trufm Current Affairs

Ngoku masive kumbutho iChrist Kingdom Party, ukuba abahlali baseNelson Mandela Bay banokuwuvotela ungenza ntoni ukuguqula imeko kulo masipala. U-Amanda Xhala udlene indlebe nongumgqatswa kwisikhundla sikadolophu kulo mbutho, uKenneth Tyika...

Iyaqhuba imibutho yopolitiko ukugaya inkxaso ngelilungiselela unyulo loomasipala oluzayo ngomhla wesine kweyeNkanga kulonyaka. Phakathi kwalemibutho ingenela unyulo ukhona umbutho i All Citizens Party nogayela inkxaso komasipala abaliqela nekuquka kuyo umasipala ombaxa i Nelson Mandela Bay. U-Amanda Xhala uthethe nothethela lo mbutho phantsi kwalo masipala umbaxa, u Buntu Mdyesha...

Inkundla yomgaqo-siseko igwebe ngecala le-ANC, nalapho ivumele ukuba abagqatswa balo mbutho abayi-181 nabebekhatyiwe ngaphambili yikomishoni ezimeleyo yezonyulo,  emva kokungeniswa kwamagama abo emva kwexesha ebelisikiwe, ukuba bafakwe kwakho kuluhlu lwabagqatswa. Le nkundla ikwavumele ukwamkelwa kwengxelo efungelweyo efakwe emva kwethuba, ngelithi olu libaziseko lube luncinane, izizathu eziye zafakwa ziyanelisa, kwaye ayikhange idale ukuba kwenzelwe ifeya icala elinye. Esi sigwebo senkundla yomgaqo-siseko, sijika isigqibo senkundla echophela imiba yonyulo neyagweba ngakwicala lekomishoni yonyulo ezimeleyo, i-IEC. Masihlalutye esi sigwebo sijonge iingxoxo ezithe zenziwa kule nkundla, neziphembelele kwesi sigqibo senkundla yomgaqo-siseko. UAyabonga Kekana uye wancokola nengcali yezomthetho uAdvocate Jazz Vilakazi, kwakunye nomakhi mkhanyi kwimiba yonyulo, uGqirha Nkosikhulule Nyembezi...

Umphathiswa wezenzululwazi nobuchwepheshe, uGqirhalwazi Blade Nzimande, uthi ukuthengwa kweenkqubo zobuchwepheshe kumazwe ehlabathi, nebezinakho ukuveliswa kweli loMzantsi Afrika kuqhwalelisa uhlumo loshishino lwezobuchwepheshe lweli. UNzimande ebekutyelelo lokuhlola iziko lezenzululwazi nobuchwepheshe kummandla wophuhliso lwamashishini, i-East London IDZ, kwisixeko sakuGompo kwiphondo iMpuma Koloni. Lo mmandla wakuGompo nguwo kuphela kwimimandla ekhethekileyo ebizwa ii-Special Economic Zones eneziko lezenzululwazi nobuchwepheshe kweli lizwe. Bebechazela umphathiswa ngemingeni yoqoqosho esisithintelo ekubeni kwamkelwe ulutsha olunomdla nemfuno yoqeqesho kwezenzululwazi nobuchwepheshe. UNtombozuko Balintulo ubelapho, waza wasiqulunqela le ngxelo

Ikomishoni ezimeleyo yezonyulo, i-IEC, ilandisile ithuba lokufakwa koluhlu lwabagqatswa yimibutho engamashumi amathathu anesibini ekwimeko efanayo ne-ANC, neyaye yavaleleka ngaphandle nayo, nanjengoko kusiyiwa kunyulo loorhulumente basekhaya ngomhla wesine kwinyanga ezayo. Le komishoni ithi esi sigqibo sijoliswe ekuqinisekiseni ukuba yonke imibutho yezopolitiko ifumana impatho efanayo, kulandela isigwebo senkundla yomgaqo-siseko, negwebe ngecala le-ANC. I-IEC ithi le mibutho ingamashumi amathathu anesibini ityumbe abagqatswa abaye bayithobela yonke imigaqo emisiweyo, ze yahlawula nemali edingekayo, kodwa ayalufaka uluhlu lwayo olugqibeleleyo. Le komishoni ibithetha namajelo eendaba eCenturion, kwiphondo iGauteng, izolo. UZara Groenewald usenzela lengxelo

