Ekupheleni kwenyanga esiphuma kuyo, kuye kweerhwelele iindaba ezingentle nalapho ootitshala kwiphondo iMpuma Koloni betyholwa ngokwabelana ngesondo nabantwana besikolo. Ngokoshicilelo lwe-vidiyo obeluthe ndii kumakhasi onxibelelwano, lo mkhwa awuqali ukwenzeka, sele kuyiminyaka, bade abanye abantwana bakhulelwe, bambi bade bayalelwe ngootitshala ukuba bakhuphe ezi zisu. Bakhona ootitshala abade banqunyanyiswa liSebe ephondweni, kulandela ezi zityholo. Ingaba yintoni ebangela ukuba utitshala xa ebona umfundi phambi kwakhe, engaboni umntwana wakhe ekufuneka emkhusele, koko abone umntu anokulala naye okanye anokuthandana naye? Ingaba sisohlwayo esinjani esifanelwe ngumntu onjalo, omosha ikamva lomntwana, ophantsi kokhathalelo lwakhe? Ukuxoxa banzi ngalo mba, emnxebeni uAyabonga Kekana ubambe umphathiswa weSebe lezemfundo kwiphondo, uFundile Gade, kwakunye nonobhala wemanyano yootitshala, iSADTU, kwiphondo, uMalibongwe Ntame... 

ISebe lezemidlalo, ubugcisa nenkcubeko kwiphondo leMpuma Koloni, liza kubamba umboniso weencwadi, i-Book Fair ngolwasemzini, kumasipala ombhaxa i-Buffalo City.  Lo msitho, noqale izolo, uza kuqhuba de kube ngumhla wesihlanu kule imiyo. Lo msitho udibanisa ababhali abohlukileyo, ukwa liqonga lokubamba iingxoxo ngemiba eyohlukileyo, kuquka kuyo umgama osele uhanjiwe ngurhulumente wenkqubo yesininzi kule nkalo, kwakunye nemiba yezentlalo. Ukusabela banzi, emnxebeni sibambe umphathiswa weli Sebe, uSibulele Ngongo...

Inkundla yomgaqo-siseko igwebe ngelithi abazali bobabini banelungelo lokwaba ikhefu lobuzali emva kokuba beye banosana olutsha. Eli khefu nelaziwa ngokuba yi parental leave, ngaphambili belivumela oomama ukuba baxhamle iinyanga ezine kulo xa begqiba kubeleka; ze ootata bona baxhamle iintsuku ezilishumi kuphela. Isigwebo senkundla ngoku sithi abazali bobabini mabohlulelane ngeli khefu phantsi komthetho i-Basic Conditions of Employment Act. Masifumane uhlalutyo ngesi sigwebo kwingcali yezomthetho uAdvocate Dumisani Appolis…

Umbutho we-ANC uzibhekelisile kuBrown Mogotsi, ekutyholwa ukuba ungumntu osondele kumphathiswa wamapolisa, uSenzo Mchunu, osele ebekwe kwikhefu elikhethekileyo. Unobhala jikelele walo mbutho, uFikile Mbalula, uthethe nabeendaba ngeziphumo zekomiti ejongene nemisebenzi yemihla ngemihla ye-ANC, kundlunkulu wombutho iLuthuli House. Uthi kukho abantu abangacacanga abasebenzisa igama le-ANC nabathunywa balo mbutho kwimisebenzi yabo yokophula umthetho. Ngethuba leenkqubo zekomishoni kaMadlanga, oyintloko yobuntlola bolwaphulo-mthetho, uDumisani Khumalo, udize incoko eyayiphakathi kuka Vusi "Cat" Matlala kunye noBrown Mogotsi, ngendlela uMogotsi awafaka ngayo uxinezelelo kuMatlala ukuba axhase ngemali imisitho ye-ANC. Kwingxelo ka Sibahle Motha, masive ngokunabileyo kuMkhokheli Bandla... 

IGlobal Sumud Flottila, neyintlanganisela yamatshantliziyo aphuma kumazwe ngamazwe akholelwa kwisidima somntu namandla eentshukumo ezingasebenzisi zigalo, ithi uthotho lweenqanawa zayo zithintelwe yimikhosi kaSirayeli ukuba zihambe kwiilwandle zamazwe ehlabathi.  La matshantliziyo, nekukho phakathi kwawo uNkosi Mandla Mandela, aquka oogqirha, abefundisi, amagqwetha nemibutho yesisa, phakathi kwabanye abantu. Ezi nqanawa zisingise eGaza, ngelinge lokuya kunikezela ngoncedo olungundoqo kwiimfuno zoluntu lwela lizwe. Oku kwenzeka ngexesha kusaqhuba ukujongana ngezikhondo zamehlo phakathi koSirayeli nePalestina. Ukuhlalutya banzi lo mba, emnxebeni uAmanda Xhala ubambe intatheli yeSABC ejongene nemiba yamazwe ngamazwe, uSophie Mokoena...

