كلنا بنسافر علشان اسباب مصدقينها و حبناها، و أحلي اسباب هي الإنسانية الخالصة. دكتور فارس دكتور بيطري مش بس شاطر لكن كمان برة الصندوق، بيحب شغله جدا و السفر جدا جدا فبقى بيسافر يساعد في المنظمات العالمية لإنقاذ الحيوان.. المعرضين للتعنيف او الانقراض او عمل حملات توعية للناس. حكايات سفريات مثيرة مع حيوانات مانعرفش عنها حاجة و تعامل الشعوب المختلفة معاهم حيشركنا بها في البودكاست ده. 🎧أسمع الحلقة حتستمتع و يمكن تحب تعمل زيه و مش شرط للتطوع تكون دكتور 😉

إحنا المصريين يا ترى بنشوفكم ازاي

لما بتقابل أجانب من ثقافات مختلفة دايما بتحاول تبني إنطباع عام علشان تسهل على نفسك التعامل معاهم في المستقبل و طبعا بنبقى داخلين على كل شعب عندنا شوية اسطمبات معروفة، الانجليزي غلس و الفرنساوي رفيع و الافريقي فقير و...... حاجات كتير قوي لما بتنزل لأرض الواقع بتكتشف انه أوشعات 😲

مصطفى و انا في البودكاست ده حنحكيلكم عن أنطباعتنا الحقيقية من التعامل المباشر و سفرنا لبلاد مختلفة، حنحكي عن الشعوب اللي شبهنا قوي و اللي عكسنا خالص و ماتنسوش ان معايا أقوى دكتور نفسي في مصر يعني تحليل الشخصيات هواية بتمكن و احتراف 😉

إسمع 🎧 البودكاست ده فيه حقايق عن الشعوب غير المتداول المضروب، حينفعك في التعامل لما تسافر أو في شغلك مع الجنسيات المختلفة

بيلا بنت مصرية كان حلمها تلف الدنيا و قررت اول سفرية تكون حول أفريقيا كلها بري!! 😯 طلعة صعبة جدا على أي حد ما باللك بحد اول مرة يسافر 🚎🚌

غلطات بقي أشكال و ألوان بيلا حكتها لنا و طبعا الرحلة وقفت في النص 🥴

البودكاست ده كنز 🎁 معلومات علشان احنا بنتعلم من الغلطات مش من الحدوتة المترتبة و مفيهاش غلطة ☑️

البودكاست ده انا ضحكت🤣 فيه جدا من قلبي مع بيلا على مواقف صعبة و غريبة هي عادت بيها لوحدها💪🏽 في الغربة 👏🏼

البودكاست 🎧 ده لأي حد عايز يستمتع و يضحك و يعرف بيلا رجعت مصر بعد ما صمدت و زارت كام دولة و رجعت ليه 😉

#everytravelisanewlife

#كل_تلات

حقيقة الإقامة في ألمانيا و فرق الثقافات بين الشعب الألماني و المصري من أصغر الحاجات للنظام و الإحتفلات و الأكلات و العلاقات الإنسانية، أماكن الفسح اللي السياح مايعرفوهاش كل ده و أكتر دكتورة نهال حتكهولنا في بودكاست عن حياة المغترب في ألمانيا. فلو بتفكر تسافر شغل،فسحة، هجرة لألمانيا البودكاست ده مايفوتكش 🎧

النهاردة حنسافر في البودكاست الي فيتنام

رحلة من شرقها لغربها بكل تفاصيلها حنعيشها مع المغامر علي طارق. قضى ٤ شهور هناك كمرشد سياحي يعني عنده الزيتونة 😉

حنعرف تفاصيل المدن اللي تستحق الزيارة، المواصلات، التكلفة... 🎧 إسمع البودكاست للأخر حتلاقي شوية معلومات فوق البيعة عن لاوس جيران فيتنام و جمال لاوس 😉

ليه مش بنسافر و نحلها ازاي ؟!

معظم الناس مش بتقوم تسافر علشان مجموعة اسباب مشتركة: زي الفلوس و العيال و الوقت و الشغل و حاجات تانية، حنحكي لكم احنا حلناها ازاي و حنستغل وجود دكتور نفسي و رحالة معانا علشان نفتح الأبواب المقفولة في عقولنا على أفكار موقفانا عن السفر

و الإستمتاع بالحياة 😉

Record for the live interview with the egyptian traveler based in Turkey Mohamed El samman. He gave us new places, ideas and hidden gems in Turkey as u have never heard before

يعني ال couchsurfing ده حيسكني ببلاش و انا مسافر 😲؟

لو عايز تعرف يعني ايه couchsurfing (و هي كده ملهاش ترجمة بالعربي)

لو عارف و نفسك تجرب و مش عارف تدور فين و على ايه و تختار ازاي

طيب كمان لو عندك مخاوف من التجربة و عايز تعرف قصص اللي جربوا

البودكاست ده ليك ، حتسمع 🎧 كل ده و أكتر من كاتبة ادب الرحلات مؤلفة الكتب الأكثر مبيعا، الاولة في باريس، الفيروزية، هوستيل، أساطير السفر السبعة.. الرحالة شيرين عادل

المرة دي مش حنتكلم عن سفر الفسح،البودكاست النهاردة عن سفر الشغل و المؤتمرات كرائد أعمال.

حنعرف من شيرين فرص سفر أي رائد أعمال، حتعرفنا سافرت إزاي أمريكا و دبي و الهند بدعوات لحضور مؤتمرات عالمية لريادة الأعمال مدعومة بحكومات الدول دي. حنعرف اتعلمت ايه و شافت ايه و خطوات الوصول للسفريات دي.

السفاري في كينيا رحلة ناس كتير شايفها حاجة صعبة و بعيدة و خطيرة.. شيماء و اسلام حيحكوا لنا في البودكاست ده عملوها ازاي مع ابنهم سنة و نص. حيحكوا لنا كل التفاصيل من أول التخطيط و ركبوا ايه و شافوا ايه و سيمو أتبسط و لا لأ... سواء ناوي تسافر في يوم من الأيام سفاري أو حابب تسمع مغامرات شيقة عمرك ما حتعملها،. البودكاست ده ليك ✌🏽