لو من أحلامك تلف أوروبا بميزانية محدودة و في نفس الوقت تكون مرتاح، المعادلة الصعبة دي محمود حققها مع زوجته و أولاده. أسس كرافان بنفسه في وقت الكورونا الثقيل لما كنا قاعدين مش عارفين نسافر، و أنطلق أول ما الدول بدأت تفتح من ألمانيا يستكشف الدول الأوروبية. إزاي بنا الكرافان؟ بيعيشوا فيه إزاي؟ خطوط السير؟ و التحديات كلها في داخل البودكاست 🎧

لما تسمع للأخر حتعرف إزاي ممكن تأجر كرافان كسائح و تخوض نفس التجربة 😉

إزاي أسافر و أوفر ثمن الطيارة، Voyship أبليكاشن

بتساعد أي مسافر يكسب مبلغ و هو مسافر عن طريق توصيله بناس عايزة تنقل حاجة من وجهة سفره بطريقة أمان

إسمع 🎧 البودكاست مع محمد الجوهري مؤسس الأبليكاشن علشان تفهم إزاي حتستفيد و تبدأ تخطط لأول سفرياتك

لما تسمع أخر البودكاست حتعرف إزاي ممكن أسرة كاملة تسافر ببلاش تماما 🤫

خالد بيعرفنا على كل واحات مصر بعيونه، بحرية، خارجة، داخلة و غيرهم، حيحكي لنا قصص و حكايات و مغامرات عاشها في رحلاته المتعدد لكل واحة على موتسكله في سفر بطئ ممتع.

ناس قبلها و مخاطر عدى بها، لحد أخر حكاية في البودكاست حتفضل مترقب و بتفكر هو عدى بكل ده إزاي 🤔

إسمع البودكاست ده و أعرف واحات مصر بعيون رحالة بيسافر ببطء

أول ميني بودكاست عن كبسولة حجز الطيران، حيوضحلك كل الخبايا و النقط اللي محتاج تركز عليها علشان تحجز أحسن تذكرة طيران بأحسن سعر.

بحذركم ان المعلومات كتيرة و دسمة يعني ممكن تحتاج تسمعها أكتر من مرة أو تكتب منها كمان المعلومات الجديده عليك 🙃

و ماتنساش تشارك الميني بودكاست مع الناس اللي حتستفيد منه

رحلة لكل مدينة تتزار في سيريلانكا، دليلك في عشر أيام ازاي توصل لكل مدينة و تعمل فيها ايه و حتكلفك كام بالطريقة المناسبة لك حسب ميزانيتك.

مي مصيلحي راحت سيريلنكا كتير و بتطلع ناس هناك تفسحهم و تدلعهم حتحكي لنا كل ده بالتفاصيل حتدينا الزيتونة بقى من الأخر خصوصا أن سيريلانكا مليانة حاجات مختلفة قوي من معابد لطبيعة لبحر فتظبيط السفرية محتاج كياسة 😉

اسمع البودكاست 🎧ده لو بتفكر تروح أو عايز تسافر و مكسل تسافر بس عايز تستمتع مع اللي سافر.

في البودكاست ده الفنانة التشكيلية مي السيد حتعرفنا بُعد جديد في التطوع و السفر، كلام أول مرة حتعرف أنه موجود في مصر، تطوع فني كيوت جدا في مشروعات صعبة جدا مع السفارات و الهيئات الأجنبية في مصر.

تجارب مختلفة في جنوب مصر ومع أطفال الشوارع و رياضيين كلها فيها مساعدة للمجتمع و سفر أو أستقبلها لمسافرين

لو أنت بتحب مساعدة المجتمع، أو بتحب السفر أو بتحب تسافر بدون تكلفة مادية كبيرة، اسمع 🎧البودكاست ده حينورلك 💡 لمبات جديدة من الأفكار

أول حلقة في الموسم الخامس من ترافل كودز

بما انها اول حلقة في السنة فقولنا نشارك معاكم سفريات ٢٠٢١ بذكرياتها الحلوة و العودة للمطار الدولي بقى مع حواديت أماكن السفر الداخلي و ماخبناش عليكم مصايب السفر اللي أصابتنا أول مرة من السفر لبعض الأماكن الصحراوية النائية و تشريف حشرة غريبة في بيتنا و السفر بالجبس.

لما تسمع الحلقه للأخر حتلاقي شوية تفاؤل في تخطيط سفريات ٢٠٢٢ 😉

البودكاست ده لمروة و مصطفى ثنائي السفر بس مفاجأة المرة دي مصطفى هو المذيع 🙃 و مروة اللي بتحكي.

مصطفى حيطلع من مروة تفاصيل تخطيط رحلة سريعة مدينة كابدوكيا في تركيا ، كل اللي محتاج تعرفه علشان تحط المكان المختلف ده على قايمة الوجهات اللي حتطلعها أو تحبه و تحس أنك زرت المدينة الجبلية القديمة جدا جوة حكايات مروة ، و طبعا حنحكي عن ما يحدث ورا صور البالون المميزة لكبادوكيا و صور السجاد القديم و الفنادق الي محفورة جوة الجبل و مدينة الجن القديمة اللي في بطن الجبل و حواديت كتير,

إسمع 🎧 البودكاست ده حتتعرف و تتحمس لكبادوكيا جدا و حتعرف مصطفى كان فين و مروة في كابدوكيا 😉

جيرو أصلا كانت في سفرية من السفر التطوعي اللذيذ أبو تلات شهور في مدرسة صغيرة في قرية في اطراف تايلاند على الحدود مع لاوس، و مع كل صدمات الحضارية و العادات المختلفة اللي كانت بتقابلها و حتحكي لنا عليها كانت راكنة على أنها قاعدة تلات شهور و يعدوا، البلوف كله حصل لما الكورونا قفلت عليها لمده ١٥ شهر هناك و هنا بدأ التعايش مع الظروف و الحشرات و الحيوانات الخطيرة و الوحدة و الأكل العجيب و حاجز اللغة، حواديت ملهاش سقف 🎧 حتسمعوها في البودكاست ده.

تعرف إيه عن باكستان السياحية، قليل جدا لو عارف.

شريف بتاع أكشن ضيفنا بقي حيحكي لنا عن القبض عليه على حدود أفغانستان، حيحكي لنا عن تحديه لأقوى رجل في العالم في باكستان ، حيحكي لنا على أخطر جسر شافه هناك و حيحكي لنا على أحلى منظر طبيعي ممكن نشوفه في حياتك، فيما يخص السايح العادي مش مستوى السوبر بندق 😁 فى البودكاست ده حنتعرف علي باكستان و شعبها و طبعهم، مطبخهم، تنوع المناطق الجغرافية من شمالها و جنوبها و حنعرف أهم الأماكن السياحية اللي لازم نروحها

أسمع 🎧 البودكاست ده و حتستمتع بشدة 😉