Pablo Carracedo "Jasper" fala de "Resistir é vencer", un canto de rebeldía e esperanza que Loita Amada presenta cunha xornada de actividades culturais en Compostela.

Nas súas “descubertas” Carlos Crespo tráenos o terceiro disco dos eumeses Bule (Pablo, Chelen, Óscar e Jetu) : ‘Non vale parar’. Segundo eles música punk '77, powerpop e mod revival

Andrea Jamardo dedícalle un monográfico á escritora coruñesa Érica Esmorís, da que acaban de chegar ás librarías tres novelas.

Esmorís conseguiu o premio Merlín 2025 con ‘Erin e o lobo’ (Xerais), e foi gañadora e asemade finalista do Raíña Lupa con ‘Esta é a miña historia e terás que crela’ (Xerais) e ‘O Peculiar’ (Cuarto de inverno), respectivamente

Conversamos tamén coa autora: “Todas as miñas obras teñen capas”

Eva Veiga publica "Do que se volve raíz", un poemario que “devén da escoita atenta e da perplexidade ante unha linguaxe que non pode dicir”.

Begoña Vázquez recomenda tres curtas que están en agalega.gal.

‘Anacos’, de Xacio Baño; ‘Son unha tumba’, de Khris Cembe; e ‘As vacas de Wisconsin’, de Sara Traba.

Afonso Becerra lévanos de ruada co colectivo VACAburra, onde están Andrea Quintana e Gena Baamonde nun proxecto que xira arredor da creación escénica e coreográfica en clave contemporánea. Andan agora co espectáculo ‘Ruar’ como divertimento e xogo nas rúas con Davide Salvado

Tito Lesende fai un percorrido norteño que comeza na Coruña, coa estrea do novo tema de Roura e segue por Cedeira con Guadi Galego. De aí a Asturias, cos novos traballos de Marisa Valle Roso e Rita Ojanguren. A ruta remata en Cantabria con Quique González, que saca disco mañá venres

O espazo cultural Río Lagares promove Poetas de Garda, un experimento sobre os efectos balsámicos da poesía. E no Museo do Pobo Galego as imaxes do Premio Luís Ksado