Inkokheli yeEFF, uJulius Malema, ifunge ngelokubhena kwisigqibo senkundla kaMantyi eMonti sokumfumanisa enetyala. UMalema ufunyaniswe enetyala lokuba nompu neembumbulu ngokungekho mthethweni, nokudubula esidlangalaleni ngethuba lemibhiyozo yeEFF yokugqiba iminyaka emihlanu, kwibala lezemidlalo iSisa Dukashe eMdantsane ngo2018. Owayesakuba ngunogada wakhe nabetyholwa naye, uAdriaan Snyman, ufunyaniswe engenatyala yena yile nkundla. UMalema uthi iyamothusa into yokuba uSnyman yena angabinatyala, kodwa inguye ekutyholwa ukuba wamnika umpu. Masive kuLubabalo Dada

Lusothukile uluntu loMzantsi Afrika kukusweleka konozakuzaku weli kwilizwe laseFrance, uNathi Mthethwa. Ngaphambi kwesi sikhundla, uMthethwa wayesakuba ngumphathiswa wamapolisa, ze kamva waba ngoweSebe lezemidlalo, ubugcisa nenkcubeko. Ngokweengxelo ezikhutshwe liSebe lobudlelane namazwe ehlabathi, iDIRCO ngamafuphi, umzimba kaMthethwa ufunyenwe ngaphandle kwehotele iHyatt Regency Hotel ekwiNtshona yesixeko iParis. Ukuva banzi ngalo mba, emnxebeni uAmanda Xhala ukrwece othethela iDIRCO, uChrispin Phiri...

Ifunyenwe inetyala inkokheli yeEFF uJulius Malema, kwinkundla kaMantyi yaseMonti, eMpuma Koloni, ngelixa atyholwa naye uAdrian Snyman efunyaniswe engenatyala. uMalema ubejongene netyala lokudubula kwi rally eyayibanjelwe kwibala lezemidlalo laseMdantsane iSisa Dukashe ngonyaka ka-2018. Lo wayesakuba ngunogada wakhe, uSnyman, ubejongene nezityholo zokuba nompu kunye neembumbulu ngokungekho mthethweni. Ukuva banzi ngeli tyala, emnxebeni uAmanda Xhala ubambe intatheli yeli jelo elapho, uLubabalo Dada...

Ivulwe ngokusesikweni inkqubo yokufaka isicelo sokuxhaswa yingxowamali exhasa izifundo zabafundi abakumaziko emfundo ephakamileyo, iNSFAS, kulungiselelwa unyaka ka-2026. Apha kwinkqubo-ndaba yakho sikhe sathetha neNSFAS ngendlela abaqhuba ngayo ekuxhaseni abafundi ngemali, nemingeni abaye bahlangabezana nayo ekunikezeleni ngale mali kulo nyaka. Ukuxoxa banzi ngalo mba, kuquka indlela yokufaka izicelo nokuhlawulelwa kweendawo ezihlalisa abafundi, phakathi kwezinye izinto, emnxebeni uAyabonga Kekana uhleli nothethela iNSFAS, u Ishmael Mnisi....

Inkundla yomgaqo-siseko iphulaphule ityala eliyimbali, nelingahle libe nefuthe kwindlela amatyala angqamene nokwabelana ngesondo atshutshiswa ngayo, kweli loMzantsi Afrika. Imibutho elwa impatho-gadalala ngokwesini, ichwechwele le nkundla ngelokuva ukuba yona iyangqinelana nyhani na nesigwebo senkundla ephakamileyo yoMntla-Gauteng, nalapho la nkundla yagweba ngelithi amasolotya athile kumthetho obizwa iSexual Offenses Act awahambelani nomgaqo-siseko weli, nanjengoko ewabeka emngciphekweni amaxhoba odlwengulo.  Oku kungqamene nendlela ubani aye abonakalise ngayo ukuba uyavuma okanye akavumi kusini na ukwabelana ngesondo. Ukuxoxa banzi ngalo mba, emnxebeni uAyabonga Kekana ubambe ingcali kwimiba yezomthetho, uAdv Dumisani Apollos...