حاولنا نلم كل الأبليكشنز المهمة اللي بنستعملها في التخطيط للسفر و إزاي ندقق جواها و ناخد بالنا من ايه علشان نستفيد منها كويس.

المواقع و التطبيقات دي بنستخدمها في الوقت الحالي أنا و مصطفى في كل سفرياتنا و شامله و وافية.

ده الجزء الأول من الحلقه فيه تفاصيل أهم ١١ موقع و تطبيق بتعليقنا عليهم. الجزء التاني من الحلقة التلات اللي جاي.

الحلقة دي لمحبي الطبيعة و اللي بيحب الرياضة من بعيد لبعيد شوية 😁

معانا سهاد من القائمين على Egypt hiking community حتعرفنا يعني ايه مشي الجبال و متطلباته و تاخدنا في رحلة سريعة في صحاري مصر و وديان ايطاليا و جبال أمريكا.

مروان رحالة أختار يسيب كل حلم تقليدي مرسوم علينا و يمشي ورا أحلامه و طموحاته في إستكشاف سلوكيات الناس المختلفة و ثقافتهم، أختار يخوض تجارب و يتعلم مهارات بنشوفها في السينما بس زي فنون القتال الأسيوية و التأمل والفلسفات المختلفة من لسان أهلها. و و بعد شوط من الرحلة دي حكلنا عمل كده ازاي و نجاحاته و سقطاته و أحلام المستقبل. رحلة ملهمة لأي حد يسمعها... مينفعش تفوتك 😉

رحلة بآلة الزمن الي كوبا هافانا عودة لسنه ١٩٦٠، مصطفى و مروة حيحكوا لنا كل تفاصيلها من أول التخطيط: ازاي تلحق نفسك من خساير تغيير العملة، تعمل إيه وماتعملش إيه، الطريق المختصر للفيزا، المزارات، المواصلات، الإقامة، إزاي تستمتع ببحر الكاريبي من غير تكاليف سياحية، طباع الناس هناك، كل حاجه محتاج تعرفها لو بتحضر لسفرية هناك

إسمع الرحله دي و عيش التجربه الكاريبية المختلفة و أنت في مكانك.

دايما بنحمسك تقوم تسافر لوحدك، المرة دي حنحمسك تسافر في مجموعة.

بيتر حيحكي لنا بيسافر مع مراته و أصحابهم كل سنة و يوفروا إزاي بشوية معلومات بسيطة حتفرق معاك كتير و يمكن كمان تقدر ترجع بشوية فلوس من اللي صرفته 💸

تقريبا هما خلصوا كل أوروبا و فيه بلاد أتعادت كمان. لو بتفكر في رحلة لأوروبا فيها كذا بلد في نفس السفرية بميزانية محدودة أسمع البودكاست ده و تجربه بيتر و أصدقائه أكيد حتفيدك

للأماكن طاقات و للشعوب طاقات واحنا بنسافر عايزين نرفع طاقتنا و نشحن و نفصل عن كل روتين الحياه اليومي.

هند مدربة طاقة حيويه، سنين بتدرس و تتعلم جبنا منها الخلاصة نعمل ايه و نتصرف أزاي علشان نرجع من كل سفريه اخدين أعلي طاقة ممكنة.

حتحكي لنا رحلتها هي شخصيا مع الأماكن و طاقتها جوة مصر و برة.

إسمع البودكاست ده و استعد لـ ٤٠ دقيقه شحن عن بعد‎.

مش ناس كتير مهتمة بسياحة المتاحف علشان دايما كلمة متحف تفكرك بتماثيل قديمة و مكان ممل و رجلك بتوجعك مش لاقي حتة تقعد فيها، بس المتاحف مابقتش كدة خالص. حسني بقى حيحكي لنا خبراته في متاحف غير تقليدية ممتعة جدا في اليابان و المالديف و بلاد أوروبية مختلفة.

إسمع البودكاست ده يمكن تحب المتاحف و تيجي تحكي لنا علي المتحف اللي زرته في سفريتك اللي جاية ‎

ممكن تبدأ تسافر في أي سن و أي وقت برة أو جوة مصر و ممكن برضه ده يطلع منك مواهب جديدة و تعيد أكتشاف نفسك،مواهبك، أفكارك و يضيف في حياتك حاجة حلوة جنب السفر و الروتين اليومي .

معانا إيمان الأمير المسافرة دايما و كاتبة أدب الرحلات حتحكي لنا قصتها مع الترحال و بداية الكتابة في السفر و إزاي إحنا نبدأ نسافر زيها

ساعات بتقوم تعمل مغامرة وأنت مش فاهم أبعادها بتبقى وليدة اللحظة كدة وكتير بتبقى من أجمل ذكرياتك.

مصطفى و مروة حيحكوا لنا عن تجربتين من النوع ده، واحدة في طلوع جبل التلج للتزحلق و أحساسهم بالجو وعملوا إيه مع الزلاجة اللي غرزت منهم. و الحكاية التانية عن إستكشاف وادي الوشواش و التجربة الصحراوية وبحيرة الوادي السحري ومقابلتهم لمغامرين (زي جي أي جو)هناك

تخيل لو كان عندك فرصة تسافر وأنت طفل تشوف وتتعلم حاجات  بدري وتبدأ حياتك العملية جاهز بشوية مهارات اللي بنكتسبها عادةً بالإحتكاك والخبرة مع الناس المختلفة عننا.

إسمع البودكاست ده مع "ڤالي" حتحكي لنا إزاي أطفال بيبتدوا يسافروا من سن ١١ سنة  وإيه المهارات اللي بيتعلموها في التحضير  قبل وأثناء معسكر التبادل الثقافي نفسه، علشان أولادنا وأخوتنا الصغيرين ياخدوا فرصة أحسن مننا.