1969 ha in Talian sajettà giu dus umens a Sedrun ord schigliusia. Gieri Venzin ha 20 onns pli tard retschertgà e fatg in film davart il delict. En il «True Crime Grischun» raquinta el da sias retschertgas ch'han manà el fin en la Calabria, per chattar il delinquent.

Il 1969 sajetta in lavurer da la Calabria giu a Sedrun dus umens e blessa in terz grevamain. Il motiv saja stà l’onur dad el, da sia famiglia e da sia marusa. El haja numnadamain gì in’amanta a Sedrun durant il temp ch’el era là per lavurar. Formica, co ch’el vegn numnà, possedeva ina pitschna agenda, nua ch’el nudava mintga giada, cura ch’el durmiva cun la dunna «tutto bello» – per il cas che quella vegniss en speranza. Gieri Venzin, autur da film ed istoricher, ha retschertgà avant bundant 20 onns quest cas. En la pli nova episoda da «True Crime Grischun» na raquintainsa betg mo il cas, mabain discurrin era cun l’autur dal film. Gieri Venzin raquinta davart las sfidas da sias retschertgas, da ses viadi en Calabria per chattar il delinquent e co ch’el sez ha udì sco uffant ils tuns dal delict.

Per la famiglia da Martin Staub è il murdraretsch in schoc, al qual è suandà in temp dificil. Il figl da la victima, Silvio Staub, ha discurri cun nus dal crim sgarschaivel e co che la famiglia va enturn cun quai ch'è capità.

Igl è l’emprima giada che Silvio Staub discurra cun las medias dal murdraretsch da ses bab avant passa 20 onns. Per el èsi impurtant ch’il cas na giaja betg en emblidanza. En memoria a ses bab ha el vulì discurrer dal crim ch’è restà ad el en memoria sco sch'i fiss stà ier.

L’um da fatschenta da San Murezzan Martin Staub (50) vegn chattà ils 30 da settember 2003 en in lai da sang sin ses bain d’allevar chavals a la Côte d’Azur.

Sco ch’i para è el vegnì assassinà là en sia chasa a moda brutala, durant ch’insatgi è rut en. En il rom da las inquisiziuns chatta la polizia dentant indizis ch’insatgi haja planisà il murdraretsch. Las retschertgas mussan che perditgas n’han betg ditg la vardad ed alibis èn vegnids inventads.

Cuira, ils 26 mars 2000. Tuttenina rumpan 17 sajets las fanestras dal restaurant Rosenhügel. Ils tuns vegnan gì d’in balcun da la chasa visavi. In giuven da 21 onns va amoc.

En sia abitaziun spetga el cun buis d’assagl e la situaziun na sa lascha quietar. Dus policists vegnan blessads grevamain e las persunas al lieu portan cun sai ina memoria stgira per tut la vita. A fin va l’amoc cun in sajet final. Il giuven vegn sajettà giu da la polizia. En la pli nova episoda dal True Crime Grischun guardain nus sin las istorgias davos il cas: Tgi era il giuven attentader? Daco decid’ins da far in tal crim? Cura dastga il stadi mazzar ina persuna? Co pon ins esser preparà sco policista per ina situaziun uschia extrema? E tge lascha il cas enavos enfin oz? A quellas dumondas giainsa suenter.

Venderdi ils 6 da zercladur 1969: Mihael Derungs, sparescha da cler di ord vischnanca. Tuts tschertgan il mat da 6 onns. I dat bleras teorias nua ch'el pudess esser, dentant fastizs na datti betg. Cun l'intschertezza nua ch'el è, creschan era las ideas nua ch'el pudess esser. I dat ina massa famas.

Fin oz muventa il cas. Ils ins enconuschan il destin tragic da Mihael da raquints ed auters na vulan betg pli chavar en questas regurdanzas che han laschà enavos plajas. En questa episoda da True Crime Grischun vain nus vulì savair co ch'ina cuminanza va enturn cun uschè in cas tragic – saja quai a Vignogn u er en auters lieus.

1'606 fegls da notas che n'èn betg vegnids stampads per laschar tunar las cumposiziuns scrittas, mabain per laschar tunar las cassas. Las notas èn vegnidas tramessas per posta da pachets da lEcuador en Svizra. Il pachets cuntegnevan dentant dapli che mo melodias finas: numnadamain cocain.

En ina cuschina da cocain, installada en in'abitaziun da vacanzas a Laax, vulevan plirs umens extrair da lonn 1993 il cocain pur dals fegls. Profitar avess stuì in cartel da drogas sidamerican. Ma in agent secret ha midà listorgia.

La pli nova episoda da True Crime Grischun dat plinavant era ininvista en il problem da la criminalitad organisada en Svizra e mussa il cumbat da la directura da lUffizi federal da polizia (Fedpol) Nicoletta Della Valle cunter la mafia.

Il gimnasiast Axel Sven Springer svanescha ina notg or da sia stanza da l'internat al Lyceum Alpinum Zuoz. Tge è capità cun il biadi dal mogul da medias tudestgas Axel Springer? Quai na lessan betg mo savair sia famiglia, mabain er la polizia e las medias internaziunalas.

En questa istorgia, ch'è capitada il 1985, vai per vita e mort. In descendent prominent vegn rapinà – il pretsch da liberaziun èn 15'000'000 DM. Ma en las medias vegn mess en dumonda sch'i sa tracta propi d'in crim, ubain tuttina be d'in pluffer skerz.

I va per il gust da l'aventura, per grondaschia, per aviditad da daners e naìvitad cun ina gronda purziun energia criminala.

Fabia Caduff ed Anna Serarda Campell han retschertgà davart il cas.

Il glindesdi da Pasca da l'onn 1974 èn vegnidas chattadas duas baras be pauc si dal guaud tranter Martina e Strada en Engiadina Bassa. Tgi era questa mamma cun ses figl? Il giuven era da viadi senza chalzers e la mamma aveva cun sai ina bulscha plain brevs. Ina scuverta trista ch'ha fatschentà tant la polizia sco er ils abitants e las abitantas da Martina. Avess ins pudì evitar quest'istorgia tragica? Tge connex ha la mort da questas duas persunas cun ils sbratgs d'agid ch'ins aveva udì in pèr emnas avant en il vitg?

En la Marella avain nus tschertgà fastizs da quests nunenconuschents e raquintain, pertge ch'i dat anc adina persunas che pensan mintga di vi da quest cas tragic.