trufm Current Affairs

Namhlanje ibilusuku lokuqala lovoto olukhethekileyo kunyulo looMasipala basekhaya. Abavoti abanelungelo lokuvota ngokukhethekileyo bafumene ithuba lokuvota ngaphambi kosuku lonyulo oluzakubanjwa ngoLwesithathu umhla wesine kule imiyo. Our reporter Lubabalo Dada has more.....

Ngempelaveki esiphuma kuyo imibutho yezopolitiko iqukumbele iirally zayo zokugay' elinkxaso, nanjengoko namhlanje luqalile unyulo lweevoti ezikhethekileyo kunyulo loorhulumente basekhaya. Ingaba amaqela ezopolitiko enze ngokwaneleyo ukurhwebesha abavoti ukuba bavotele la maqela? Imiqulu yezithembiso yawo yona, iyathetha nabavoti neemfuno zabo kusini na? Ukuphendula le mibuzo neminye, emnxebeni sinomhlalutyi wezopolitiko, uGqirhalwazi Nkosikhulule Nyembezi....

Ngenzame zokunceda uluntu lufunde umsebenzi wezandla uZama Nobhevu noyinzalelwane yase Ngcobo kwilali yase Nkondlo eGibeni, eMpuma Koloni, uhamba umgama omde osuka kwelinye iphondo esiya kwelinye, kwiphulo lakhe lokwenyusa inkxasomali ejolise ukuze kufezekiswe iminqweno yakhe. Kunyaka ophelileyo uhambe esuka eGauteng kwindawo yase Greenfields, esingise eNtshona Koloni. Ngomso uzakusuka eGauteng asingise eMpuma Koloni. UVuyo Mabeqa ubambe udliwano ndlebe noZama Nobhevu ukuva banzi ngeliphulo lakhe.  

Inkampani yezonxibelelwano iNelana Media House ibambisene ne Nkosi Jongumsobomvu Maqoma Foundation, zikwiphulo lokuxhobisa kwakunye nokuphuhlisa izakhona zamagcisa,kudalwe namathuba engqesho kwicandelo lemiboniso bhanyabhanya. Le nkqubo ebizwa Abantu Besizwe Skills Training Programme, ivulela indlela abantu abatsha ukuba bakwazi ukufumana izakhono namathuba engqesho kamabona kude nakwicandelo lokuvelisa imiboniso bhanyabhanya, kumasipala iRaymond Mhlaba, eMpuma Koloni. UVuyolwethu Mabeqa uncokole nongumvelisi weenkqubo zemiboniso bhanya-bhanya, uNoxolo Nelana...

Ibonakala izakuba yimpela veki exakekileyo le kwezemidlalo nalapho iqela lebhola ekhatywayo i Orlando Pirates lizakudlala umdlalo wekhulu linamashumi asibhozo anesithandathu ( 186th edition) ne Kaizer Chiefs we Soweto Derby. Kwaye kuninzi okusemngciphekweni kwi Pirates ngaphandle kwalamanqaku mathathu we Betway Premiership.  Kwelinye icala iqela lesizwe lebhola yeqakamba likusuku lwesihlanu kwi test series nalapho liqubisana neqela lase Australia. Ukanti lempela veki ikwa yeyokugqibela kwi United Rugby Championship phambi kwekhefu lwe Nations Championships ngeyeNkanga. Ukuva banzi ngale midlalo neminye, u-Amanda Xhala uncokole nentatheli yezemidlalo yeli jelo, u Khanyiso Tshwaku...

Unobhala jikelele weqela i MKP ogxothiweyo uSibonelo Nomvalo,  uthi iingxelo zobuntlola ezibubuvuvu kwakunye nemifanekiso eyenziwe ngobuxhakaxhaka be AI, zisetyenziswe ukulahlekisa  umongameli weli qela uJacob Zuma ukuze amgxothe kwesisikhundla. UNomvalo uthethe neentatheli eThekwini ngokugxothwa kwakhe. Kwiveki ephelileyo uJacob Zuma unike uNomvalo uphumaphele njengonobhala jikelele weli qela nelungu legqugula ePalamente. Oku kuza emva kwezityholo zokuphazamisana noluhlu lwabagqatswa nabo bathunyelwa kwizikhundla ezithile. Masive kuZanele Buthelezi...