Kuvakala ukuba amashishini athumela iimveliso zawo eMelika ajongene nelahleko ezibhiliyoni eziphindaphindeneyo zeerandi, ngenxa yobudlelwane borhwebo obufadalalayo kunye Melika. Amashishini kwiphondo leNtshona Koloni lilodwa, alahlekelwe yimali engange R2.8 billion kwintengiso yeemveliso ngo2025, logama amanye enyanzeleke avale, ntoleyo ebeka emngciphekweni amawaka emisebenzi. IMelika yenyuse irhafu yeemveliso zeli ezithengiselwa elalizwe ngo30% kweyeThupha. Sithe makhe sijonge imeko yorhwebo kwicandelo lezolimo. U-Amanda Xhala uncokole nophuma kwi-Agricultural Research Council, uNjingalwazi Bongani Ndimba...

Inkundla yomgaqo siseko igwebe ngecala le ANC kumba wabagqatswa abangazange bafakwe kuluhlu labagqatswa kwi IEC. Lo mbutho uye wacel'umngeni kwisigqibo senkundla yezonyulo esaba ngecala le IEC, nebesikhuphela ngaphandle abagqatswa abayi-181 ne ANC ukuba bazigqatsele unyulo koomasipala abathandathu. Le mbambano isukela ekubeni iANC isilele ukucofa iqhosha elithi "Submit as Final" kwinkqubo yeIEC yokufaka abagqatswa ngaphambi kwexesha ebelibekiwe. UAmanda Xhala ubenodliwano ndlebe nomhlalutyi wezopolitiko, ugqirha Asiphe Mxalisa.

Ehlile amaphaphu kumalungu nabaxhasi be-ANC kwiphondo iMpuma Koloni, kulandela isigwebo senkundla yoMgaqo-siseko, negwebe ngecala lalo mbutho. I-ANC ibijamelene nengxaki yokuba ibingazo kubanabo abagqatswa abakhuphisana kunyulo loorhulumente basekhaya koomasipala bemimandla iNgquza Hill neSajonisi, ngeli lixa koomasipala bemimandla iWalter Sisulu neSunday's River lulunye kuphela uluhlu lwabagqatswa oluye lwangeniswa kwikomishoni ezimeleyo yezonyulo, i-IEC ngamafuphi. Oku kulandela ukusilela kwalo mbutho ukucofa iqhosha elibhalwe "Submit as Final" kwinkqubo ye-IEC yokuchonga abagqatswa ngaphambi komhla obubekiwe, wamashumi amabini anesibhozo kweyeThupha. Le nkundla ingaphezu kwazo zonke ezeli lizwe iyalele i-IEC ukuba iquke abagqatswa be-ANC kuxwebhu lokuvota. UNkululeko Nyembezi uza nengxelo ethe vetshe...

Inkundla yomgaqo-siseko igwebe ngecala le-ANC, nalapho ivumele ukuba abagqatswa balo mbutho abayi-181, nabebekhatyiwe ngaphambili yikomishoni ezimeleyo yezonyulo ukuba bazigqatse kunyulo loorhulumente basekhaya oluza kubanjwa ngomhla wesine kwinyanga ezayo. Le nkundla ikwavumele ukwamkelwa kwengxelo efungelweyo efakwe emva kwethuba, ngelithi olu libaziseko lube luncinane, izizathu eziye zafakwa ziyanelisa, kwaye ayikhange idale ukuba kwenzelwe ifeya icala elinye. Usosiba-jikelele we-ANC, uFikile Mbalula, uye wafikelwa lufefe ngethuba ethetha namajelo eendaba emva kwesi sigwebo, waze waquleka emva koko. UVuyolwethu Mabeqa uza nengxelo esiyiqulunqelwe nguSibahle Motha...  

Ngomhla wesine kweyeNkanga, abavoti abaselungelweni bazakuthatha inxaxheba kunyulo loomasipala lwalo nyaka. Xa befika kwizikhululo zokuvota, bambi bazakunikwa iimpepha zokuvota ezimbini, ngethuba abanye bezakunikwa ezintathu. Njengenxalenye yamanqaku ethu angonyulo, sibize ikomishoni ezimeleyo yezonyulo ukuba isincede sifunde ngokuba umvoti uzakunikwa ii-ballot papers ezimbini okanye ezintathu xa kutheni? UAmanda Xhala uncokole nosekela manejala we-IEC eMpuma Koloni, uMasindi Mosehana