I-Arhente yesibonelelo sendodla, uSASSA, uphawule imiyalezo ethe ndii kumakhasi onxibelelwano ngeenkcukacha ezingachanekanga nezilahlekisayo malunga nenkqubo yokwenziwa kwesiqinisekiso sokuphila kwabaxhamli, nenziwa yile arhente ukuqinisekisa abaxhamli bayo. Iinkcukacha ezikumakhasi onxibelelwano zithi njengokuba iqhuba le nkqubo, ziza kunqunyanyiswa izibonelelo. Kodwa ukuba sicaciselwe ngale nkqubo, emnxebeni uAmanlda Xhala ubambe umanejala ophezulu kwicandelo lonxibelelwano kwaSASSA eMpuma Koloni, uTabisa Nondwayi...

Onke amalungu eANC aselungelweni kufanele ukuba avotele umongameli walo mbutho, ngokunxamnye nangaphambili, apho ibiba ngabathunywa abangamawaka amane kwiinkomfa zonyulo kuphela abenza njalo. Oku kwakwenzeka kuphela ukuba inkomfa kazwelonke ye-ANC iyakwamkela oku, kuquka nezindululo ezigxile kwimigaqo-nkqubo yalo mbutho, kwa nohlengahlengiso kumgaqo-siseko wombutho. Oku kuvele kwintlanganiso yesihlanu yebhunga leANC kuzwelonke, iNGC.  Le ntlanganiso, nequkunjelwayo namhlanje, iza kubona utshintsho kwimigaqo-nkqubo elishumi elinesibini equlathwe kumgaqo-siseko we-ANC, kwakunye neminye eliqela endululwayo kumgaqo-siseko welizwe loMzantsi Afrika. UZukiswa Tshume uza nengxelo esiyiqulunqelwe nguNtebo Mokobo...

Sizise iinguqu kupolitiko isigqibo sepalamente sokuseka ikomiti entsha eza kuqwalasela imiba ye-ofisi kamongameli. Oku kuphawula isiqalo ekubeni amalungu epalamente abe neqela elisekelwe ukuthabathisa uxanduva umongameli nosekela-mongameli, ngomsebenzi wabo.  I-ofisi kamongameli buqu ilamkele eli nyathelo, nalapho usekela-mongameli uPaul Mashatile athi yena noMongameli uCyril Ramaphosa bakulungele ukuhlolwa komsebenzi wabo, ze baphendule nayiphina imibuzo esuka kumalungu epalamente, nebonwa nje ngesemdleni woluntu. Imibutho yezopolitiko eyahlukileyo iyalixhasa eli nyathelo lokusekwa kwale komiti, ngelithi linyathelo ebekufanele ukuba kudala lathatyathwa, ngokubhekiselele ekomelezeni intatho-xanduva kwi-ofisi kamongameli. UMkhokeli Bandla uza nengxelo...

Iqale ngolonwabu ikomiti yethutyana yasepalamente, nesekelwe ukuphanda ngenkxalabo ngokhuseleko lwesizwe, kodwa ithe apho iqale khona yatyelela nkqu kwintolongo enokhuseleko oluluqilima ePitoli. Le komiti yasekwa yipalamente ngomhla wamashumi amabini anesithathu kweyeKhala, emva kwenkomfa yamajelo eendaba eyayibanjwe ngumkhomishinala wamapolisa kwiphondo iKwaZulu-Natal, uLt General Nhlanhla Mkhwanazi, kwangaloo nyanga. UMkhwanazi wenza izityholo zongenelelo lolwaphulomthetho, urhwaphilizo nopolitiko kwinkqubo yezobulungisa, zityholo ezo ezibandakanya amanye amagosa aphezulu kwinkonzo yesipolisa, kuquka nomphathiswa wamapolisa uSenzo Mchunu osele ebekwe kwikhefu elikhethekileyo sithethanje. UZalene Merrington uqwalasela ezinye zezinto eziye zaphambili kule komiti, kule ngxelo siyiphathelwe nguZukiswa Tshume...

Sibone amaphulo aliqela alumkisa ngokubanjwa kwemijuxuzo eyaziwa ngePens Down, kwiindawo ezahlukileyo kweli. Isebe lemfundo, imibutho engafumani nkxaso kurhulumente, noluntu ngokubanzi, bamenyelela ulonwabo olungenatywala nanjengoko abafundi begqibile ukubhala. ENelson Mandela Bay, bekubanjwe umsitho wePens Down nalapho bekukho izinto zokuzinwabisa kungekho tywala ngenzame zokuphelisa lomkhuba. Uyakusikhumbula isehlo saseEnyobeni nalapho kwasweleka abantwana abayi 21 ngonyaka ka2022. Namhlanje, sithe masixoxe ngomba wokusetyenziswa kotywala, ingaba busetyenzisa ngelixesha kuphela okanye sinengxaki yabantwana abasela utywala. Ukuxoxa banzi ngalo mba, emnxebeni uAyabonga Kekana ubambe ugqirha ojongene noxinizelelo lwengqondo nomphedumlo uNjingalwazi Jabulani Kheswa, kwakunye nomsunguli wephulo elibizwa i #ungazibulali matric campaign, uGqirha Sanele Gamede...