Amalungu ekomiti ejongene nezokhuselo epalamente, akhalaza ngelithi awaziswanga kwangexesha ngomba wokuthunyelwa kwamajoni kwiphondo iKwaZulu-Natal, nebekufanele ukuba kuchazelwe ipalamente kuqala. Ngamajoni angamakhulu amahlanu aneshumi athunyelwe kwela phondo ngelokunika inkxaso kumapolisa. Oku kulandela iziganeko zoqhankqalazo olundlongo-ndlongo nokuzithathela kwizinto zabantu kweminye imimandla yela phondo naseGauteng, kulandela isigwebo senkundla yomgaqo-siseko kwinyanga ephelileyo ngomba ongqamene nabo bafuna ukuba ziimbacu kweli. Ukuthunyelwa kwala majoni kwiphondo iKwaZulu-Natal kwenzeke ngomhla wethoba kule nyanga, ngeli lixa ipalamente yona yaziswe kwisithuba seeveki ezimbini emva kokuthunyelwa kwawo. Ngokomgaqo-siseko weli, ipalamente kufuneka yaziswe kwisithuba seentsuku ezisexhenxe kwenzekile oko. ULikho Jack uza nengxelo esiyiqulunqelwe nguZalene Merrington...

Umphathiswa wokuhlaliswa koluntu, uThembi Simelane, uthi iziseko zebhulorho neendlela ziye zachatshazelwa kakhulu ziimpuphuma zakutshanje neziye zathwaxa imimandla ethile yephondo iMpuma Koloni. USimelane ebetyelele imimandla echaphazelekileyo eNgqeleni naseMqanduli, kummandla i-OR Tambo kweli phondo, ngelokuvavanya ubongakanani bomonakalo odalwe zezi mpuphuma. UFundiswa Mhlekude usiqulunqele le ngxelo...

Sele kubalwe ngaphezulu kwe-97 percent yeziphumo zonyulo zelizwe lakwaSirayeli, nobelubanjwe ngoLwesibini waleveki. Ezo sele zibaliwe zibonakalisa ukuba umbutho wenkulu mbuso yelalizwe uBenjamin Netanyahu kwakunye nalowo uphikisayo uGadi Eisenkot, ayifumenanga sininzi sevoti epalamente. Umbutho kaNetanyahu ufumene izihlalo ezingamashumi amahlanu anesithathu ngelithuba izihlalo ezingamashumi amane anesibhozo ziphunyelelwe yimibutho ephikisayo. Ukuze ungene epalamente njengombutho olawulayo, kufuneka ufumane izihlalo ezingamashumi amathandathu ananye. Ingaba oku kuzakulibeka phi ilizwe lakwaSirayeli? Ukusihlalutyela banzi ngalo mba, uAmanda Xhala uthethe nengcali yezopolitiko kwakunye nemiba yamazwe angaphandle, uGqirha Sithenkosi Lungisa...

Inkokheli yombutho iBuild One South Africa, iBOSA, uMmusi Maimane, ithi lo mbutho uqinisekile ukuba umyalezo wayo uthetha ngqo nabavoti, nanjengoko ulungiselela ukukhuphisana kunyulo lwawo lokuqala ngqa loorhulumente basekhaya oluza kubanjwa ngomhla wesine kwinyanga ezayo. UMaimane ebethetha namajelo eendaba eFinetown, eRhawutini, nalapho lo mbutho ubusindleke irally yawo yokugqibela ngaphambi kolu nyulo. Lo mbutho uchaze ubunkokheli obusulungekileyo, uhlumo lwezoqoqosho nokhuseleko njengezona zinto ezingundoqo ekuziseni uzinzo koomasipala. UZara Groenewald uza nengxelo ethe vetshe...