلد بتتكلم لغتها ومحدش يقدر يحدد انت من فين، وبين انك تعيش في بلد مش بتفهم لغتها والناس بتقدر تحدد انت جاي من فين على طول بسبب طريقة لبسك. ديه كانت نقطة قوية اتكلمت فيها مع نيفين سعيد في الحلقة ديه زائد افكار تانية عن ازاي الهجرة بتعلم الطبيخ والتخطيط لاختيار البلد اللي هتسافرها والفروقات بين ثقافتنا كمصريين وثقافة الغرب.

كريم علي من اعز اصدقائي. ليه تجربة مختلفة في الهجرة بما انه سافر امريكا سنتين وقرر بعدها يرجع يعيش في مصر. بعد سنتين في مصر وجواز، قرر انه يسافر امريكا تاني، المرة ديه في ميامي. وجهة نظر كريم في الهجرة كانت مميزة جدا بالنسبالي خصوصا اننا اتكلمنا عن فكرة انك تعيش برة مصر بس مع اسرة ومتطلبات وضع زي ده.

علياء سافرت انجلترا سنة تدرس إقتصاد ورجعت مصر. الحلقة ديه كانت فرصة لينا اننا نشوف الاختلاف بين حياتها في مصر وفي انجلترا ونتعرف على تجربها مع العيشة في سكن مشترك مع ناس ماتعرفهمش والتعامل مع الوحدة وحاجات تانية كتير زي المنحة اللي اخدتها وهي منحة Chevening.

شريف هاجر لمدينة صغيرة من فترة قصيرة اسمها ديلاوير في امريكا، جمب نيويورك ونيوجيرسي. في الحلقة ديه بنتكلم عن الحلم الامريكي، العادات اللي بتاخدها معاك غصب عنك من مصر والتعامل مع المصريين برة وتكمل مشوار الهجرة كله على بعضه ولا لأ وتعمل ايه في ازمة الشطافة لما تسافر

ملخص الحلقة الاولى من طعمية في الغربة بودكاست

حسن من اول اصدقائي اللي سافروا يعيشوا برة مصر من اكثر من اربع سنين. في الحلقة ديه بنتكلم عن حاجات كتير ليها علاقة بالعيشة برة ومصر وفي اسبانيا تحديداً زي روتين الحياة والكلام بلغة غير العربي والعنصرية وإسرائيل والتعامل مع العرب وتكوين الصداقات في مجتمع متعرفش فيه حد. 

بعتذر على عدم وضوح الصوت احيانا، لكن بقية الحلقات الصوت هيكون افضل.