لو أنت من الناس المضغوطة في مفرمة الحياة 🥴 😒و عايز تفصل تماما لفترة صغيرة أو كبيرة و مش عارف تروح فين، البودكاست ده حيديك كتالوج الفصلان السريع جوة مصر:

نوبيع/رأس شيطان/طابا.

لمبنا كل المعلومات الي محتاجها في بودكاست واحد من أول حتروح ازاي، تقعد فين و تقييمات أشهر الأماكن هناك، حتعمل أيه و تستمع ازاي و أماكن الخروجات و المزارات هناك

إسمع 🎧 البودكاست حتلاقي الخلاصة 😉

باسي و عمرو مؤسسي جروب ole travel حيشاركونا منافيستو أوروبا، سفرياتهم الكتير لكل مدينة في أوروبا و أكتر من مرة خلى عندهم معلومات كتير ازاي تعرف تستمتع فعلا في أوروبا و أحلى المدن المستخبية.

حيحكوا لنا عن الجروب و عن سفريات الجروبات اللي بينظموها للتصوير و تعليم الطبخ و الرحلات الروحانية.

و معلومات كتير زي السفر بباخرات المواني في أوروبا و ازاي تحجزها.

لو نفسك مفتوحة أو حتي مستكفي حتي من سفر أوروبا هما حيجروا ريقك علي سفرية فورية 😉

أخر حلقة في ٢٠١٩،حنعدي علي كل سفرياتنا و تجاربنا في السنة، كمان المفاجأت الي قابلتنا في كل سفرية و تحدي السفر الطويل مع الحمل وعدناه ازاي والمعلومات الجديدة اللي عرفنها في الرحلات دي و بنخطط نسافر فين السنة في ٢٠٢٠ 😉

حنسمع حواديت حول العلم مع بطلة الاسكواش العالمية مريم متولي، حنعرف عن حياة الأبطال بيسافروا فين و ازاي و الفرص اللي بيقابلوها برة مصر للإحتراف و التعليم و العلاقات اللي بتتبني مع أبطال عالمية من ألعاب رياضية تانية في الغربة.

إسمع 🎧 البودكاست ده و حتعرف مريم تصادقت مع محمد صلاح و غيره من النجوم الرياضيه إزاي و فين في الكوكب 😉

أربع شباب مصريين، سافروا لحد دلوقت اكتر من ٦٥ مدينة مختلفة فى ٢٠ بلد مختلفة

علي صفحتهم كل التجارب والمواقف اللي مروا بها خلال السفر، وازاي قدروا يرتبوا للسفريات دي بتكاليف بسيطة.

باستمرار بينشروا معلومات تساعدك انك تسافر: الدول الرخيصة، الدول اللى مش محتاجة ڤيزا للمصريين، الدول اللى تذاكر الطيران بتاعتها رخيصة ومحدش يعرف عنها حاجة!

هدفهم هو مساعد اى حد نفسه يسافر

أسمع 🎧 قصتهم و نصايحهم في البودكاست ده.

سفر التصوير📸، إستمتاع للمصور و إمتاع للي ماسفرش و بيتفرج علي الصور.

وائل حيحكي لنا عن التصوير في السفر في البلاد المختلفة و الظروف المختلفة و الَمسابقات اللي دخلها و كسب و الصورة اللي اتنشرت له في national geographic

إسمع 🎧 البودكاست لو عايز تعرف نصايح بسيطة تخلي كل صورك في السفر حلوة 😉

أول حلقة في مجموعة السفريات القصيرة اللي مدتها أقل من ٤٨ ساعة. حنبدأها بواحدة من عجايب الدنيا السبعة، حتستكشف معانا الأردن عموما و البترا خصوصا اللي أي مسافر غالبا بتكون علي لستة أماكن الزيارات بتاعته. مروة و مصطفى حيحكوا لنا عن المكان بالتفصيل كأننا كنا معهم

رحلة البحث عن الذات، مطلب لناس كتير باختلاف ثقافتهم. ندى إستقالت من شغلها و سافرت، أستوحت الفكرة من فيلم eat pray love و عملت بالظبط زي جوليا روبرتس. في البودكاست ده حنسمع تفاصيل رحلتها من خلفية مصرية.

التأمل الصامت في بالي و أثر عليها ازاي، يمكن تتحمس و تقتبس التجربة أنت كمان 😉

في الحلقة دي مش حنجيب سيرة التخطيط خالص، طلبة حيكلمنا عن الارتجال و العفوية في رحلاته الفردية حولين مصر بالموتوسيكل لوحده من غير أي خط سير كدة 😲

حودايت عن الطرق من القاهرة لكل مدن الصعيد و البحر الأحمر و سيوة و مواقف و مغامرات مثيرة و جميلة

بنكمل كلامنا عن مصادر التخطيط قبل السفر اللي بدأ في الحلقه ١٧.

في البودكاست ده حنتكلم علي مواقع و وسائل تانية غير الأبليكشنز كمان ممكن تستخدمها و أنت بتلم معلوماتك و بتحضر قبل أي سفرية.