Usekela mphathiswa wesebe lolawulo ngobambiswano nemicimbi yemveli, uPrince Zolile Burns-Ncamashe, ugxininise isidingo sentsebenziswano yehlabathi ukuqinisekisa ukuba amazwe anako ukumelana neentlekele ezinkulu zendalo. Uvakalise oku ngethuba esenza intetho ngosuku lokugqibela lendibano yelizwekazi i  Afrika libambisene ne Europe, ebishukuxa amaqhinga okusabela kwiintlekele zendalo(  iAfrica-Europe-Middle East Earthquake Response Exercise) eGqeberha kwiphondo iMpuma Koloni. Le ndibano ihlanganise amagosa ajongene nentlekele, amaqela ohlangulo, kunye nemibutho yesisa ephuma kwihlabathi, ukuhlola nokuqinisa uMzantsi Afrika ukuze ubenokulungela ukuqubisana neentlekele ezinkulu zendalo. Masive ngokubanzi kuSisipho Ngcumbe...

Kubonakala ngathi ibeyi mpumelelo kulonyaka iBlack friday, nalapho umzuzu ngamnye kuthengwe amatyeli angapha kwamakhulu asithoba (900)  ngosuku lweBlack Friday, ze kwathengwa amatyeli angamakhulu asixhenxe (700) ngomzuzu kwiCyber Monday. Ngokokutsho kwecandelo elijongene neentlawulo iPayInc, oku kubonakalisa ukusetyenziswa kakhulu kwemali ngelixesha. Inkampani ye insurance iVouch.co.za, ithi iintlawulo zenyanga yeNkanga zonyuke nge 15% xa kuthelekiswa nabanye oonyaka. Masive kwingxelo ka Nothando Magudulela...

Isebe lorhulumento ngentsebenziswano, lichonge iqela labantu abalishumi abazakujongana nendlela yokuziphatha kumasipala ombaxa iNelson Mandela Bay eMpuma Koloni ukuqinisa ulawulo, ukulungisa iinkqubo ezisilelayo lincedise nokuvuselela uhanjiso lweenkonzo. Olungenelelo luza njengokuba unondyebo weli egrogrise ngokubamba isixa-mali esingange 546 million randi eyabelwe lomasipala, ngaphandle kokuba lo masipala uthatha amanyathelo ngemali engaphezulu kwe 30billion randi kwinkcitho engafanelekanga esele kudala isenzeka. UNandipha Plaatjie usenzele le ngxelo...

Isebe lezothutho eMpuma Koloni lisebenzisana nelezempilo, lisungula iphulo lexesha leziyunguma lika fika uphila kuKomani. Amagosa ezendlela azakunikezwa izithuthi ezintsha ezingamashumi amathathu anesithandathu, ngelinge lokuqinisekisa ukuba ayabonakala ukuqinisekisa ukhuseleko ezindleleni. Kwisithuba nje saleveki idlulileyo, sele bebahlanu abantu ababhubhe ezindleleni, kwabanjwa abangamashumi asixhenxe ngokuqhuba phantsi kweempembelelo zotywala. Ukuncokola banzi ngeliphulo, Ayabonga Kekana uncokola nothethela isebe lezothutho apha ephondweni u Unathi Binqose......

ISebe lamagqala omkhosi libambe inkqubo kwisizwe siphela sokukhangela abo bangamagqala omkhosi, nabangasawafumaniyo amaqithiqithi ebekufanele ukuba baxhamla kuwo. Le nkqubo ikwaqulathe ukucocwa koluhlu lwabo, kususwe abo baxhamla ngobuqhetseba kwiSebe. Iqela elityunjwe ngumongameli elichongelwe ukubumba olu luhlu lwamagqala omkhosi, ukuqinisekisa ukuba kukho abantu abafanele ukuba kulo ngokwenene, ukucoca olu luhlu kwa nokomeleza umsebenzi wamagosa eli qela, sithethanje likuMntla Koloni isithuba esingangeeveki ezimbini ngelokukhangela amajoni angaqukwanga kolu luhlu. UZukiswa Tshume uza nengxelo kaKarabo Siyoko...