Analizamos as cancióins candidatas a representar España en Eurovisión con Virtudes e Ricardo Saavedra. Celebramos o Día da Paz no CEIP Froebel de Pontevedra e o CRA de Valga. O piloto Francisco Narla axúdanos a entender como se produciu o accidente aereo de Washington. Descubrimos unha aplicación para chatear nos avións falando co seu creador, Íñigo Merino. O responsable de Granxa Campomayor, de Palas de Rei, Rodrigo García, cóntanos como son os ovos a baixa temperatura que comercializa a súa empresa. Entrevistamos ao rapeiro García MC e a Antonio Álvarez (CTangana). E ademáis Miguel López Crespo advírtenos do risco de mercar coches de segunda man por internet e Nusca Chousa danos consellos para a nosa horta.

Falamos coa sicóloga clínica Isabel Calle das "segundas oportunidades" nas parellas. Facémonos eco das protestas dos taxistas pola suba do custe dos seguros dos seus vehículos. O astrónomo Borja Tosar descúbrenos un exoplaneta semellante á Terra. Rememoramos a guerra de Filipinas con José Enrique Gil-Delgado, autor da novela "Y volcanes en el mar". Paseamos pola paisaxe protexida dos penedos de Pasarela e Prado co concelleiro de Vimianzo Víctor Santos. Felicitamos ao restaurador Axel Smith por ser galardonado co premio a cociñeiro revelación en Madrid Fusión. O doutor Luis Gutiérrez Serantes explícanos por que estamos máis tristes no inverno. Moncho Lemos coméntanos a serie de terror "From" e con Rafael Quintía saberemos da importancia dos ritos con lume en Galicia.

O coordinador de urxencias do Chuac, José Manuel Fandiño, explícanos como é o traballo nestes servizos médicos. Aprendemos o que é a drónica con Francisco Álvarez, responsable da escola de pilotos de drons Aerocámaras. O alcalde de Tui, Enrique Cabaleiro, fálanos da como o seu concello pretende convertirse nun "destino turístico intelixente". O director da Tecnópole de Ourense, Javier Taibo, preséntanos a XX edición de Galiciencia. O noso especialista en novas tecnoloxías, Marcus Fernández, explícanos que é DeepSeek, o novo sistema de IA. Santi Araujo traenos as súas "Canciones para bailar". O restaurador Axel Smith ofrécenos a proba das súas croquetas, as mellores de España.

No Día Internacional da Educación fixámonos nos 250 millóns de rapaces que están sen escolarizar no mundo. Desta situación falamos con Irene Marín, coordinadora de Unicef en Galicia. Ademáis, Jesús Isla, un profesor xubilado tras 49 anos de exercicio, cóntanos como cambiou a educación en todo ese tempo. Viaxamos a Fitur para coñecer cara onde camiña o turismo e alí atopamos a Juan Rivadulla, presidente de Agavi, Agustín Vázquez, de "Hola Mundo" e Alfonso Martínez, presidente do Consorcio de Empresarios Turísticos de Sanxenxo. A concelleira de Turismo de Ferrol, Maica García, preséntanos a campaña "Ferrol de película". Recibimos aos autores do podcast "Non vale enfadarse", Adrián Pérez e Alex Novo. Asistimos co alcalde de Nigrán, Juan González, ao retorno a casa dun mosaico de século III. Carlos Polimón ábrenos o seu libro "De puentes por España" e pedímoslle ao naturópata Xavier Akerman algúns consellos para combate-lo catarro.

Neste programa falamos do risco que supón crer a cegas no navegador do coche e lembramos co cineasta Ángel de la Cruz a película "Os mortos van á presa" que se inspirou nun incidente provocado polo erro dun camioneiro ao usar o GPS. Conectamos coa alcaldesa de Camariñas, Sandra Insua, que está en Fitur presentando a Mostra do encaixe de Camariñas. Preguntámoslle ao editor e deseñador Carlos Valdés se aínda están de moda as axendas en papel. A intérprete xaponesa Mine Kawakami fálanos do concerto que ofrecerá na catedral de Santiago tocando un piano de cristal. A escritora Reyes Calderón traenos o seu libro "Los crímenes del caviar". Asistimos á estrea do documental da Fundación Celta "Ceo e area, a oportunidade de soñar" e ademáis ofrecemos os consultorios de Nuska Chousa (coidados da horta) e de Miguel López Crespo (consumo)

Lembramos a Xosé Manuel Piñeiro falando cos que foron compañeiros seus en televisión e na radio. Preguntámoslle ao dermatólogo Alexandre Docampo con que frecuencia debemos lava-lo pelo. Coñecemos a competición de robots da Universidade de Vigo con José Fariña, director da Escola de Enxeñería Industrial. O cantante naronés Lode convídanos a seu primeiro concerto. A escritora Ángela Quintas preséntanos o seu libro "De la boca a tu salud". A podóloga Sara Touceda explícanos por que algunhas persoas teñen sensación de adormecemento e frio constante nos pes. Ademáis estreamos sección co antropólogo Rafael Quintía que nos fala da maxia erótica na tradición popular.

Celebramos o Día Internacional das apretas cunha defensora desta manifestación de agarimo, a fundadora de Toxío, Nuria Espasandín. O músico portugués Vasco Ribeiro Casais, OMIRI, preséntanos o seu disco "Pé a pé". Jorge Mira explícanos por que o Consello da Cultura Galega recomenda limitar o alumeado público. O compostelán Alejandro Otero fálanos da súa primeira novela. O investigador do Instituto Oceanográfico de Vigo, Bruno Almón, cóntanos o que sabe dunha especie exótica que está invadindo as rías galegas. Asistimos ao Cumio Ibérico de Xornalismo Local e preguntámoslle aos vigueses que opinan de que teñan que erguer a man para que pare o bus urbano.

O investigador privado Gonzalo Solís explícanos como é o traballo dos detectives na actualidade. Falamos da gala Youtubeiras deste ano co seu presentador, Javi Sánchez, e coa súa coordenadora, Sara Pino. Visitamos o supermercado asiático máis grande da Coruña e unha libraría de segunda man en Vigo. O formador da Garda Civil Iván Carril alértanos sobre os videoxogos que inducen á ludopatía. Santiago Bieito cóntanos como son os cursos sobre o mundo da aviación que organiza a Aula Newton en San Cibrán das Viñas. Santiago Freire preséntanos as rotas turísticas que están promocionando os concellos da ría de Muros e Noia.

O magacine das Tardes na Radio Galega, con Antón Rebollido

Pedímoslle a receita das súas croquetas a Juan Manuel Pérez, responsable de Croketas D, o obradoiro que máis elabora en Galicia. Celebramos os 50 anos de existencia do CIP A Ramallosa, de Teo, con Berena Fontenla. Ángeles Rios, presidenta da Asociación Gallega Empresas de Ascensores , proponnos unha saída profesional con alta demanda: conservador de ascensores. Visitamos o Salón de Estilismo Canino Monbterrey, en Vigo. Recibimos ao cantautor ferrolán Marcos Mella. Miguel López Crespo, da Unión de Consumidores de Galicia, oriéntanos sobre como actuar cando temos que reclamarlle a un hotel por un servizo deficiente.